Monday, 12 March 2007

提早退休。

星期六比想像中早了一個骨彈起身,大減價完結沒街好行沒事好幹又肚空空,忽爾記起自己已經有好一段日子沒吃過點心飲過茶,就早早換上單拖戰衣拉上風褸帶上帽子走到九龍城喫茶去。

向來單拖獨個兒出門而又沒下文的話,總有一套特定的 Dress Code,一套近乎毒男的死死團套裝,始終一人用膳已經夠可憐的了,還要幹上飲茶此等孤獨老人活動,更加係越求其低調越好,著得太光鮮被巧遇友人、尤其女友人認出撞個正著的話,很難辯解星期六假期流流為啥要一個人窩在舊式茶館喫點心的。

唔係怕惹人譏笑無人無物孤獨精,只怕對方單方面鄧我可憐但其實自己樂在其中。

一人飲茶的話,我喜歡到九龍城的中古茶樓羊城酒家,此酒樓歷史悠久,假若自己前世屬短命種一名的話,大有可能老過我的前世今生,內裏陳設跟祖國民營餐館不相上下,每次光顧店內總清一色老頭子,埋頭苦幹對著電視看著一堆正在兢逐的馬仔大呼小叫,好鬼有趣,我與馬仔無緣,佢有佢刨馬經,我有我鑽研波經,各自各精采,唯一相同的是,跑馬地塊草皮大家都有份夾錢鋪的。


下午茶時段所有點心即叫即蒸款款八元正,先點了一客山竹牛肉,再點一隻糯米雞,經已足夠滿腹至傍晚九點檔首輪英超了。羊城糯米雞份量絕非鬧著玩,兩個拳頭大小體積糯米雞內裏蘊含數大舊燒肉、雞中翼一隻、一舊火腿及一小片腊腸,陣容一時無兩,小弟食量一向能屈能伸,但要將我食至反艇收皮,又唔係三兩下手腳可以做得到,但羊城糯米雞,只要一隻就可以將我技術性擊倒,份量大之餘,味道亦不賴,可能自己一向乃糯米愛好者,所以糯米雞呢家野,蒸得爽口唔太爛就可以滿足到我。

食完糯米雞,嗒番幾杯濃普洱消消滯,搞掂頭版娛樂版山竹牛肉才粉墨登場,這裏山竹牛肉一客兩大舊,吃完糯米雞再單挑兩舊肉,實在太亂來,下次來的話,都係棄雞取兩籠點心比較上算。這裏山竹牛肉味道一般,沒想像中重果皮味又嫌黏著肉球的「皮」唔夠多,為飽肚當然綽綽有餘,但論食味的話,還是其全肉燒賣較可取。

餐後全力鑽探蘋果波經之奧秘,一關串一關的算計著,到理出概念後埋單走人合廿二元,經濟實惠,到馬會投注後望望錶,原來已經五點多鐘,咁樣就消耗了半日時間,看來退休後生活應該都不會太難過。

名稱:羊城酒家
地址:九龍城衙前圍道118號

3 comments:

祁佳仕 said...

一個人喔~~一個人喔~~件健又一個人吔飯囉 :ppp

講0下d無謂野先....

ps : 究竟係因為d電視劇集真係悶,定係我自己悶呢...點解上排(即十兄弟果排)無電視好睇..[作為電視精乜鬼狗屎垃圾都會睇一餐既我,竟咄奇地一套都冇睇過]...而今日開始果d(今晚睇勻哂八點,八點半同依家睇緊九點半果套)...嘩,悶到呢..
再問多一次:究竟係d電視劇集真係悶,定係我自己悶呢?

ps 2 : 都好耐冇黎探你...就連我自己既blog都冇去打掃一下,真係唔敢睇變成點喇...

我睇都係唔關d電視劇集事,應該係因為我自己悶既原因....
打個"喊露"又再去自閉過先....

潤滑KY said...

嘩!好久不見呀祁小姐!無左妳黎探訪,呢樹家不成家呀。

我已經好耐無認認真真咁對住個電視喇,除左頭先《向世界出發》之外,我日常生活已經徹底比日劇攻陷,港劇,真係太倒糢太悶,來來去去都係鄭視帝,悶出隻鳥來。

妳努力左咁耐,下本大作現身未呀?

無良@Melbourne said...

哈..好耐都冇攪下屎添..
又話同我食飯喎..又冇"件屎"..

有冇發覺每次都係寫食野我先留言,哈哈..因為呢到實在太多好野食..睇見你飲茶..我上星期六咁岩又去飲喎..四年前我去過個間酒樓..點解咁記得..因為冇野好食..除左"炸兩"..因為即叫即整..

仲有d旅行書話黎一定要食既越南河..細細一碗咁就"七個半"..呢度冇乜糖水舖..開番間肯定賺死~~