《醒獅》。

數日前讀報見吳鎮宇跟麥子善聯導的電影《醒師》舉行首映禮，吳鎮宇自《9413》幾年後今日再有執導作品，自不然廣邀友好撐場，但假若電影係爛到不堪入目的話，賓客們散場見光一刻應該擺出一幅如何面孔才不致於失禮人前？

好不幸，我雖愛港產片，但無可否認《醒師》係一套爛片。

《醒》劇情胡鬧零趣味，最令我不满及痛心的必數吳鎮宇及黃秋生的人物設定，吳全片皆模仿 Hip Hop 友彈來彈去來搏君一笑，可謂弱智到極點，用 Hip Hop 友形體動作來作為賣笑方程式，三五七年前已經慘被用得霉霉爛爛，滿以為近代只有《搞乜鬼大製作》此等西方低級片才會一而四再而五的樂此不疲，誓估唔到香港仍有殘存黨羽，感覺比年前《天行者》用「未解決」作笑料更老土過時起盡雞皮，吳一身好演技，整鬼佢為咩要用上此等浮誇演譯法？這不禁令我想起其舊片《廢柴同盟》過火演出；模仿鍾景輝聲調作招倈買笑的早於《買兇拍人》、《五個嚇鬼的少年》年代被詹 Sir 用慣用殘，《醒師》再由黃秋生演譯，偶一為之仍然能夠「衰鬼又幾似喎」去自娛作樂胡混過去，但最大鑊黃全片皆需要用上 King Sir聲調去演戲唸對白，既刻意又無聊，全電影看著吳彈來彈去加上黃令人煩厭的聲線，可以想像得到觀者是何等難受。

吳過去執導電影雖云算不上傑作，但總算認真有趣味，今次《醒》不單沾染了出品人黃百嗚的胡鬧技倆，笑料更頻頻出現反智脫節困境，相信都係大半邊面向著大陸市場之過，據經驗所得，祖國+香港合拍的兩頭唔到岸喜劇真係無邊套岩香港人脾胃，起碼上一套我認為爛的喜劇《小白龍情海翻波》同樣祖港合拍，無獨有偶，又係吳擔正主角，真係冤孽。

大半邊面向著大陸市場，但另外卻有小半邊面回望特區，造成兩頭唔到岸局面，電影時不時說著香港民生、政治笑話，但戲種場合處理手法使然，老土過時一點幽默都感受不到，最有印象乃開場首段吳開出品人黃百嗚玩笑，毛舜筠跟股票六叔鋪排一大輪，最後說出甚麼東方股票最值投資之類，跟著演員們彈開置之不理，這類僻得不能再僻的 In-joke，如非熟讀黃百嗚發跡史的話根本完全唔知道有啥意思，我當下在想，究竟戲院現場有幾多觀眾明白箇中含意，明白了，又是否真的笑得出？

最難頂最想打爆營幕首選吳跟林子聰唱大細波一段，本人睇戲一向悶有悶睇、戇居有戇居睇，但睇到嬲的，印象中又真係無幾多次，兩條友忽爾擠眉弄眼在鏡頭前懶搞笑懶風趣的唱起歌來，意念相信來自年前鄭中基的《唧暗瘡》，好抄唔抄好搞唔搞揀著爛片皇者鄭中基，稱之有辱門楣絕對比足面。

全片極多歌星仔客串演出，總算玩得熱鬧有點驚喜，我在想，假若將之放在奉旨胡鬧的賀歲檔期上映，又可能會換回一兩下掌聲，起碼多星又舞獅又大鑼大鼓，柴娃娃適合一家大細，現在排在四月尾，睇落感覺怪怪的，生錯時辰八字之故。

電影拍得好我技窮寫來寫去三幅被，但拍得差要鬧的打上十萬八千字都嫌少唔夠喉，呢套《醒獅》，我寫篇論文出黎都綽綽有餘，失望之情，可想而知。