Sunday 19 July 2009

九號熱帶氣旋限定。

放假先來落雨係掃興,但天下間最令人倒胃口的事莫過於放假先來打九號風球,原先打算星期日去看《再生號》的,若然到時橫風橫雨的話,要改期了,睇遲陣唔緊要,最大鑊此片大有落畫在即味道,入場恐怕要襯早了。

提起九號風球,忽爾令我記起舊年一件無聊賭搏事件。

事緣舊年某個工作日打起三號風球,有番工的都知道,每逢掛起三號風而邁向八號風的日子,全公司人通常都沒啥心情做野的,本部門亦不倒外,甫朝早得悉天文台宣佈有機會改掛八號風球後,一眾人都好像孔明一樣頻頻聚在落地玻璃前觀天象,意圖觀出一個味來。

我跟相熟的同事K 一邊望著天一邊吹著水,彷彿等收工一樣。

「唔知係咪真係掛八號風呢?」同事K 刨著波經說。

「掛啦,天文台講可能即係實啦。」我對著電腦看著漫畫說。「不過掛唔成就大鑊,我幾份野下晝要交都未做。」

「咁你做完先睇啦頂。」

「唔做住啦,掛八號就唔駛咁趕。」

「不過睇個勢咁大雨,掛九號都有機會。」同事K 收起波經望著天作沉思狀。

「九你個頭,邊有九號風球架!」

「無?梗係有啦!」

「以前係有,但唔知幾時好似取消左啦,八號之後跟住就到九號。」我自信滿滿的說。

「你都痴線,我好肯定有囉。」

「咩而家重有九號風架咩?」我對著旁邊的女同事A 說。

「唔...咁問到,我又好似唔係幾肯定喎。」女同事A 一頭霧水的說。

「無囉我覺得。」我對著同事K 說。「Check 下,賭餐Tea。」

「賭咪賭。」同事K 即時將百元大鈔掟上枱面。「黎啦,上網Check 啦。」

「...咁激動?」老實說,真心淆底,但面子緊要之餘,我一向又很喜歡這種無聊賭搏,就硬著頭皮同樣拋出百元,並用釘書機壓著。「怕你咩頂。」

在Yahoo 搜尋頁打上「天文台」,找到「熱帶氣旋」一欄便Click 了進去,其時我、同事K和女同事A 全神貫注的望著電腦屏幕,感覺就好像在急症室門口等候老婆生產的老公,母子平安嗎?又到底是男是女?總之就很緊張。

結果,當然就是萬歲下午茶收場了。

其實本篇想講的沒甚麼主旨可言,不過見九號風球留在家中悶悶地,就沒頭沒腦的找點東西來說而已,一邊打字一邊看著J2《四葉草2@赤沙印記》,楊秀惠那個嘟嘴樣加上迷人口音,嘩,可愛得不得了,其實以前那個CuteCute 微包樣子我等港男已經十分之受落,幹嘛無啦啦打甚麼Botox 瘦面?弄得現在走哂樣的,夢碎。

順帶一提,先不說抄橋與否,《四葉草碰上劍尖時》確係系列中最佳,當中尤以姚子羚和戴夢夢最得我歡心,前者一副眼鏡扮相,殺死人;到《四葉草2@赤沙印記》已經變得很平庸,只有楊秀惠和陳自瑤有點看頭,《四葉草3盛裝舞步愛作戰》故事更求其得直達令人髮止地步,係有趙碩芝撐場,但胸大本身已經違背本系列賣可愛的原則,犯規囉。

其實以前無線每逢暑假都會有用歌手作主角的劇集推出暑面的,深印象又得我歡心的就有《新鮮人》和《戀愛自由式》之類,但今年卻搞了套頂端廢物的《王老虎搶親》出來,睇了兩三集,內容胡閙得令人噴尿,我想,還是看回亞視的《阿媽發爛渣》好過,《阿》係真心好睇的。

6 comments:

仕仔 said...

我諗再生號我都係要等出碟架喇. 上星期睇殺人犯時諗住一日睇兩場, 明明之前一日上網check哂時間好夾, 點知買飛時先發現減左我要睇既再生號果場, 諗住今個星期睇啦, 點知連場次都冇埋, 變成n咁多個院做哈里波特, 激氣呀. 仲有做既果d戲院d場次又唔啱.

再生號拍得好唔好係另話啦, 但佢探討既提材我係賣飛佛架嘛. >.<

我最有印象係劍尖時, 因為果套d男角以當時黎講係最睇得下既. 果時我覺得李雨陽同蔡淇俊好Ok架(當然仲有高皓正啦!), 仲有阿Race呢, 我係女既都覺得佢Kawaii ne. 點畢之依家全部變哂二打六. @_@
跟住果套個男角係邊個, 講d咩已經冇印象了. 最後果套講馬術學校既我更加冇心機睇, 只記得個女主角扮到好似大S, 而做完套劇就簽左英皇. 冇lu..冇lu..冇lu...真係渣都冇lu...

Betty said...

我阿妈都有睇《阿媽發爛渣》.

仕仔 said...

王老虎係超低能, 簡直肉麻當有趣, 不過有一個位顯得個編劇都幾幽默. 話說一個日本刺青師父在酒家與王老虎有碰撞.
日本刺青師父瞪眼說 : nan da yo !?
醉醺醺的王老虎回應 : 吓, 你又知我飲大左 ?
當時我正正抓左啖飯入口, 聽到後差d噴飯.

除左呢個位, 其他真係可以唔睇.

windy said...

《阿媽發爛渣》...原來套劇那麼多fun我絲打+媽打都係仲買了國內版dvd,不過沒配音要追字幕.記得幾年前係亞視睇過套《金順加油》好長百多集但又幾好睇.


>>而做完套劇就簽左英皇. 冇lu..冇lu..冇lu...真係渣都冇lu...

Why why why pls.tell me why!

袁健健 said...

仕仔:
呵~再生號睇左lu,睇佢真係要有計劃先得,因為場次實在所剩無幾~

劍尖時男角係咪黎諾x呀?重有李雨陽?但李生d 戲真係越撈越回塘喎,睇佢做烈火3,眼神遊離表情生硬,絕對可以用慘不忍睹黎形容~
至於高皓正.....%$%#$%@#$^

Race 直頭超班啦,到家下仍然係得的,但,個人真係極愛當時姚子羚囉,但依家,無啦,絕望啦~
2最大敗筆係搵左司徙瑞祈做主角,唔知點解,佢塊面永恆的漲,個樣真係好似隻狗,睇親佢大頭都忍唔住笑,不過家下都收左皮啦,衰爛賭~
3果套我睇左一集就冇睇,個劇情極端幼稚~

#咦喂,呢個gag 錢嘉樂成日用架喎,先前唔知咩節目佢都用過,我唔小心都笑左~
其實呢種笑位我係受的,但大前提係要玩到好似《皆大歡喜》咁義無反顧~

袁健健 said...

小瓶子+Windy:
阿媽發爛渣係真心好睇的,佢劇情係老土但對白情節寫實,幾有趣的~