Saturday, 12 May 2007

熬底的心,在胡亂糾纏。

出港遠行大日子迫近燃眉,人家好事越近越興奮,我呢類怕搭飛機怕到出汁、要著定成人紙尿片上機的不知所謂人仕,出發日尤如大限之期越近越煩燥不安,嚴重程度直達頭痛失眠,甚至打算臨場縮沙退票了事地步,其實有此心態又點會係新鮮事,每次出遠門前兩星期前總要經歷接二連三嚴峻心理角力賽才能夠得道上得到飛機,老實講,真係慘絕人寰,整件事驟聽辱家邦辱門楣,實則患有嚴重恐懼機人仕戇居心態凡夫俗子係唔會明白。

懼機症近年已經略為好轉,最嚴重發病期相信乃大前年出發到台北一役(一百分鐘機程都驚),縱然前後訪台不下五次,但事前搜刮當地最新旅遊資訊呢類功課依然非做不可,無事幹走到三聯執起台北自遊書打起書釘來,唔睇還可以瞞天過海,一睇腦海舵手即時按鍵重撥一切上機搭機過程,箇中機搖雷劈橋段當然土法炮製無中生有,凡事真的可能假不了,但假的絕對有成真機率存在著,邊個保證無我份?

黑幫電影男配角臨被圍剿斬死前總會出現切蘋果批親手、隨身金撈忽然罷工等異樣徵兆,我慘被電影感染,病態得將以上幻想系土法煉綱經歷亂扣帽子,視之為不詳預感一種,這種越諗越驚越驚越諗的惡性循環,導致周時滿身大汗後遺,有減磅作用都說不定。

事隔數年,雖云症狀相對舒緩,但熬底的心就好像細契魔性一樣暗暗潛藏內心深處,要擺脫又要不求人,唯有上網尋良方。飛機乃世界上最安全交通工具呢粒定心丸其實先後已經有不下五十人塞入我袋,我粒粒丸望清望楚全數下嚥,遂即時登入航空討論區找一些關於航空公司班底的利好題目來增強一下脆弱心靈,見圖片一大排飛機一大排空姐空佬的並列著,又好像可靠得不得了,正當心定人靜,慢慢將懼機症調節過來時,我看了以下兩項不適合懼機症患者觀看的資料後,靜心口服液功效即時煙消雲散:

日本航空123號機空難

JAL 123機艙通話紀錄

去旅行前的準備對我來說實在太辛苦太大壓力了。

3 comments:

李小龍私生女 said...

Have a nice trip.

飛機呢家野都唔驚得咁多, 我當係玩過山車, 記得有次搭夜機, 訓訓下遇到氣流, 震到成個人彈起左, 我諗都震左成5分鐘, 仲要得自己一個, 都咪話唔驚...

尖尾 said...

見咁耐無留言俾你,就同你打個招呼啦。

得閒上黎hea下的確係幾醒神,有時我都好奇你現實生活中同人傾計時是否都一樣係咁搞笑。

潤滑KY said...

小龍女:
我查實都係當玩過山車,但好唔好彩我平時去樂園係咩機動遊戲都唔會玩~
所以依然係驚。

尖尾:
嘩真係好久不見,我以為你已經失左踪添~