Wednesday, 7 March 2007

十契弟。

記得陳奕迅在某電台節目曾經講過,在娛樂圈演過最後悔最不堪回首的作品乃王晶執導的《靚女差館》,莫講話翻睇,甚至連海報都唔想多望一眼,假以時日,若然李逸朗得到天咁大恩賜紅起上來的話,李先生最唔想重遇上、最唔想電視播完又播的又會是昔日那一套?

漫漫長路變數太大,早早斷言冠軍得主好像言之尚早了一點,但我想,在李先生未來建構的最後五大無可挽回作品排行榜中,《十兄弟》大概可以佔上一個高名次吧。

先旨聲明,由於《十》劇播映以來自己只略略看過不多於一集,所以要針對的,並非此劇的故事性、可觀性、抑或角色演技,只求其的純粹單從各角色造型方面出發。

印象中《十》劇前前後後改篇翻拍了三數次,尤記得以前新年時節午間賀歲劇場要麼《啼笑姻緣》,要麼《十兄弟》,一邊吃著新年午飯一邊看著兩套經典,寧舍有新年氣氛,但自從若干年後有線電影台不停重播翻拍版後,對《十》劇就越來越生恐懼。翻拍版由 B 哥哥鍾鎭濤和金 B 大俠俆錦江擔網演出,此片風格統一,由頭爛到尾全無冷場,可謂爛片愛好者之恩物,我等愛好爛片的,再爛的都可以接受翻看再翻看,但唯獨《十》最不堪入目,咎其原因在於人物設計方面,十條兄弟造型之樣衰,蓋過了故事好壞,正如《無間道》動用顏福偉演陳永仁的話,相信觀眾著眼點又會跟現在有出入。

假若開辦全世界最不應該跟足原著造型選舉,意見再參差《十兄弟》都應該有個候選提名吧?數十年前版本跟足原著設定可以接受,時代問題也,但去到二零零七年版本(又或二零零五年版本),原版《十》造型已經不能再為人所接受,由九條麻甩佬主演無得改,但都應該選幾個比較童顏、感覺幼齒的去演,現在電視中幾條友搭配上史上最難頂髮型,令人見一次鬧一次。真心講句,無線過往慣性收視我係有份建構的,但唯獨《十》劇真的不能容忍即時轉台。

咁得我憎,某程度上因為自己對劇中男女主角偏見所致。

林先生縱橫電視界十數二十年,主演角色永世老實正直呆板人,此類人物表情來來去去兩三個無需操勞,比木獨佬更木獨,演技有目共睹;以前郭小姐仍屬大面人時其實幾得我歡心的,但自從樣貌劇變後,變得越來越唔順眼,雙頰凹陷缺乏肉地,姿色即時大打折扣,這令我想起以前姚樂兒都有差不多的遭遇,由暴乳變成貧乳,結果一獗不振,所以有理由相信有肉地人仕外觀係比較襟的,化妝後的肥姐就係一個好例子。

不過講開又講,郭可盈、李彩華、周汶錡面型長相予人感覺都很相似,或者靚女通常都差不多樣吧。

2 comments:

李小龍私生女 said...

十契兄----哈哈,好搞笑

我一見到就想轉台,基本上另一時段既爛賭義亦不堪入目,可惜家中事頭婆乃無記粉絲,冇計...T.T

pm>> said...

同感~真係十契弟!!