音和場的故事。

一年十幾日年假話多其實唔算多，懶起上黎每月放番一日半日已經差不多要獲利回吐，但好不幸部門各同事包括我在內同屬積假份子，反正有免費醫生提供病假紙，想放假偷閒休息一番的話大不了射波了事，何況偷番黎的快感永遠比用成本換來的快感效果更為彰顯，幹嘛要賠上夫人又折兵押上不動產年假去買懶？

公司有鑑於我呢類人在公司大幅增長，早早就取消了帶假過下年此等勾當，到近月年度末，旋即成為本部門清假大日子，單計黎緊兩三個月，基本上無邊日能夠全組同事 Full Team 上陣，適逢近日公司又無啦啦換上新制度，一堆工作加上人手不足，屬入職以來工作最為繁重日子，尤其下星期女同事A 放一星期大假，單單Email 已經足夠我用半晝去償還。

富貴的同事A，舊年到訪日本北海道玩過不亦樂乎，今年故技重施再訪日本大阪，去日本呢回事食住行事小，未知的購物慾才最攞命，觀乎同事A 近星期舉止，就知道何謂未出發先興奮，一堆對無得去人仕甚為篤眼篤鼻的旅遊書隨處放，運用公司資源列印一系列旅遊資訊之餘，最衰重要我幫手收印出物，擺明要從人家羨慕眼紅目光中尋覓歡慰。

到食飯時候，又喜歡瀏覽相關網址再 Forward 過來問意見，無錯，大阪我承認係去過，但不過係斗零咁大戎奶無耐後去過一次咁大把，加上重要跟水過鴨背式鴨仔團，試問有啥意見可以派上用場？家下我唔係有份去，更加要執拾大量同事A 歡慰期間遺留下的蘇州臭屎，同事A 此舉明問暗囂，可謂少女外表魔鬼心腸之佼佼者。

是日食飯時間，又再將已訂的溫泉酒店網址傳過來，太恨去，竟然又手多多詳看一遍。

「咦喂，露天浴場，都OK 得喎。」網頁有一露肩少女浸著溫泉對著漫天山景，狀甚享受。

「係呀，最衰唔係冬天，唔係邊浸邊飄雪重好。」同事A 等微波爐叮一聲先有飯開。

「我知，睇蔡瀾有隻馬騮坐隔離一齊浸架嘛。」唉，無得去。「貴唔貴？」

「都幾架，千幾蚊一個人，一泊兩食，肉赤。」同事A 望著飯盒在微波爐內團團轉。「好肚餓呀，個飯咁耐都未得！」

「千幾，呢D 錢無得慳，係咪分男女湯架？有冇個室？」同事A 飯未開，我已經率先幹掉面前住家飯盒，唔係我食得快，而係飯實在太少，飽肚感食完跟未食相差不大。

「有呀，有男女湯又有個室，重有一個池可以男女一齊浸。」叮一聲後同事A 迅速打開爐門取出飯，將飯蓋打開，白煙蜂擁而出，A 心急的手起匙落放飯入口，熱到起勢呼氣，但仍然邊一匙接一匙，邊講野，毫無儀態可言。「不過...呼～我朋友應該都係沖意個室，佢會怕醜，呼～我就鐘意大浴腸多D，過癮D。」

「哈哈～」笑了出來。「大肉腸過癮D？咩大肉腸真係過癮D 咩？哈哈～」

「唔係呀唔係呀！飯熱我講唔到個音咋，我係話我鐘意大浴場呀。」

「哈哈哈哈～溫泉果然只有陰同腸可以拎出黎講。」聽完解釋更加按捺不住爆笑出來。「不過我明白你點解鐘意大浴場，如果唔係，又點有可能遇得到大肉腸？」

「哇哈哈哈哈～～」同事A 細想半秒領略到箇中意思，齊聲大笑。

溫泉的事，同事A 往後都沒再提起過了。