Wednesday, 30 May 2007

古老當時興。

一直向媽媽落力灌輸電視機遙控器並非只有開關制及「一」字按扭,遇岩鬧到拆天悶爆全場劇集節目大可大刀闊斧按下近乎封塵的「二」字,甚或大膽來個冰封之旅選擇「三」或「四」都不為過,經過多年循循善誘媽媽呢舊頑石終於點下指頭更多參與「二」台節目,成就感比亞記劇集收視點突破雙位數更大更滿足。

塵世間人與人相處最易發生爭執事件莫過於諗食飯跟爭電視睇了,唔多湊屋企米飯香的死仔包都應該知道前者光怪詭異之處,朋友A 平日明明好人好者脾氣上佳,但當飯聚地點出現膠著狀態頗頗「你話啦」「無所謂呀」時即時萬子狂燥上身,輕則扯火黑臉,重則自暴自棄掦長而去,一干人等不明所以當然掃興收場,就連當事人事後亦不明白為何當時如此燥底,箇中引爆點比《謎》更值得去解籤問卦。

後者的情況其實都相去不遠,君不見頭版倫常血案激發點通常都不外乎爭電視、爭廁所嗎?為無聊事弄致斬手割喉血腥局面,跟諗食飯諗出事一樣,其實都應該列入《怪談》內其中一個討論單元。我大個仔又無狂燥傾向,爭電視情況當然唔會出現,但媽媽睇電視習慣,就總會惹來非議,其實媽媽看甚麼電視節目做仔的自然唔方便去打搞多事,但既然收看節目渣到睇一次鬧三次地步,又為啥不給自己一個重生機會?好言相勸幾次,媽媽就忽然燥底黑臉起來,究竟有啥好嬲呢?實在令人摸不著頭腦。

近年媽媽終於懂得轉台,但不知是否先前講得太多,係又轉唔係又轉到接近走火入魔地步,當中佼佼者莫過於早前棄《同事三分親》擇《天下後母心》,前者濫用極速急停手法又肆無忌憚發放台式擾人效果聲,惱人,但起碼有養眼Yoyo 中和一下反感,《天》卻完完全全垃圾到不得了,劇情簡介提都無謂多提,單看劇名,已知一切老土到雞皮直豎到冷親地步,再看文初畫質極盡寒酸能事,實在很難明白「起碼好過無記套無聊野啦」有何理據。

轉得最好,當然就係十點半檔次,《第一手真相》雖云翻炒 Youtube,但運行得暢順做得正正經娙,播下人家爭紙皮大打出手又或粗口互鬧一餐,老實講句,我最鐘意睇呢味野,有人話買片播片無難度,但經過無記大笑話《謎》後,重邊樹有人敢話搬字過紙易如反掌?字搬得古靈精怪無人睇得明的話,原文再好都係廢的,何況原文重要係殘舊不堪的陳年舊史。

1 comment:

pm>> said...

我已經放棄了香港的電視...
bt美劇來看仲好.