Saturday, 1 August 2009

向新港中心呼喚這才叫做折。

自己一向不大喜歡逛西武,總覺得內裏產品帶點老氣兼貴到飛起,但前陣子獨個兒做Gym 後路經尖沙咀分店,記起底層正在舉行開倉大減價,就抱著運吉的心態到店內開倉層巡巡,這一巡,乖乖不得了,原來內裏的東西可真是它媽的抵到抽筋。

我記性很差,比較複雜的牌子名稱總記不入腦,所以我壓根兒就不會是一個名牌迷,但離奇地,卻是一個產地狂,皆凡購物尤其身在外地,總喜歡很仔細的閱覽內裏嘜頭標籤,假若見到不是Made In China 而係產自一些有型有品味國家的話,貨品將會被劇烈的加分,咁當然,何謂有型有品味國家就很難三言兩語解釋得到了。

是日在西武衫架翻揭恤衫,先看外觀,怪設計靚質地之餘卻又不太浮誇,總之就是低調中暗藏玩味,很合我脾胃。再細察品牌產地,不得了,竟然是Made In Italy,需知道恤衫西褲之類斯文物品若然產自意國又或英倫法蘭西的話,在我心目中係會得到大幅度額外加乘的,所以當下子就對手中恤衫充滿好感了。過了兩關,來到打最後大佬價錢牌,為免出醜扮不經意的在領口位窺探進去,發現價錢由原先摸都沒興去摸的一千八百大元打個兩折來到三百多元,正想暗說一句「吸引喎衰鬼」之際,望望貼牆標示,竟然還有額外折扣!

買兩三件再全單打九折不過是免加一而已,唔夠力;買四五件全單打七五折令整件事情開始變得有點意義;而最後一擊買滿六件即時全單半價可謂衝破個人購物道德封鎖線!原先千八被減到三百餘已經很是滿意,現在買滿六款產品還可額外再來一記半價,在這個連G2000 那個爛鬼Black Label 都要幾舊水一件恤衫的世道,竟然花費百餘就能夠得到一件Made In Italy 的靚仔恤衫,這難道還不是上天恩賜給世人的禮物嗎?

即時將恤衫拎上手免被其他麻甩佬沾污,後還多選一件同牌子不同款但設計同樣有點意思的恤衫,就走開一邊打電話給友達叫其幫手計計數,發現買滿六件真的比任何組合都抵得多,就繼續東搵西找的搜尋一下漏網之魚,走著走著,駭然發覺一堆被半價後的Paul Smith 長襪被擱置在小物欄上,恰好那時前文提到的注重內裝風潮還在吹得山雨欲來,就落足眼力選了四對比較多色彩的揚長埋單去。

望望全單,原價四千多,折合全數才四百多元,很久沒試過科水科得如此舒暢了。

翌日夥同聽到我買得大呼過癮後嚷著要來的友達再臨西武戰地,我故技重施的選了一件打算返工著用的長袖冷衫和一件淺藍色恤衫,友達則選了數枚Adidas by Stella McCartney 產品,結賬又望望那水蛇春咁長的單據,原價差不多萬元,全部折合起來變成九百多,付鈔一刻,差點沒高歌一曲從來沒有這麼爽快過。

走出西武後,倆口子提著一手戰利品,面向I.T. 方向怒吼一句「這才叫做折呀孤寒鬼!」,真過癮。

PS:原打算上傳戰利品照,無奈我的自信心一向都搖搖欲墜很易遭受破壞,若然貼出來後得到排山倒海式負面評語恐怕會影響著用情緒,想著想著,凡事還是有點保留比較好。

6 comments:

酸流流的windy said...

o車~點會有排山倒海留言...咁孤寒應該post出來讓我等謹存的忠心小粉絲研究研究...夜半三更通常恨食個杯麵家下比你搞到恨去shopping添!咁平,吾通西武執笠?
IT...把鬼...減到半價都係貴到飛起,剩係一班藝人至著得起乍~

潤滑KY said...

嘩,幾點呀家下,重唔訓...

點會有排山倒海留言←傷透我心了~~

我怕post出黎的話會有滋事份子「車,咁既款兩草野都冇人買啦kai子」咁,我深信一定有,因為我成日睇完人d 買物post同snap 都會咁諗。
佢果次開倉,係超癲,現場喪多女人掃貨,你地女仕d貴款高跟鞋重平過it牌puzzle d 旺中中樣鞋,等前面兩個中女埋單等左三個字~相比起我很忍得手。

IT 行到好厭,果D假3折令到我更加無心機行~好耐冇0係IT買野了~

仕仔 said...

這篇令人眼前一亮, 等我差d即刻關電腦立銀包去出血之際, 突然瞥到一開首的"前陣子", 不禁心中一個大"噓"聲.

dearwater said...

wei...真係勁抵喎,超級抵,好鬼抵喎,難怪你買得咁開心啦。

潤滑KY said...

仕仔:
哈哈,呢樹既前陣子係六月尾咁上近,
一個月前既事~為期得果三四日,通知都通知唔切了~

水:
堅係抵到最高點~~
我見d女孩子一野買成十對高跟鞋,很是癲喪~
可惜鞋款男孩子就冇乜得揀,唔係我都喪買,
因為我係好鐘意買鞋同褲的。

小瓶子 said...

我响TST返工架, 点解唔早D登出来?????