疏懶。

放完悠長假期重投工作懷抱，恍如隔世。

所謂悠長假期，其實並不止於辦工室無聊雜務，當中就連日常興趣習慣亦肆意放軟手腳撤手不幹，追開的日劇停了將近兩星期沒去觸碰，睇慣睇熟一直跟開的網站日誌悉數不相往還，最大鑊連自己吊著鹽水勉強營運的部落格亦錄得史上最大單月持續不出 Post 紀錄，等死一樣將一切生活習慣拋諸腦後拒絕諗野發白日夢，感覺不空虛寂寞之餘，竟然越懶越爽感覺別有洞天，原來懶慣，真係好難返轉頭，返工等炒格郁都唔願郁，部落格有字可打又唔願付諸實行，廢人一樣。

唔係我自暴自棄，而係今個假期節目編排得實在太豐富充實，先來一趟東方威尼斯四日三夜上海之旅，再來一個三日兩夜濠江賭場消遙遊，起勢短線旅遊慳水慳力，放假歸放假、休息歸休息，精神狀態比朝九晚五日月無光生活更為差勁累人，完全失去放假差電這個終極深層意義。

多假焗放無計，但若然有得揀，最理想放假模式並不是一刀切連氣放十日八日的歸隱型長假，正常人假放得長銀根又鬆動的大可選擇歐遊過過癮，但我呢類人，兩三個鐘頭航程已經需要透支一年份量勇氣去克服定驚，所以假放得長，對我來說著實有點多餘，亦因此才會衍生出前述玩盡兩海的畸形旅程，你估過大海真係慳到水慳到力？行廟睇教堂上健康教育堂的當然無損荷包厚度，但賭場消遙遊並唔係鬧著玩的，我敢講，雙海遊水腳洗費合計可能已經夠去一次日本機票連食宿了。

一星期大假後返工令人加倍沮喪懊惱，所以理想自製半長假首推連著周休二日日子，當中尤以星期一為佳，原因簡單不過，既可享受星期五全人類好萊迪心情工作輕鬆，又可免卻星期一重投工作漫漫長路等放假之苦悶抑鬱，食盡兩家茶禮，何樂而不為？能夠計盡縮數去換來自身一種「賺左」心情，跟捐窿捐罅偶爾執到平價荀貨一樣令人心曠神怡，慣用正途等價交換的富家子弟係唔會明白箇中樂趣的了。

假放完，相信無三五七日都難以調節好心理時鐘，但其實調好了又如何？到六月尾我又有一段更長的長假要放，到時一切又要還原基本步，重新適應過來。