Thursday, 10 May 2007

名曲滿天星。

前幾年 Beyond 重組演唱會被口痕友譏諷為食老本之作,三子接受無記訪問氣定神閒不以為然,黃貫Paul 更掟出一句「我地係食老本,但係大把人想食都無得食呀!」,食得有型又直認不諱,最主要三子確實多多老本囤積居奇,久一嚐之又有何不可?君不見張氏兄弟二重唱冷手執隻舊煎堆食人口水尾都長賣長有嗎?

但貴為未退役天王級人馬,若然要走到食老本掠財一步,又實在太沒樂壇公民責任了。

黎生上回明正言順在紅磡來一席漲價 Classic 盛宴經已搞到有幸入場的各方親朋好友飽飽滯滯近乎痴線,打後還有同門一系列師弟師妹落力將其殘剩好歌重組再推出市面作新菜推出,既有助環保又能用餘威幫助後輩上位,總算一件美事,但黎天王老本名菜食完一次又一次,連杯帶碟舔得一乾二淨不特止,到近日更挾著早前慈善演唱會聲勢再三推出可翻熱大碟 4 In Love,為公益金慈善不收益,到出碟才收過夠本。
原條導火線在於某日搭小巴收音機播出黎生與衛蘭(又或衛詩)翻渣作品《我為何讓你走》,本人聽歌品味一向不論複雜唱功,但求順耳舒服,要令我呼出難聽兩字歷代就只有林保怡主唱的肥皂劇主題曲《一字馬》,但黎與衛合唱作品一出旋即超越內耳限界,黎生十年如一日唱腔再差亦老早習慣過去,但衛小姐一段才最得我噁心,歌聲入耳隨即雞皮直豎,難聽,又反而作賤地收到宣傳之效令我在 HMV 試聽了一遍。

人非草木,我何嘗不是聽黎生歌聲長大?想當年《傻痴痴》聽得如痴如醉,《愛你/不愛你》充滿電影感,但時至今日,每次看到 A Music 各出產商品後,總有強烈歛財感覺,黎生、應昌佑、衛蘭衛詩要麼純色背景大頭照封面,要麼廣告殘餘舊相循環再用,內裏再埋了一堆舊作翻新版,心思分欠奉之餘,誠意又究竟付出在那裏?做生意錢係要賺,但賺得太核突太露骨太亂來的話,被灌以無良商人之名,黎生家財萬貫,何必呢?

大碟沒入手,歌曲好醜就無謂厚顏說得太多,但聽畢《對你愛不完》及《我為何讓你走》後發現,原來郭天王當年演繹已經相當不錯的了。

無需相士開盤問卦都知今年屬於翻唱年,先有黎天王,再有林一峰《一期一會》,照著 Plug 歌路線圖去看,概念碟王古巨基大有可能推出全舊歌概念大碟,連當紅歌手都大翻特翻一餐,趨勢持續的話,新血歌手坐正皇位指日可待。

2 comments:

李小龍私生女 said...

黎生一直都唔係我杯茶, 而家仲翻唱其他天王既歌更加黑我憎...
唱歌又唔係好過人,我聽過佢唱學友首藍雨,根本就係讀歌唔係唱歌囉...

潤滑KY said...

同感,我覺得翻唱人家熱歌首要條件係唱得,黎生,我認為係四大入面最差最無風格一個,佢d 風格全部都係 mark lui 比佢。