今年電影節只訂了《羔羊喪屍》及《225漫遊異境》兩套電影，前者因事錯過最終退票收場，後者置於平日六點場次又純英文字幕，一直害怕放工再即時撲入場會出現集中力不足、累力攻心以致訓死當場慘況，自己又唔係跟電影談戀愛之類的藝術家，戲錯過了浪費銀兩自然不算大件事，最大鑊係訓到搖搖下撞到隔離左右失禮街坊，到散場時狂遭白眼，講得出當然因為曾經身歷其境．諗起都覺疚由自取。多得《225》拍得精采沒甚悶場，以上令人汗顏場面才得以只藏於心，唔露於身。
所謂的精采，當然並非滿佈爆炸場面、三言不到由十樓跳落二樓之類，相反全片貫徹小本日系影片風格，畫面唯美真實氣氛濔漫淡然感覺，自己一向最受此種生活化又充斥懶洋洋格調電影，再者雖然對白不算多劇情又推進緩緩，但角色之間久不久相互弄出一些小幽默來娛賓平衡一下淡然氣氛，加上又有東洋靚景，在近期看過的日本小品來說，《225》算高水準了。
看日系片主角外表向來屬重要一環，宮崎葵師妹、近期有點熱的女主角多部未華子算不上傳統美顏少女，但冷冷外表越看越有格，氣質有點像柴崎幸，感覺良好，演弟弟的小胖子岩田力肥頭得意渾身是肉，自己一向屬於反細路主義成員，但看著小胖子向姐姐發著細路脾氣又絲毫沒有反感，可算一個異數，不過講開又講，全片跟女主角有關連的演員除父親外都屬小肥肥一族，唔明白導演選角為啥只擇肥而噬。
《225》劇情看似怪誕富新鮮感，但老實講句，無啦啦誤進另一次元此等看似破格但實質熟口熟面的故事模式每年總會有兩三套小本電影沾手其中，當中又巧合地以日人出品為數最多，所以話日人最愛此類虛無沒實感故事模式，不無道理，此片用上同等劇情，整體感覺有點像楳圖一雄的《飄流教室》平實版及先前看過的《漂靈3:15》，不過《漂》拍得有頭有尾，較《225》來得有交帶。
電影到最後當然沒有交代一切來龍去脈，這種擺大個頭、有頭沒有尾結局向來屬於此類日片風格一部份，見怪不怪，看倌們理應做齊心理準備才好入場，但見散場後仍偷聽到不少陌路人作出相關投訴，可見家教甚好、做事有始有終之輩其實唔多適合入場看日系怪誕電影，始終總結過去看同類型電影經驗，當中幾時又會有一套可以給予觀眾們一個圓滿解話、沒戲可駁的結局？
《225漫遊異境》洋名為《Route 225》，據導演解畫 Route 既有路段意思，又可作數學算式使用，而 Route 225 結果為 15，這正代表著女主角從十四歲到十五歲的一段經歷，身為核數師樓員工竟然睇完導演解畫才醒起有 Route 這一個數學符號，慶幸老闆唔知情，否則今年想有人工加都幾難。
予告片:
No comments:
Post a Comment