Wednesday 23 December 2009

與大火雞同步過冬。

袁宅在某幾類事情上向來都不太傳統,就以昨晚過冬為例,人家在街巿搶活雞又炆冬菇又盛的一家團聚,我們卻一反正經老早在扒王之王訂了大號煙火雞在家中來一記西式做冬,雞雞相衛大家同步過冬,但老實說這夜其實不算凍。

就算寶號在識食之士討論區中再臭也好,要訂煙火雞名牌奧華利出品,還是幫襯扒王之王才算得上正經事。我明白另一供應商設有上門送貨服務,要另外加收$20 亦屬人之常情,但在沒門巿省了鋪租情況底下雞隻價格仍要比扒記略貴一籌,有被睇死怕麻煩焗住幫襯感覺之餘,最要命還是沒大號裝發售,反正扒王分店夠多取貨方便,往年入手同類火雞店方亦服侍周到,做生不如做熟,兩日前就走到尖東扒記提貨,以便預早解凍。

單憑現場五條人查實重約九磅的小號裝已經無可能食得哂,不過個人向來信奉有大食大信條,既然兩款Size 都無可能一Q清雞,何不買隻大號裝返歸壯壯聲威?單單想起一隻巨雞被擺上枱等候發落,奮力去片但份量又大得令我片一生都也片不完的時候,感覺已經很是過癮了。

所以話,若然要事情達到過癮級別,沒浪費去扶持真的很難成事。


甫回家,火雞已經移離禮盒與一眾生肉為鄰等候著被宰割命運。

是晚出場陣容除火雞之外,還有西冷及肉眼扒兩兄弟、老媽招牌菜吉列豬扒、少量鵝肝及茄汁意粉,整體肉食感覺濃厚,慶幸提早收工到吉之島入手了大量生果沙律作伴餐,否則的話,在座人士恐怕都會遭逢到便秘這一個可怕的厄運。


出席嘉賓都不太懂得享受肢解快感,無法子,開膛手傑克一角就由我由頭擔演到尾。

先將兩隻大脾及大翼移離肉身,再將半個雞胸剖出以切片及角切形式肢解上碟,請不要忘記骨架間相連著的雞肉,此堆白肉之多,足夠助養非洲某貧國兒童半個月的日常食用。邊切邊吃又要故著紋理去片,花了半句鐘起了一大碟出來用作晚餐部份,再望望跟前大火雞,原來才不過完成了整項手術四份一進程,其餘部份只好留待餐後繼續進行。餐後呷著酒一邊聊天一邊落力去幹,結果,總共花了近兩小時才完成整項肢解火雞壯舉。

兄嫂倆竊走兩盒製成品,剩餘兩大盒放回雪櫃留待慢慢享用,剩下一大堆骨架,則保留作日後老媽煲菜乾湯之用。

要幹掉一隻重約十三磅近乎零脂肪的火雞已經如斯費時,可想而知若然要肢解人類的話,所面對的問題將會如何艱鉅困難。


大杯酒大塊肉肆意地去吃去喝,聚會就是要這樣才是王道。

本文寫於餐後,是晚喝得很累文章用字沒甚麼火氣,在眼皮就快墜落到掩蓋胸前兩點情況底下,容許我老老土土來一個結尾:

祝各位聖誕快樂。

5 comments:

仕仔 said...

難得係伯母又願意以意粉配合, 換轉是家母這類忽然傳統的人, 一定同我地死過.

袁健健 said...

我老媽好喜歡~
因為慳水慳力唔駛佢搞咁多野~

李小龍私生女 said...

咁我都老土D回你: 聖誕快樂! ^.^

W. said...

吾係喎!個人覺得扒皇較利華優勝...
那個骨頭可用鹽巴調味放雪櫃,用來煲菜乾咸瘦肉火雞骨粥就超讚啦!
順祝聖好,來年順利!

W. said...

忘記左添....那火雞片通常當零嘴薯片之類來止口痕的!