Tuesday, 29 December 2009

求求其其簡單鍋物。

本人有一項頗為養生的習慣,假若前一日行左街食過飯的話,接下來一日通常都只想呆在家裏戇居居的叉電悠閒一下,無錯過程係相當沒趣,但這種行徑就好像深夜時份聽大塚愛一樣,對我來說是一種享受。

平安夜參加了「「2012 Party Talk 09 星人倒數」又看了野仔,翌日聖誕節甫彈起身,就單拖走到樂富吉之島飲個午茶準備買點熟食小吃返家龜縮去,當走到超巿樓層打算細意遊逛的時候,就收到友達來電。

「喂,今晚去邊?」友達劈頭第一句就「喂」過來。

「尋晚出左街,諗住買D 野食返屋企邊睇動畫邊嘆番下。」我答。

「唔係掛?聖誕節你都搞成咁?」彷彿聽到電話另一邊傳來陣陣譏笑聲。「無人陪就無人陪啦,扮咩鬼嘆番下喎。」

「你理得我唧,你打黎做乜唧?」無可否認,近幾年在這方面確係越撈越回塘,但,點都算係自己作出的選擇,對於外來勢力打算對本國內政說三道四甚至乎出手干預,本人定當悍衛原則並即場予以強烈譴責,繼而重申自己一貫生活立場。

「陪你一齊食飯喇。」友達說。

「下,唔好啦。」老早已經脫離每時每刻都要人陪的豆蔻年華,所以我可以好大膽的在此宣佈:大個仔係我。「你約左朋友打爐嘛,唔好搞我啦。」

「比人放左飛機呀。」

「唉,咁煩架你班Frd...」放飛機之心人皆有之,但若然禍及於我的話,事情就真的很煩了。

「我而家黎搵你。」收線後,不禁仰天長嘆。

半句鐘後,友達現身眼前,由於安在家中這一點我堅持不肯讓步,經雙方從長計議後,決定簡簡單單買若干現成火鍋料返歸打爐算數。


凱撒沙律伴火鍋確實破格,但一大袋連醬汁多士粒只售二十餘,既然灼菜灼到尾都只會食剩一堆,倒不如買自己愛吃又可以清盆的沙律菜好過;原先對吉之島出售之所謂手打蝦滑沒甚麼信心,誰不知片起上來食味又甚為討好,跟友達都有點喜出望外。

對湯底一向不甚講究,是日見名古屋八丁味噌關東煮一包又蛋又竹輪又牛筋又盛的共十枚只售三十多,反正只想求盆有味水淥下淥下,就入手試試,結果以味噌醬充當豉油意料之外合口味之餘,內裏配料還極之入味,下次再舉辦二人邊爐的話,不妨再下一城;相對美國,更愛澳洲牛,就買了一盒靚靚仔仔的過過口癮,少油脂換來較濃厚牛肉味,沾味噌醬竟然比豉油來得更為匹配,又係大發現。

一邊吃一邊看《巴不得爸爸》大結局,兩條友電視伴鍋物,不經不覺吃了兩句多鐘才收爐,事後清潔工作交由友達一手包辦,而我則開展原定動畫旅程,互不相干。

平安聖誕兩夜都過得很平淡,但國有國法家有家規,生活過得再沉實沒趣也好,都不容許外人出言冒犯。

6 comments:

仕仔 said...

估唔到名牌子日本超市的貨品無時無刻都是大割引價錢, 難為我家附近的佗地超市貨品價錢時時都自動升呢, O係過去一年每當我走進超市看一看價錢都誤以為恆指停留在四萬點水平呢.

Anonymous said...

其實都頗討厭過節架!邊有咁多節目喎!而且街上咁迫咁多人!但係話比人聽係樂於係屋企攤紏又會被歸類為「宅」「毒」...如果放假都係鐘意玩一日紏一日,賣的食物回家享受也是很快樂蕭遙的,洗鬼人倍咩!其實我都幾宅架!尤其這兩天咁凍.


yip

潤滑KY said...

仕仔:

去日超買貴我心甘命抵,但去佗超買貴感覺上係比人當傻仔,內裏又充斥大量買五件平三毫又或減一毫就大大個牌的勁減貨品,有強烈「煮左你就食啦!」感覺,觀感好差。

Yip:
過節我OK,我亦鐘意湊熱鬧,
不過係唔鐘意湊足咁多日囉~
留0係屋企時間會過得慢D,開心D。

c said...

我覺得一個假期點都要有一日在家無所事事,否則就唔覺得自己休息過。

潤滑KY said...

c:
絕對同意,
但身邊好多朋友彷彿屋企有蟻咬一樣,
唔出街唔得。

卡臣 said...

Happy New Year!