Wednesday, 8 July 2009

心情差、思緒混亂下的文章。

話說就前陣子,經唸電影的友伴介紹下,有幸參加一個由數位新晉電影人組職的小型飯局,一直認為這類很業內人士的聚會出席者都特別有理想有品味,難得聚首一堂若然不聊聊拍攝手法的話,相信都會討論一下某某電影的鏡頭運用,結果,席間座談會味道故然欠奉,就連客樣相談室興味亦唧不了半點出來,剩下的,就只有濃濃麻甩風範,真箇令我有點夢想破滅感覺。

我當然不是認為電影人就要開口埋口都講電影,但,都唔駛一班炮兵在茶樓準備北上尋歡咁款嘛?

在這個事前聽落很専業,誰不知現場不過是三四條麻甩佬圍埋喝著森堡啤打爐的草根飯局中,賓客們絕大部份時間都在傾波講馬聊女人,係無問題,而且還很合我河車,但畢竟自身都算半個港產片愛好者,原有話題再引人入勝也好,想想現場人士工作背景,說不定可以八出一點兒鮮為人知的卦,就借勢向他們提出若干關於港產片的話題,而換來的答案卻是,除了上年的《葉問》有入場之外,再來就要數到劉華的《童夢奇緣》,換句話說,原來他們已經有好幾年沒看過港產片了。

「港產片咁差,無咁多無謂錢。」說完,又回到先前的女人話題。

「連同行都唔入場支持,你話死唔死?」唸電影的友伴輕聲在我耳邊說。

當下子我就在想,若然寫部落格是一個職業的話,其他寫部落格的部落友大概就是我的同行吧?那就要在此很抱歉的宣佈,其實我就跟那堆不知所謂的新晉電影人一樣,平日甚少光顧人家部落格。

請不要誤會,我並不是跟那位電影人一樣嫌人家出品差而放棄收看,恰好來個相反,我就是覺得人家的寫得太好令自己有點汗顏而不敢細看。我是一個喜歡將任何瑣碎事都比較一番的人,看著人家部落格所寫的,不期然就會跟自己的比劃一下,又好衰唔衰,跟我聯繫上的總是一些文筆精彩又或富有特別點子的部落格,比較起本部落格幼嫰的用詞和十分無為的風格,自然就高下立見了。愛比較而有鬥心的話,總算得上是尋求進步的源動力,但很無奈,本人個性就是在一些正經事情上缺乏鬥心,想著想著,既然事情做得不夠人家好,就不如甚麼都不去看,自顧自黑箱作業好過。

不過有時我又會想,看得太多好的部落格,或許都算不上是一件好事,能夠從中學到實用知識當然值得欣喜,但若然一個唔覺意連對方寫作風格都一拼吸收進體內的話,就令人很懊惱了。記得好些年前曾經在圖書館借了很多陶傑的作品來看,在長時間被其文筆潛移墨化底下,筆下忽爾間就多了很多類似「晴朗一天之下如夢斷巴黎一樣的臭氣熏天城門河旁有一對法蘭西打扮的文藝憤青扮著嬉皮士公然的享用迷幻K 毒」之類的迂迴不堪語句,當下子唔多察覺,但隔一段時間回首再看,就會驚覺自己原來在不經以間已經成為模仿犯了。

問題當然不止發生在我身上,在悶得發瘋的時候會隨性的在不同部落格中遊走,看著看著,不難發現某些部落友風格用詞類近得好像產自同一條腸一樣,這還不特止,有些甚至連文字中彰顯出來的性格都好像如出一轍,無聊的循著表面證供明查暗訪,很自然就會找出眾人啟蒙者是誰,整個發見過程對我來說是有趣的,但對那些部落友來說,這大概都不能算是好事吧。

說回港產片,自從《神經俠侶》後,對阮世生出品多了期待,雖云其後的大作《天行者》十分不濟,但新作《矮仔多情》走回阮擅長的都巿小品路線理應可以有點作為,遺憾此作搭上本人近代史中最憎的王袓藍當男主角,在不能助長其以為自己很紅的大前題下,只好放棄入場了。

我想,還是等看《殺人犯》和《再生號》比較妥當,至於前述那堆不知所謂的新晉電影人,或許持續無工開是有道理的。

13 comments:

windy said...

乜你心情差又思緒混亂咩?可能熱過頭或者呢排香港冇乜喜事令人開心吧!六合彩又未中,,呢d日子真係幾難捱.
港產片對上一套入場看的是親密.都好耐啦!
反而對你評論其它部主的文筆很有同感,試過看某些部主常用字眼為:古古力呀,好想打人囉乜野呀,記著你的好呀之類,一睇就好有某部主的影子,雖然祇是套用三兩句,但整個部落的文字就如影印般,無論如何都太有copy cat感覺,就好像穿衣服,別人穿得好看但未必適合自己,毫無個人風格祇要自己喜歡就模仿這是某些OL部落給我感覺.根本寫得像個影子.
你模仿陶傑的小農文字笑死左,講真佢的文章應該好易請寫手代筆.

潤滑KY said...

windy:
D字打極都好似唔多順,令我有極想放棄既念頭。

毫無個人風格祇要自己喜歡就模仿這是某些OL部落給我感覺.根本寫得像個影子

嘩,太嚴重既指控喇,唯有搬出「嘉賓發言不代表本部立場」出黎擋擋啦~

哈哈,悶悶地鬧著玩唧,咁佢D都真係好有風格既~光芒太露自然易模仿啦~

windy said...

哈哈!!!太呼之欲出了,你安個防火牆都啱,費事一個吾覺意比人鬧啦!
我又吾係話佢d乜,總之睇部落就如清菜咸魚各有所愛,雖然話開心分享君子評論,但我都明白世上有三個字叫'自已友'.

仕仔 said...

睇你講呢類小飯局, 令我想起曾跟某導演接觸, 咁啱果排佢有份做金象奬的評審, 有五套要佢比分的. 佢竟然問我果d電影係講咩架, 我發現佢原來五套裡面只睇過一套, 跟住佢同另一個同業講, 是是旦旦比分算喇.
資深電影人都係咁喇, 咁何況新晉電影人呢 ?

其實我發覺話港產片差果d人, 一般就根本冇入場睇過套電影就亂咁下定論, 我識既就有好多呢d人. 因為實在有好多呢類人, 所以一感染十, 十感染百, 結果港產片就係咁樣謝哂.

最後, 王袓藍的確係令人卻步的casting, 另外,《殺人犯》和《再生號》又確係令人非常期待的電影.

潤滑KY said...

仕仔:
老油條無火就正常啦,咁我諗住d新晉既入行會有點理想想做番d野嘛,誰不知都係抱住呢種心態,難怪撈極都唔起。

呢個情況存在左實在好耐,無啦,睇場戲,又話港產唔夠西片大製作又話用得唔夠人家多錢,家下又唔係有得回贈,好睇咪得囉~

我都好少因為個演員唔睇套戲,但呢套真係頂唔順~
《殺人犯》隱憂係個導演太新,《再生號》隱憂係韋家輝過往d劣績~

仕仔 said...

但殺人犯個海布宣傳搞得真係好出色, 搞到套戲好吸引咁, 郭富城個樣恐怖到我實在唔夠膽正視佢超過兩秒, 而佢既演技係呢兩年真係進步左好多好多, 所以應該有睇頭既.

導演太新呢個問題, 我諗就算真係麻麻地, 都會有其他野撘得夠既, 我睇佢個trailer d氣氛都好似既ok架wor.

另, 韋家輝套大隻佬咪幾好. 果套電影係長期放在我最喜歡的電影個list裡頭架.

咪未睇就已經擔心定先啦.

王袓藍能紅起黎真係一大奇蹟(如果佢叫做紅的話).

仕仔 said...

又, 我反而覺得太大場面既西片麻麻地好睇, 因為個導演太過専注做大場面效果,而通常忽略左好多感情既細節. 無計啦, 依家好多人入場係為左要睇值回票價既野吖嘛.

windy said...

咁你想睇邊套先?或者邊套對你吸引大d?

個人意見:
好中意殺人犯的故事,但有d怕城醒.
好鐘意劉青雲但有d懷疑個故事.

難揀?

潤滑KY said...

絕對認同《殺》係宣傳出色,我有斗零係因為張海報而期待的~
至於城城,個人計仍然麻麻,唔係話佢做得差,係唔知點解對佢印象一般,可能因為我係好驚果陣成日話自己抽離唔到個角色果種人啦~

我刻意避左條trailer,我確定自己會入場就唔睇trailer架喇。

《大隻佬》《神探》都很鐘意,但我覺得因為有杜琪峰啦,如果係韋單打的話,真有d驚又出現喜馬拉亞星,鬼馬狂想曲之流...
韋實在太鐘意玩反覆同錯摸,成日玩到過哂時間~

哈哈,我成日都會刻意搵隱憂,可以瀉一瀉d期望嘛。

王袓藍紅佢個頭!無記成日都講到個個自己人都「大受歡迎」「全港擊節讚賞」「香港人之模範」架啦,聽到盲目。

咁,求值回票價係岩,但我覺得唔應該建基於套戲成本上囉~

潤滑KY said...

windy:
一定係《殺人犯》先,因為佢上先~
論吸引亦係《殺》,因為佢張海報好有型。

故事內容我就唔知了,我慣性入場前唔做功課的~空白地入場。

唔駛揀啦,睇哂佢。

另,其實另一套《機器俠》我都有點憧憬的,始終劉鎮偉,但知道係國產片後,就好驚了。

windy said...

借左「死亡預告」.電影達人話攞定紙巾...
有冇咁誇張呀?

潤滑KY said...

Windy:
哈~

屋企睇唔知,但戲院睇的話何止紙巾,直頭拎埋毛巾~記得當時睇係全場都傷風一樣索哂鼻,就連我呢類人,都頂唔順熱淚盈框左全場,好強~

其實我有寫過的,但既然你會睇就無謂看那篇文章了,驚穿橋。

浪子mingmanfred: said...

串。得。好。正。囉。連d comment都正(笑)