某日路過九龍公園附近，見 Fat Angelo 巨型公仔大派現金 Coupon，才猛然醒起自己已經有將近四年時間沒幫襯過，反正對晚膳地點毫無頭緒，就決定展開一段跟 Fat Angelo 的破冰之旅。
Fat Angelo 又唔係我家族生意，無啦啦做咩要懶有感情重投其懷抱？講白一點，其實就係貪小便宜，巨型公仔所派優惠卷果真做到優惠效果，食滿二百元可以當一百元使用，每次最多限用五張，即半價食一餐，絕對幫襯得過。
換個角度睇，如果生意好又為啥要派此類自殺式優惠卷？說穿了就是生意欠佳，借勢宣傳。
第一次光顧新店，面積比舊店大了不少，檯與檯之間距離足，有大量卡位供坐，播著音樂加上暗暗沉沉燈光，氣氛比過往更上一層樓，是晚雖然有半價優惠卷隨街派發，但落到店又沒想像的人頭湧湧，相反全店大概只有半滿，有點意外。
點菜後，例牌先上大餐包跟田園沙律，前者一貫的大份量、大堆頭，兩個大餐包二人各一個，雖云熱都唔熱下，搣起來有跟麵包角力感覺，但慶幸脆口，塗上牛油，又慢慢幹掉了全個，要注意，我係麵包，尤其係免費麵包愛好者，所以基本上係包都清碟的；沙律比舊店用料更差，蕃茄夠大片夠熟還不錯，但生菜就真的過份街市賣的生菜，吃著吃著還發現不少明日黃菜，整碟菜瀰漫著不新鮮感。
但免費附送，又好像不應該太過挑剔了。
Fat Angelo 其中一個不吸引人原素就是頭盤小食選擇太少，跟友達對著餐牌左揀右選，仍然不能選出一個所以來，最後見廚師推介有釀磨菇，就二話不說選之而後快。
明白到走家庭用餐路線無需賣相，但九粒磨菇來到又真的太不吸引，感覺很凋零很弧身走我路，但味道卻不怎麼值得自豪，磨菇內裏釀入物不明，只知入口有很強焗透了的卡夫芝士粉味道，個人認為食味麻麻，但友達卻讚不絕口密密口吃，各有各口味。
大盤選了最愛的紅酒汁煮雞胸，自己一向乃雞胸愛好者協會頭號會員，皆凡一些有靱度、要咀嚼的肉類尤其喜歡，所以人家搶吃雞脾時我獨愛雞胸，大家不相往還。
見到煮雞胸用上比釀磨菇更小的碟上檯後，不禁思疑餐廳是否無碟可用，首先份量縮減了二份一，灑面磨菇又比過往少了，雖知 Fat Angelo 一直存在碟頭過大問題，但過大係一件事，縮少了份量但價錢照舊又係另一件事，總知來到就有一種被騙感覺，其次汁料雖然依舊美味，但雞肉好明顯比過往粗糙得多，咬落滿口渣，比腦海中香滑細緻口感有太大距離，又係失望。
還點了白汁三文魚寬麵，上檯後傳來陣陣白汁濃郁香味，令人欲罷不能，跟友達完成碟頭上的沙律後即滿心期待叉番兩把入口，想不到換來的卻是另一個失望。寛麵聞係好聞，但入口又係令一回事，白汁味不足、芝士味欠奉，有若干三文魚味浮出來，但不討好；來得 Fat Angelo 當然不指望意粉會有 Al Dente，但又真的估不到可以煮得如此腍糊，達至連用叉都唔係好捲得到的地步，很差，比起茶餐廳黑椒牛扒意更差。
以上五款食物（包括餐包及沙律）不分先後無分貴賤一次過大排延席放哂上檯，加上碟頭大，基本上吃到中段大部份食物已經接近全涼了，雞胸磨菇還可以接受，三文魚寛麵就真的很難頂了，汁多關係，寛麵只是稍涼一點被熱力掩蓋住的大量油份已經紛紛浦頭，單看已經倒胃，放入口更不得了，涼了的三文魚奇腥無比，令人難以吞嚥，呢味野，最好用羊脯煲方法上檯，係會更腍更糊，但起碼可以保存溫度，入得口。
再加了一杯 Smoothies 連加一合四百多元，扣除了 Coupon 後只二百餘，抵吃但感覺尤如汽車入油求其填飽肚就算，更枉論美味，若然一堆人聚餐求求其其嘻嘻哈哈的話還可以接受，其他狀況的話，只能說一句後會無期。
名稱：Fat Angelo's
地址:尖沙咀綿登徑
No comments:
Post a Comment