Tuesday, 8 May 2007

《十分愛》。

網上Blog 友抑或名人專欄,不分媒介作者性別,現實中舉凡一切公開濫感傷動物都會被我所唾棄,就好像葉念琛在《蛇果報》的專欄,每次不慎Click 錯情情塔塔盡入眼簾,暗罵幾聲又講呢味野之餘,又死死地氣照單全收字字睇得乾乾淨淨,感覺尤如人家的網上肉麻日誌一樣,見親眼寃但又積極追看,有點點「忽週候群症」意味,這不是一種認同又或妥協,相反葉生其實一向深得我憎,原因當然包括蛇果總編取葉念琛而捨彭浩翔的決定。

得我憎,更大程度在於老哥連番壞話,葉生跟老哥屬N 年前校友,近年葉憑與鄧麗欣緋聞變得薄有名氣,老哥就不停將對方往昔校園生活、友達相處之不濟討厭無限放大,耳濡目染底下,我又憎埋一份,真係太膚淺了。

不過有時我會想,能夠在自己專欄內一年三百六十五日皆情愛之間而又越寫越有不被嫌悶淘汰,都係一種才能。

我不喜葉,但《十分愛》又真的拍得不錯。


大前年的驚慄片《甜絲絲》托其鴻褔看了,上年廣獲好評《獨家試愛》則被當時忽爾捲起的方力申潮而嚇倒沒入場(同一時間出現兩套方力申電影,另一為《得閒飲茶》),今次既往不疚膽粗粗入場看《十》,不無勇者表現,尤其一星期前才看完《醒獅》。

有理由相信女主角鄧麗欣係特別獲得幕後寵愛的,全片靚衫多戲份重,就連一貫見報的殘樣都不復見,容顏變得精神飽滿,換上甚有深田恭子味道的演譯,對於一向對鄧沒啥感覺的我都有點耳目一新感覺;APM 充滿為鄧而來的 Fans 們,我則衝著另一女主角鍾嘉欣而來,鍾跟鄧對比下沒後者耀眼,但卻多了一份鄰家平凡味道,嬌滴滴聲線加上淡妝上陣,我呢類人當然熱烈追捧,演出方面跟《溏心風暴》差不多,就初演來說已經超額完成了,寄望盡早脫出無記,以免睇厭睇殘;比較失望反而係楊愛瑾,楊電影已經拍唔少,但予人感覺仍然不甚自然,普通對話問題當然不大,但一到跟鄧嘈交即浮誇得有點兀突,全片就只這幕高潮戲看得我不自在。

男角方面,森美跟方力申相比下,原來前者才算男主角,平日極憎森美死人嘴,但出現在諧趣片又好像比較能習慣入眼,每每森美出現前面小朋友皆「咔咔」笑,足證森美正式攻佔各家庭,方力申沒啥好講,反而張敬軒越看越順眼自然,就算在《醒獅》亦一樣予人討好,可能《餘震》實在太好聽,聽覺影響視覺。

電影充斥大量少女友達間看愛情的睇法,記得葉專欄說過一切皆取材自朋友們經歷體驗,真假零興趣,但電影拍出久違了的港產味道,又確值得一讚再讚,先前一系列不港產味的黑幫卧底片,雖好看但不夠地道本土風,現在《十》有點點重回若干年前馬偉豪《百份百感覺》興味,感覺良好。電影近尾聲,卻有一點抄橋之嫌,話說鄧跟鍾鬧翻後一年後在街中相遇一段,除了取景不同外,全數東西包括場景角色對白跟相遇鋪排,都跟早陣子青春片浪潮的《愛情 Ameba》許志安跟張智霖閙翻後街頭遇見一幕相似度達九十巴仙,邊看邊覺熟口熟面。

生活化、不曲高和寡的港產片碩果僅存,《十分愛》值得買票捧場,但好看歸好看,對葉念琛依然沒改觀,繼續十分憎。

2 comments:

pm>> said...

想不到你會入場看,我好怕比人發現我去看stephy...亦怕看見小朋友,我都係等vcd...

潤滑KY said...

我都唔明點解會入場,近排睇既戲都係比鬼推入戲院的。

怕咩丫,相比起我想睇鍾嘉欣,睇Stephy 更加合情合理,但死0靚仔我相信係個別例子,套戲擺到明就唔係拍比呢種生物觀賞,我遇到0個條係盲毛家長恰埋眼拖佢入場的。

我同你都一樣十分憎0靚仔。