Wednesday, 25 April 2007

巧婦難為無米炊。

若然忽然屁股痕癢要舉辦「近代特區人有相似藝人選舉」的話,入選組合數量儲滿一打十二兩相信絕非難事,但為選舉進行得公平公正,非天然製品及一眾大牌天王一律禁止報名參賽,大名者見慣見熟模倣者眾,閒時祖國久不久總會有一個半個劉華二世學友轉生出土,見怪不怪,要比的話,就要選一些名氣不大半紅不黑的去對決才算皇道。

Eo2 成員 Otto 跟森美長成一個餅印屬於眾所周知異性失散兄弟,擠身侯選名單可謂毫無難度,但個人心水推介必選鄭融跟鄧穎芝無疑,人有相似殊不出奇,一點都不值得著墨,但大家同樣身懷菲藉女仕膚色,同樣浮浮沉沉(鄭浮水技能高,鄧則終日潛水唔見人,各擅其長),兩者背景雖不相通但又經常性在遊戲節目中碰頭,緣份指數高企,其實小室徙弟陳敏芝跟李彩華同樣出現餅印情況,記得數年前《下一站彩虹》播出期間兩位姐仔頻頻見報,左右並排並列相互對比,相似度達八成,理應夠格晉身候選兢賽,但兩人現存長相是否與生俱來,又有邊位提名人夠膽押上高尚人格作擔保?

假若放眼東洋來一個港日交流的話,又會出現一個蔪新景象。

AV系女優蛇果報老早推舉了吉沢明步/鄧麗欣及蒼井空/胡杏兒來作示範,前者相似總算有根有據,但後者蒼井空不論外貌身材明明跑嬴胡杏兒兩三條街,勉強來一個港日對照的話,恐怕肥杏加快步伐跑快幾里路都未必跟得上,要在東洋找出肥杏替代品,始終屬意於《惹鬼狂叫》女角小西真奈美,起碼戲路差不多,要勉強肥杏演活蒼井演過的角色,胡小姐首肯都未必有人睇。

縱然反對派示威人仕塞到水洩不通整條馬路不能通車,依然維持原判推舉木村拓哉跟呂頌賢這對黃金組合作膽,假如兩位落力將勤補拙煉練一下廣東日語,《笑傲江湖》令弧沖換上木村拓哉,《戀愛世紀》哲平用呂頌賢作出替補,感覺其實都相差不遠,木村 Fans 嘟嘟姐知道的話,必定破口大罵。看得日劇多,漸漸發覺留鬚後連凱有足夠潛力成為竹野內豐替身,甚至認為若然茜利妹作出適度減磅,跟創作歌手 Aiko 都有隔代同宗之妙。

最後始終都要扯回朋友身上。

老早察覺新相識的朋友A 不論身型外表都跟潮流教父藤原氏出自同一倒糢,某日終於按耐不住將自以為殘酷真相一五一十向對方講過痛快,萬料不到朋友A 竟然以收到喜訊口吻作出「邊似唧,嘻嘻」來應對,講老實話,原意本打算讓對方難堪才講出口的,現在得到相反效果,打後精心編排的嘲諷對白被圍堵,完全派不上用場,感覺好像忽爾遭逢巨變一樣,為整頓飯局留有一絲缺陷,食都食得唔安樂。

似藤原氏真的值得欣喜若狂拍手叫好嗎?若然將藤原氏一身嚴選著用擦去留白,只單純看其長相的話,實不相瞞,將其五官組合稱為難睇甚至醜樣絕不為過,慶幸家財千萬又(好像)懂裝身,才能夠將上天賜予的限米煮出系列中最巧手最入得口的限飯出來,這種將自已外表潛能發揮到極限的神乎其技,相信都係成為 Icon 的點點原因吧?

正如藍奕邦一樣,係有才華,但問心講句,有人想似佢嗎?

4 comments:

viviberries said...

作為你的忠實讀者, 我知你唔想似佢... 同埋元X

pm>> said...

我其中一個不看日劇的原因,係我總會找到一個樣衰2打6角色跟我很像....

潤滑KY said...

viviberries:
唉~竟然重記得元x 呢條友~~~
作為忠實讀者,
我建議妳剩係記住好0個方面,
起碼慳番好多腦容量。

pm:
我完全明白你既感受,正如我前排每次揭周刊見到藍生大頭廣告,個心都好唔好受。

其實有樣野想講好耐,
我覺得你側面有少少似東touch 個九叔,正面有少少似啤梨,哈哈~

呀,係靚仔版。

pm>> said...

似東touch 個九叔...似啤梨...