Wednesday, 24 February 2010

年初一混吉之行。

年初一巧遇情人節,黃昏五點多才甦醒,傻頭傻腦換好衫,就打算先步行至九龍城安頓好五臟,再拐到新蒲崗跟老哥取名拜年實為睇波賀新歲,期間路經近期很熱的Patisserie Tony Wong,醒起自己為人咁摩登,拖盒花街朱古力去拜年好像有欠貴氣,就不如來一記蛋糕作禮搞搞佢。

走入店內,名物Chocolate Truffle 售罄,另一暢銷物Chocolate Rose 則大小俱備,另餘一款餅相不佳,故不作考慮。正猶疑應否入手一枚Chocolate Rose 供我與老哥兩條麻甩佬於情人節分享之際,發現店員正笑容滿臉對著我和身旁一家顧客侍機著。

「唔。」車,又唔係帶件餅去尖沙咀海傍合巹互餵,只不過兩條麻甩佬窩在家裏分吃而已,獨吃西餅的家無人知,就決定來一個小試試。「請問細朵玫瑰花幾錢呀?」

玫瑰花就是Chocolate Rose,以塊塊朱古力砌成玫瑰花花瓣,內裏則以朱古力慕絲作料,予人賣手工之感。

「細朵$108。」店員笑著回答。

我跟鄰旁顧客同樣怔了一怔。

「$108 係細?」我明知故問著。

「係呀,平日$68,今日情人節貴少少,$108。」店員笑著答。

我倒抽一口涼氣,嘗試隔著冰櫃用手比劃著玫瑰體積,我想大概比掌心還小一點吧。由於身邊沒朋友分享我的驚訝,我竟然下意識回望鄰家顧客,這才發現,人家已經消失得無影無踪了。

對於一間不設堂座餅店來說,一件小西餅賣$68 其實已經相當踩界,現在因應情人節還要再加幅五成多,真的有需要這麼過份嗎?

味道如何未試過不會多言,但同店另一被捧到飛起的名物Chocolate Truffle 數星期前就試過。光滑外表賣相靚靚仔仔,奈何朱古力味跟心目中所想的濃郁完全扯不上關係,或許我嗜濃得味蕾都淤塞了,只覺入口朱味普通全然谷不出閉眼微笑享受狀,更枉論甜品入口帶給我那要緊的幸福感覺,加上內裏間隔著脆米餅層,美其名減膩,實則越吃越似雀巢甘脆,個人而言水準相當一般,亦令我對此店平添了半份戒心。

我想我當時愕然得實在太過露骨,店員見狀自顧解釋起來。

「蛋糕都係我地店餅師新鮮Handmade 出來的。」

喂,咪先,又同我黎呢套?難道我樓下那間地踎餅店的忌廉蛋糕是Legmade 出來的嗎?我重申本人並不是「日本蛋同國產蛋咪又係蛋」又或「Ruth's Chris 牛扒同花園牛扒咪又係牛扒」那類差點連阿媽阿爸都會調轉錯叫之輩,但三不五時就彈出Handmade 來抬高身價,事情就未免顯得有點賴皮了。

現在社會漫延著變種Homemade 與Handmade 熱,上年就到過一間潮店看見一件宣稱Handmade 的短Tee 售數百餘元,有點好奇,就細問店員何謂Handmade,結果得出「有専人將拓印壓落白Tee,所以每件製成品都有些微不同」來,喂,你這究竟Handmade 個甚麼勁呀?我意思係,用柴火煲水去沖即溶好立克,真的會較煤氣煲水來得更加出味嗎?

問了一輪,結果混吉收場,真箇不好意思,還是等日後價格回落後才再探探玫瑰花虛實吧。

名稱:Patisserie Tony Wong
地址:九龍城福佬村道74號

5 comments:

牡丹 said...

"Legmade"!! 哈哈哈...
咁嗰啲紅酒呢...俾啲工人踩爛啲葡萄...係咪真係可以叫"Legmade"呀??

潤滑KY said...

牡丹:
西洋紅酒叫Legmade囉,
東洋烏冬某程度上應該叫腳打烏冬,
至於本土竹昇麵,
全名應該叫胯壓竹昇麵。

仕仔 said...

依你既邏輯, 咁由無牙阿婆用咀"梅"走加應子粒核既果d無核加應子咪叫Mouthmade囉. 咦..咁d阿媽用咀"梅"完一輪先餵個仔食果d都係Mouthmade喎.

ps 唔知係咪因為太耐冇出文, 今日想打篇blog文, 搞黎搞去都話網頁有問題, 都唔知搞邊科 @_@

j said...

哈!咁橋我都成日去龍城祭五藏廟呢間餅店最初以為賣手飾添!巧交止啊!

潤滑KY said...

仕仔:
又係岩架,
所以便便應該係Patmade囉,
人呢?
Lovemade囉。
羅美薇呢?
阿May囉。


咳咳...
懶就懶啦~又黎網頁有問題呢套~
老實,Blogger比較穩定,很少出問題。

j:
龍城近嘛,去開有感情,
去得多漸漸會預測到邊間邊類新店會做唔長。

呢間野最初個月我入親去都冇野賣,剩係得reserve,我重以為餅店都不設walkin 咁囂~