Monday, 13 July 2009

《殺人犯》。


其實手頭上還有《少女香奈兒》可以寫的,但看完《殺人犯》後,心頭湧起那股怨氣久久未能平伏,無計,唯有將之放上優先席上以洩我心頭之恨。

點講呢,由於星期五看《都巿日報》時稍稍看到了影評人寫了《殺》片結局爛透的文章,所以入場前早有點故事說不通的心理準備,誰不知當來到真兇忽然現身一幕,個人都仍然不太敢相信郭富城的眼睛,我在想,這或許只是導演運用男主角精神錯亂的畫面來混淆觀眾的手段吧,但當兇手一個勁兒不停拆橋並道出對戲中人又或觀戲人都很殘酷的真相時候,感覺就好像在桑拿房焗了十來二十分鐘後,來一個冰水浸浴一樣,醒了,電影頭段再精彩再引人入勝也好,都被這一個出人意表到反高潮的真相嚇醒了。老實說,演員和導演都很出色關係,這電影我是看得十分之入戲的,但自從真相在尾段揭盅後,我真的未能再投入,靈魂極速由電影中抽離回到軀體,腦海裏只不停的想著一個問題:真的沒有別的辦法嗎?

喂,真的沒有別的辦法嗎?故事擴得再大再失衡、情節推展得再一發不可收拾也好,大概都有別的體面一點的收科方法吧?要用這種編劇玩哂的爛橋去當結局,倒不如到最尾才交代散仔黃又南私底下原來上山學過下法,發現整件事其實都係惡鬼要搵替身而殺人啦,起碼可以令往後情節多一絲恐怖少一點荒謬嘛,又或甚至乎演著演著忽然傳來三來聲鬧鐘響音,鏡頭一轉男主角在床上彈起身,跟著望望鬧鐘拍拍心口呼著氣說「好彩係發夢」好過,無錯係十分之無賴,都沒差啦,現在的結局雖然不能說是石頭爆出來一樣毫無伏筆,但其實都差不多沒品的了。

扭橋係重要,但若然真的去到技窮扭無可扭地步的話,還是放棄Special Bonus 將結局務務實實的完成最為恰當,反正這套電影各方面都幹得十分出色,就算結局驚喜不大也好,評分相信都不會低的,總好過現在來了一記為扭而扭的倒盡人胃口真相,就真的很令人反感了。

或許會有人認為這樣的結局是很合情理沒啥問題,但本人而言就有點點被愚弄感覺,礙於怕越講越穿橋,電影結局就在此打住不贅。

我需要強調的是,《殺》片由兇手出現前一刻都仍然是一套十分精彩的懸疑電影,開首第一幕經已迅速帶觀眾們入戲,打後電影節奏明快而拍得極具氣氛,看著城城和一眾警探查案,不知何解竟然令我記起陳年港產片《九九九誰是兇手》又或《七月十四》味道,請不要以為這是諷刺式舉例,想當年上述兩套電影都掀起過一波又一波的數字懸疑恐怖片熱潮的。

入場前被我視為隱憂的新導演不單止沒有問題,而且還把《殺》拍得很有味道很有迫力;此片可謂郭富城獨演之作,全片很大部份時間都在刻劃男主角的心路歷程,城城幹得很稱職,尤其喜歡結尾近乎發癲的轉變,邪氣十足,不過想起此片跟前作《三岔口》、《父子》等角色性格都好像差不多的壓抑,看來城城都走唔甩這種角色性格的了;此片綠葉很多,當中除了張兆輝和錢嘉樂外,其餘的都沒甚發揮可言;特別想提一提擔演男主角妹妹的何超儀,何小姐不論演戲或唸對白皆很生硬,因被城城命令不准外出而起少爭執一幕甚至令我不小心小聲笑了出來,這令我有點擔心彭浩翔新作《維多利亞壹號》會否被她拖垮;戲中後段忽爾出現城城企石望海擺甫士動作,很有型,但感覺突兀,我不是那種看戲時喜歡以笑惹人注意的觀眾,但都按捺不住笑了出來。

就整套電影而言,《殺人犯》是一套很可觀、令人有驚喜的電影,奈何內裏藏著一個壞透心的爛結局,才令不滿指數由零一下子彈昇破頂,再精彩緊湊的都傾刻間被掩蓋了,這種由山頂一下子好像坐跳樓機一樣跌入深淵的神奇電影,可謂帶給我前所未有的觀映感受,想起來,真令人有點無奈。

意見欄含結局內容及劇透,只適合已觀賞此片人仕觀看,未看而打算入場的請勿誤闖。

18 comments:

小瓶子 said...

我都想睇.

仕仔 said...

"《殺》片由兇手出現前一刻都仍然是一套十分精彩的懸疑電影"

-- 好同意. 當在中尾段揭盅誰是兇手時, 而編劇又竟然用呢個原因, 我是笑了出來.

如果叫我給這套電影一d評語的話, 我實在係無法做得到, 因為我星期六看完之後, 至今仍陷入迷惑中, 心想點解編和導可以咁樣編? 真係唔怕比人笑(或小)嗎 ? 我唯一可以想到既原因係因為佢地完全為左要令觀眾估唔中誰是兇手而編成咁, 咁不擇手段, 咁樣扭盡乾坤, 真係無話可說.

唔知你覺唔覺得,當揭盅左誰是兇手, 個兇手之後個樣同表情好似做左CG咁, 如果無既話, 咁個演員都幾勁.

城城既演技我反而係失望的, 因為佢完全唔識收, 好似某一幕(有人未睇, 所以費講邊幕啦, 但你睇左應該知), 城城不停大叫"我冇呀, 我唔係呀", 我個心即刻打左個突, over得太緊要啦.

你講得好啱, 佢已經走唔出呢類角色了.

不過話時話, 呢套野係咪都有人會覺得好睇呢? 我同個友人去睇, 以前同佢睇戲, 佢唔係話睇唔明, 就話唔好睇, 但呢一套佢既然話ok -_-" 仲同我不停研究劇情, 仲話個結尾咁樣鋪係會有續集云云.

潤滑KY said...

小瓶子:
唔好想,買飛睇啦,
不過comment 就唔好睇喇,廢事穿橋。

仕仔:
我都有笑,不過係苦笑,我甚至到後尾重妄想住果個唔係真兇,只不過係城醒精神錯亂~

我睇完戲食飯時個頭係搖到甩咁滯,我係痛恨套戲其實一路都拍得好好的,點解死0係一個咁戇居既地方上,我甚至覺得個結局係一個惡搞,係編劇刻意玩你班友的。

我唯一可以想到既原因係因為佢地完全為左要令觀眾估唔中誰是兇手而編成咁

有點保留,我最有興趣知係究竟諗左結局先定諗左劇情先諗結局,無理由無啦啦諗左呢條橋的,我思疑佢諗左呢個結局覺得有趣,先慢慢推展個大網出黎。
如果真係的話,呢個真係惡趣味。

我諗應該係CG,個嘴等等都郁得好怪~不過講開條死仔,個樣由頭到尾都好乞我憎(主觀地題外話)

我都覺OVER 左,同埋我覺得呢D SOLO 片對城醒黎講好危險,因為會令佢好自覺要SHOW 演技,以城醒個性黎講,極度危險~

其實佢由浪漫風暴開始都係呢類~

喂呢套野係好好睇架喎除去結局的話,我散場時偷聽D觀眾講好多人都話好,結局反倒無收到投訴喎

講起結尾果幕,老土到呢,我真係比佢吹Q漲...
不如寫住「待續」啦頂!!

潤滑KY said...

又,其實呢個兇手我係有估過的,因為提示很明顯,但我很快就剔除左,因為根本就不合乎參賽資格~
只可以講,呢個結局係又茅又無恥~

仕仔 said...

"不過講開條死仔,個樣由頭到尾都好乞我憎"

---唔只你, 我由一開始都唔鍾意佢, 到揭盅時, 先意識到佢咁既裝份原來係有原因既.

"喂呢套野係好好睇架喎除去結局的話"

---就係因為個結局, 令到我覺得套戲唔好睇, 呀, 正確d黎講, 應該係話我唔鍾意呢套電影. 打個比喻, 一個靚仔當街撩鼻屎, 咁靚仔依然係靚仔, 但我唔會鍾意佢囉.

其實呢個兇手我係無估過係佢架, 只係覺得佢古古惑惑咁啫, 而o係套戲裡面, 個個都被安排得古古怪怪咁, 所以都唔覺d咩.

"我甚至到後尾重妄想住果個唔係真兇,只不過係城醒精神錯亂"

---由個兇手開始解畫時我都係以為城城精神錯亂得好交關, 所以產生了幻覺. 但當佢越講越多時, 我心裡面暗罵了一句"有冇搞錯"呀 ? 跟住佢越解畫, 我越有套戲變調成科幻片既感覺, 好彩最後冇.

我諗套戲最大問題係因為佢整體黎講唔協調, 咁當然啦, 從另一個角度去睇, 咁樣鋪又真係好爆既, 同埋會帶起好多討論, 至少我都忍唔住要o係度發表一下我既感受. 總之就係令人生氣啦. >.<

仕仔 said...

不過要數最好的一幕, 我個人覺得應該係一開始, 個鏡頭pan住去, 然後"砰"...., 跟住泰哥想撐起身, "啪"... 那一幕好震撼, 作為第一幕, 真係處理得好好.

聶秀康 said...

哈哈...城醒...ky真係越來越搞鬼!
我未睇,但想講一下郭生,自從三x口,父子,c+揁探郭生個表情大概都沒改變過,可能得了兩界金馬影帝演技對他來說是很重要的,我就是很怕那種刻意的面目猙獰過份為迎合角色而太over的出...
說遠了...好似個結局令你們好想打人啊!

潤滑KY said...

聶秀康:
其實我覺得城醒一生人都好似係做緊戲,一直都擔演緊舞台皇者同磁聲王,這個人比我感覺很不真實,我諗藝人中最似機械人選舉中佢一定入三甲,所以我一向唔鐘意佢~

如果你怕呢味的話,《殺》未必適合你,因為呢套係好solo,好攞獎feel既電影~

至於個結局,如果套戲係出自古羅馬時代的話,電影導演和編劇很可能已經被群眾亂石掟死了。

#講開影帝,我一直認為佢憑《三岔口》拎到影帝係不實至名歸,可能因為當時套戲比左好大失望我;而荒謬之最則係阿sa憑《戲王之王》拎影后,痴筋~套野內容差到九彩。

拉遠左添。

潤滑KY said...

越來越戲透,未入場的唔好再睇落去了。



仕仔:
"唔只你, 我由一開始都唔鍾意佢, 到揭盅時, 先意識到佢咁既裝份原來係有原因既"

--真係,呢個角色真係要搵個有咁樣衰得咁樣衰既0靚仔去做,今次呢個,選角極之正確。

不過真係好少見一套戲個結局可以差得咁緊要,可以令一套原先有八十分以上的電影,一野撻落到個位分數,如果佢想拎呢d討論位,佢嬴~

"跟住佢越解畫, 我越有套戲變調成科幻片既感覺, 好彩最後冇."

--我何止心罵,我直頭講埋「喂你唔係咁都當係呀嘛」出黎,可想而知我係幾咁激動。
我都覺得結局變調到面目全非,我果刻以為自己睇緊娃鬼回魂系列。

單計結局的話,似彭氏兄弟果科野囉。

#第一幕的確係得,令人迅速入戲兼明白套野係咩類型片~

Hana said...

我好少入戲院睇港產片,其實哩套戲係港產片來講己經算好睇啦!如果個結局唔係咁嘅話。

城城演得用力過度,好揼佢吃力。

唔明點解總警司和佢老婆要講國語,而啲同佢對笞的人又照用返粵語。

一開始見到個細佬戴假髮就估佢係凶手。

如果話個凶手係佢老婆(因為憎恨佢累死親生仔?)會唔會總好過依加咁?

windy said...

嘩!乜咁熱鬧呀..睇完呢篇覺得係寫得好到題簡直一針見血,係我睇過你最精彩的影評!要讚下.
講開城醒我都覺得佢係機械人,佢既老死chilam話佢淨係識食潮洲菜麻辣火鍋打士碌架玩跑車其它就乜都吾知.拍拖識女仔係好正常事都成4張野重要庶庶掩掩無尼大方,又諗反起n年佢係澳洲被人捉姦,係未為左呢單野對佢影響好大所以收埋自己做舞台王者重要好似係紀香的世界級靚女至配同佢暴光撐枱腳?諗諗佢真係好宅男.
其實近年我好似未睇過佢的戲.可能對他的評論有點偏頗,講到尾太刻意經營的所謂投入角色對我來說就是造作.
此戲的編劇是位新進女編劇啊!

仕仔 said...

哎, 我已盡量克制, 點知都係唔覺意劇透tim.

潤滑KY said...

Hana:
呢套的確係好睇,但搞個咁既結局來黎,一切都玩完~

"城城演得用力過度,好揼佢吃力。"

--城醒向來都係用錯力的人,呢套演心理問題人仕,合哂佢河車~

至於國語呢個問題,自從合拍片充斥巿面之後,如果唔太離譜的話基本上我都接受的,《殺》黎講算好收歛喇。

"一開始見到個細佬戴假髮就估佢係凶手。"

--為估而估唔計啦,佢個動機基本上就唔work,太茅啦成件事~
我都覺老婆殺好過,雖然大把人會估到,但大前題都係唔應該為要人地估唔到而做個結局出黎...

Windy:
佢捉姦之前都係咁硬派舞者架啦,應該唔關事~係佢個人好自覺係明星~(我覺得)

仕仔:
出左紅字警告,唔怕穿橋lu~

Anonymous said...

竟然俾健健講中晒我心中所想
睇到凶手自白果一刻
我有諗過:係咪城城既幻覺?
會唔會係城城當時已經精神崩潰
於是,所有身邊既同事/屋企人/朋友(咁打唔算穿橋吧? =P)都信唔過......?
之後,編劇證明我錯晒

認真講句
如果唔係同女友睇
我一早已經爆左粗
轉身同個friend出戲院食tea!
(唔好徙我時間!)

其實我覺得個結局係俾我地哩d普羅大眾估得到的還好~!
扭橋唔係每一套戲都岩用
試問天下間有幾多套「鬼眼」(Sixth Sense)?
同一個導演,拍另一套「不死刧」(Unbreakable)
咪同樣仆直......

成套戲優勝在氣氛凝造
可以話頭果5分鐘(都可能冇)已經令你想睇落去
會睇到城城點樣被懷疑、被愚弄....

Yuji

Anonymous said...

有人話就係為左睇下佢個結局有幾爛而入場喎!點睇呀?

nobody said...

唉!! 我同朋友一道去睇. 開謎底的時間大家都啞掉. 不敢相信可以有個如此爛的結局. 好好一套懸疑驚慄片變成一部 '笑' 片. 真係... 劇本壞事.

不過想落, 套戲都有幾多笑位:
- 何超儀的 gag;
- 丘凱敏做的木獨醫生;
- 個細路不停叉手叫 '爸爸! 爸爸!'
- 城城望海;
- 個細路望海 (臨尾個幕);

最最令人失笑的是係手度刻字...

小糖 said...

因為睇左哩套電影又咁岩睇到哩篇blog,搭搭訕先~~

雖然好多人都勁講個結局,但我覺得佢出黎個效果好犀利,真係人人都講緊哩套戲啊,我身邊朋友幾乎個個都走去睇 (果種虛陷法有點像周星馳電影),票房勁收! 散場時都聽到好多人話「好好睇」~

對於結局,我其實接受到,但揭露手法真的有點搞笑.... 嗯,個編劇跟《不能說的秘密》是同一人,很難怪會有「鬼魅奇幻」感覺~

總括黎講,我覺得都值得入場! (續集也會看~)

潤滑KY said...

Yuji:
女友0係隔離都可以照爆粗嘛,
呢d先叫man ~XD

無名氏:
同編劇一樣,錯左的心態。

nobody:
刻字果part 真係好爆,我真心希望佢係刻待續囉,有喜感嘛~
好過刻咩報仇,九唔答八。

小糖:
呢套戲真係受歡迎,連我呢篇濕柴文都積左咁多意見。

咁樣的確係引到d唔睇港產片既人入場睇個結局有幾爛,短線獲利,但長線計更攞命囉,唔睇開的睇左個咁既結局,就會諗"都話港產片始終都爛架啦",令佢地更堅信港產=爛既觀念...

佢個觀念其實係咪錯呀?唔係應該拍得好而吸引人入場架咩?

如果真有續集,我都會睇,但我很有興趣知佢個定位會係點。