與MJ無關的悼念MJ對談。

女同事M 放假，意味著又係我出場替位的時候，對上一次都講過，有些事情就係，若然閣下毫無怨言的接受一些不屬於自己工作範疇內的活兒兼且還要幹得妥當的話，無錯係會得到唔怕蝕底的風評，但亦會換來比較多的工作量，就好像今個星期，經過一連串的無薪假後，就連我呢類閒到十個不行的冗員之王亦有堆積如山文件要處理，正想埋首工作，又接到替位指令，以致無法完成自己份內事，可謂顧此失彼，但無計，這裏的生存方式就是這個樣子，要麼落力幫手成為自己人，要麼拒絕要求永世被打入冷宮，要食飯還是要性格，就要當事人慢慢參透。

姓盧同事C 就是前者，同事C 又名阿根，性格溫馴而為人隨和敦厚，所以縱然人唔多醒目，在咩都肯做及擔當被戲弄角色底下，仍然得到老細器重，說器重好像有點過譽，應該這樣說，起碼未被淘汰囉。阿根身形亦如其性格一樣，肥肥矮矮圓咕碌，加上理了一個和尚頭，都係果個形容詞，敦厚，總之一望就知係快樂老實人啦。

就在這個全城都忽爾跟MJ 很熟的星期，本部門亦不例外，久不久就會出現兩三個關於MJ 的話題。

「尋晚有冇睇MJ 追思會？」阿根甫返公司坐了不久就問，望望，一身黑恤衫黑西褲造型，假若邊行邊撻火機的話，形態就跟浩南差不多，比較可惜係圓潤敦厚版。

「有，睇到三點幾。」其實我所謂的睇，不過係對著電腦久不久望望電視而已。

我對MJ 最深印象除了其經典月球漫步和身體傾斜四十五度外，就是曾經在世嘉五代推出過的MJ 遊戲，此遊戲講述MJ 穿著招牌全白西裝邊行邊打喪屍，而絕招就是《Thriller》的舞步，使出時喪屍會跟著一起跳，隨著最後的「噢」一聲，喪屍全滅，想當年這隻遊戲難度極高，係會玩到人掟手掣的。

不要誤會此文又係忽然向MJ 致敬的產物，其實我想講的是，MJ 對我人生毫無影響，認識佢都不過是因為電視遊戲而已。

「我都睇到三點幾，好攰。」看來阿根是真心擁躉，事關佢真係嗡得出MJ 很多舊有歷史的。

「唔怪得一身黑恤衫黑西褲啦，原來想向MJ 致敬。」老細助手A 就坐在側旁，所以亦加入搭訕行列。說起此人，為人好像不錯但又有點令人摸不透，普通相處的話當然無問題，但若然遇上重要機密，還是對其慎言比較好，以免惹禍。

「唔係啦，咁岩唧。」阿根為人較為怕醜，說了關於他打扮兩句後就打響退堂鼓。

其時做運輸的如常每日到訪收貨，由於大家共事已經很多年關係，還算傾得兩嘴的。

「好熱呀出面，成身汗。」運輸員B 邊抹汗邊說。「嘩，阿根你重著黑色恤衫？」

「無啦，廢事燙嘛。」阿根靦腆的說。

「係鬼，悼念MJ 嘛，佢咪模仿MJ 著黑恤衫囉。」助手A 笑著說。「佢都係岩岩先除左頂帽咋嘛。」

想起阿根敦厚形態卻配上MJ 造型，眾人不禁失笑。

「係啦，頭先佢返工開門都係Moonwalk 咁行入黎。」我吹水說。「你睇，佢重著埋白襪。」

說完後扯扯其褲腳，勢估唔到真係著用純情白襪仔。

「哈，睇黎你都真係好迷MJ 喎。」運輸員一邊笑一邊拍著其膊頭。

「佢連名都改埋黎致敬添。」

「咩名呀？」

「人地叫MJ，佢叫M 根～哈哈哈哈！」

眾人大笑後，又回到工作崗位了。