給妳的公開私人信。

甲餐廳「牛脯麵」跟乙餐廳「濃湯牛脯麵」相比，兩店同樣原汁原味原材料經銷營運，前者堅持宗旨不耍花招，結果人庭凋零交吉結業，悲劇告終，後者稱為濃湯當然純為巧立名目無中生有，但做到門庭如市生意源源不絕，無他，花招使得恰當自然水到渠成，虛無技倆輕易成功搶灘，雖則膚淺，但卻係殘酷現實。

稱之膚淺，貶意又好像過份滿瀉，相反要在這個兢爭激烈的大市中掙扎求存，將這種旁門左道稱為細心體貼相信更加恰當，名字巧立一下名目裝飾得好好睇睇，其實就跟法蘭西菜色講求的色香味美沒大分別，菜色名字改得好，跟菜色陳設得美輪美奐一樣，有助活化脾胃刺激消費情緒，又能夠有效突出食物賣點，見到「濃湯牛脯麵」，饑民再肚餓都好，麵上檯總先需要滿足好奇心呻啖湯探探真偽，最後重點當然仍然落在食物味道身上，但有賣點才能有 Talking Point，起碼「手打腸粉」一定比「齋腸粉」更多人討論，店方先賺了第一碗金，味道好醜路遙知馬力，總好過落得乙店生時無人知，死時無人曉敗局。

講到這方面的皇者，有咩可能唔係東洋夕陽國為居首位？食物換上不同包裝推陳出新，炭燒牛扒作封面照的牛仔片味道更有層次，嚴選新潟米製造的旺旺米果顯得特別有米香，味道是否真有分別味蕾太鈍分得唔清唔楚，但我清楚明白視覺感覺確比味覺行先一大步。

「人不可以貌相」其實只中了一半，單看外表確實未能掌握人性內涵，但假若甩皮甩骨到超越基準達到不堪入目地步，縱有超人力量亦無人問津淪為空有原則孤芳自賞，深諳路上伯樂比大蛤乸更加罕見，莫怪人家唔識貨，只不過係貨比貨比爛貨而已，巿面上入得廚房出得廳堂兼聲色藝俱存的好貨全面流通，有得揀當然選擇盡善盡美，人家為啥要挑選未夠全面的二等貨去品嚐？跟閨中友伴炫耀自家樣衰男友身懷異稟，並不見得對家的靚仔男伴會因貌而變得弱不襟風，有優必有缺、有得必有失絕對正確，但優缺得失兩極從來都不會是同等重量，認為凡事公平相對的，就失多過得的一方一廂情願。

裝金佛像未見得特別靈驗，但泥萻薩再有求必應萬事萬靈都遇水即散唔得襟擺，最後全數功勞落在襟撈金大佛身上，可謂散不瞑目，人自然不會靠衣裝就能成功，但若然求其到笠件底衫底橫就走出街，人都未見得到就被拉上差館飽受牢獄之苦，機會都白白錯過了，既然有路五分鐘可以直通羅馬，幹嘛按兵不動係都要等十年先有一班的龜速三輪車載往目的地？

若然見到上述一大席話，妳仍然要堅持已見守株待兔等候一個知妳有才華又知妳住邊又有妳鎖匙的伯樂搵上門的話，下次無錢開飯就咪再搵我了。