Tuesday 27 April 2010

早餐的抉擇。

經過早陣子一段暴飲暴食風潮後,近月反樸歸眞很想令自己吃得健康輕盈一點,想了想,中午一餐反正食住家飯,成份斷估比較健康無需刻意改變,就決定抽早晚兩餐出來感受一下苦行僧悲壯情懷。

早餐要食得健康,第一時間會想起一系列麥類物體,上回健康風潮時我就揀選最為經典的桂格紅罐即食麥片作主導。先執一大堆似粉非粉麥片入紙杯,再用滾水泡它三數分鐘,禮成,相當簡單易做。打開蓋、嗅一嗅,製成品不單冒出微微不尋常怪味,就連長相質感亦黏黏稠稠猶如異形分泌物一樣,此等理應只存在於外太空的杜蟲食物,現在活現於眼前之餘,竟然還要將之強塞入口,簡直慘絕人寰。

呢味野,搞幾日倒還勉強耐得住,要持續兩三周甚至兩三月每朝不停連環放送,我差點沒吃得即席表演噴射式嘔吐。

直到一個天朗氣清的早上,壞著心情對著此等健康身體但吞噬靈魂的精神科食物,流著熱淚想通了沒可能食垃圾食足一世的大道理,回頭是岸,逃之夭夭放棄收場。


今次再赴巫山,主打仍以低脂健康行先,放工走到超巿細心比較一下各類麥類產品之營養列表,經過千錘百鍊,終於選出箇中心水選擇。


據包裝盒顯示的戰力分佈圖,不論糖份、脂肪以及鈉,Weetabix 皆在眾多同類產品中含量最低,加上盒底標明每餐只需食用兩大碌即夠能量維持半晝,方便簡單唔駛下下用量杯左度右計,合乎本人懶惰成癮個性。

先將兩碌堅挺麥棍置於碗內,加入冰凍雀巢脫脂鮮奶浸泡至麥棍完全軟化並自然散開即可食用。一匙入口,由堅挺麥棍幻化出的白濁麥皮入口軟腍,喜歡咀嚼的則可將浸泡時間略為縮短,由於殼物含量達九十多巴仙關係,吃完一碗大致上可鎮住上半晝身體飢餓訊息,假若配多一顆蘋果或一根蕉,飽肚感將會更強更勁。

健康從來不會與美味成正比,Weetabix 自然很難稱得上為美食,尤幸成品不存在怪味怪質感不致令人抗拒食用,加上伴著冰凍鮮奶很易入口,整件事演繹起來自然就沒生吞即食麥片般百九幾種滋味在心頭。

若然閣下是朝心情極差急需美味食物來潤澤味蕾重穫人生樂趣,請捨棄脫脂奶換上一記百福燕麥低糖豆漿,但緊記一個金科定律,世事萬物都係有因有果循環不息的,香甜豆漿所換來,就是加倍糖份和脂肪含量。若然還嫌事情未夠放縱,請換上維記特濃低脂朱古力奶,濃郁朱奶浸透著麥片口感,屬心太軟的輕淡早餐版,美味到無話可說,但都係果句,美味與健康/瘦/纖/幼/弗/靚/索永遠背道而馳。

Weetabix 作早餐這個習慣截至今天已經持續了兩周,體重有否轉變我可以好果斷向大家宣佈係無!事關平日省著吃捱到周末周日一個屈尾十又好像逃離地獄又折返人間般大魚大肉吃個稀巴爛,這種半調子的健康生活,試問健康之神又點會出力眷顧?

7 comments:

Betty said...

keep 到已经很好了.

Anonymous said...

第一次留言。hello

我而家都食緊呢d早餐, 但係真係唔係好頂得到肚餓~同埋脫脂奶味道怪怪地,唔知你覺唔覺。

袁健健 said...

小瓶子:
我明,
所以依家個情況係唔多好囉...

Ahyung, etienne, louisa, yungsuethung said:
嗨呀,
名字很長~

我覺呀,就好像健怡糖一樣,食物一脫脂一健怡就有怪味,飲落口就知唔方健康得去邊~但既然只有「難食但功效較佳」和「無咁難食但功效較差」選擇,就不如豁出去選前者好過了。

上晝還可以,夜晚的話我通常會夜dd 啪多條soyjoy看門口。

Crystal said...

男人老狗....估唔到你都食呢d做早餐。
做多d運動好過啦。。。呵呵

三隻耳朵 said...

Weetabix...以前英國時長期食,在那些荒蕪城市當時又無財無選擇的情況下,巳是較能入口的了,講真,係有效用的祇是要有恆心,另外還有一種mini版會當零食,久不久重口味後來個清清腸胃還是不錯的。

袁健健 said...

Crystal:
哦?咁錯蕩呀喂~

關鬼男人老狗事~要食就要食架啦,
做運動需要莫大恆心與時間,我後者大把,前者就所餘無幾。

三耳:
食一款就算了,但唔知食得幾耐。

DOUBLECHIN™ said...

wheetabix是我的長期戰友!! 得閒試埋muesli, all bran 同 toasted oat! 都好健康!