Friday 20 April 2007

對錯門號入錯座。

九龍城最紅最火除了泰國菜之外,還有一間名叫清真牛肉館的爆汁牛肉餅晚晚排隊排至開巷,呢味野數年前才不過十三數元,今時今日漲價到十八元,兩塊餅短短兩三年時間通漲數個大洋,其受歡迎可想而知,數年前還未嚴重響朵時嚐過一次,餅即叫即做當然脆皮熱辣,咬落亦一如其名爆汁而出,但味道沒啥驚喜不過而已,試過一次後就沒興趣再幫襯。

近數月同一條街忽然多了一間同樣宣稱馳名牛肉餅的咖喱牛肉館,街口街尾成正面單挑隻揪狀,據聞後者乃清真舊部分支出來的,見平日人來人往生意興隆,是晚一反常態水靜鵝飛,就跟夥伴試試。

其實一入店對其印象已經唔多好的了,首先坐低後感覺唔多聚財,所謂唔聚財當然並非地踎食店屈質將就意思,而係去旅行入到酒店房感到唔多對勁一類唔聚財,我唔係陳果齊唔清楚食店有否鬧鬼,但唔聚財就係唔聚財,唔舒適就係唔舒適,世界上就係有好多呢類科學解釋唔到的事;一向對整點心糕餅呢回事有嚴重年齡歧視,若然師傅無番咁上近年紀都好難令我有信心的,坐低望向門口一眾金毛長髮嘴邊無毛點心師傅,更覺食店唔對版。

餐牌感興項目唔算多,胡亂點了幾款點心了事。



招牌貨牛肉餅等數分鐘後上檯,兩塊野,賣相麻麻理所當然,但最谷氣莫過於其中一件有穿皮狀況發生,出名咬落爆汁的竟然未放入口已經提早預演泌水環節,印象想好都難。有汁爆,期望內餡肉味濃郁總算合理,但到入口味道卻不濃不豐盈一點香味都沒有,乃蔥少牛肉份量醃味皆不足之故,若然街邊是但買件餅的話,當然沒問題,但家下貴為掛牌作,就太過普通太小器了,肉餅吃落完全失卻肉感,個人而言完全唔合格,比街口清真更不濟。

蔥油餅跟牛肉餃緊隨其後,前者一向不為我所愛,胡亂的吃了兩三片停手,其餘由夥伴包辦;後者牛肉餃選了蒸製做法,皮又滑又薄,但奈何我愛厚皮類北方餃多一點,內裏肉餡跟牛肉餅的差不多,又係沒甚味道肉感欠奉,可以不理。

以上三款看似份量十足,但食完好似無食過一樣,神奇。


上述三款點心味淡,要了上海粗炒壓尾。
上海粗炒就係上海粗炒,有椰菜、肉絲、青椒等,慣常的味道,不出色亦沒大過失,沾上辣椒醬同吃,都不錯,食到碟底見油份比尋常的少,雖云健康但又確係沒吃開的滑口,一山不能藏二虎,形容的並非兩間牛餅食店,係健康同美味。

埋單合九十餘,若然只叫點心包點類的話,價錢尚算實惠,但座位唔聚財,食物質素普通,又實在沒有再幫襯理由,一邊吃一邊看牆邊貼著的喬寶寶推介:

「咖喱味道同我鄉下印度一樣咁正宗。」

人家撚手正宗印度咖喱,但我走入場食餃子蔥油餅,其實有問題好可能係我。

名稱:咖喱牛肉館
地址:九龍城龍崗道23號地下

No comments: