偽割引鑑證。

全港割引期最長、減幅率最大的，相信非 IT 系商店莫屬，其割引期之長，幾可跟正價期相匹敵，除非閣下屬趕潮人兒，否則如無必要都應該先忍忍手睇定點再落鎚，否則一個星期後發現購入貨品以半價出售，唔抵可憐。

星期日路經朗豪坊 細IT 赫見少量人龍，告示寫著「最後秋冬季大減價低至一折」，感覺幾千載難逢，見沒事幹就排埋一份，其實所謂的排，都不過係十數秒的事，比起排峰壽司，天與地之比。殺到入店，眼前境物尤如炮火過後戰爭現場，各曾經以數百至數千出現的品牌名衣皆化身為一舊舊、一球球出現，摺痕之多，比公司工衣甚至家中著用數年的起居衣物更甚，有些甚至乎跟另一件衣物袖連袖的合體起來，見旁邊眾人落力的在亂葬崗中挖掘打撈執到一手都係，又好似會有好多荀野沈澱在內。

咪誤會我在賤視一眾打撈人員，自己入得自助餐會場當然同樣想將胃納量無限谷大有咁多食咁多，斷沒有歧視同路人死霸爛霸、咩都塞入口之理，但問題在於，眼見場內最多人打撈、最多人磡探的竟然屬於 5cm 地段，宏大自助餐場上有黑松露有煎鵝肝有波士頓龍蝦不吃，竟然一而再、再以三的狂添熱盤西炒飯，好明顯爆錯位。

很想知道貨品減到何等地步，就隨手的執起一件計計數，Edwin 牛仔褸七百餘元，貼了六折標記，幾抵，但其實價錢跟兩個月前聖誕期間購入價無異，如斯肯定全因自己早前正正用四百多元入手，無花無假，現在 IT 系作出「最後秋冬季大減價」跟兩個月前沒大肆宣傳時一模一樣，不同之處在於先前列明割引後售價，現在則只標明折頭，所以用「最後秋冬季大減價」作號召壓根兒就是銷貨手段。

世人，包括自己在內總認為周街卧虎通街藏龍，橫街窄巷小店寧舍滋味、公廁旁賣的牛雜特別入味，堆到滿山的衣物自然更有發現荀野可能性，但事實係，入面甚麼都沒有，就只有兩大致敬王 Fingercross、5cm 及不成正比地高價的 Underground，「最後秋冬季大減價」除了能夠吸引更多人入場外，就是慳番人力物力無需摺衫搵衫等客試衫，絕對高招。

跟夥伴巡了一圈後，不單止毫無著落，更加有唔駛錢都揀唔落手的境況出現，親眼見到一堆有幾分姿色的冷衫因過度擠壓磨擦而令嬌滴身軀滋生無數小毛頭，可謂見者傷心、摸者拮手，一竹槓當然打唔得哂一船人，地段關係，有理由相信港島區 IT 會有較多懂得閃避竹槓的高手存在著。

買物好季節正式壽終正寢，迎來悶熱煩人千篇一律的夏季，先前貧血多時的小錢包，終於有時間回氣補充失去的養份，找番掂條咭數。