Wednesday, 21 April 2010

《月滿軒尼詩》。


吸收了上回看岸西處女作《親密》經驗,我刻意避開放工後極度疲累的恰眼訓高峰期,等到週日時段養足精神才走入場看《月滿軒尼詩》,誰不知結果出到來,感覺又沒預想的緩慢平靜悶兮兮,令人喜出望外。

雖云喜出望外,其實又並非喜到會推薦親朋好友入場的地步,始終這類描述男與女和家庭之間日常生活的小品電影,天生就很難具備令人擊節讚賞天賦才能,能夠做到偶有佳句已屬值回票價,假若看完後可以令人產生共嗚更堪稱執鸁之作,至於《月》,我想大概就只有前者再微微多一點點的本事罷了。

既然片名以灣仔軒尼詩道作主打,電影場景自不然大多取材自灣仔一帶,不過說來奇怪,自問對此區熟悉程度達至偏高至甚高水平,片中亦不時以具灣仔特色建築物作事件背景,但看著湯唯跟張學友不時周旋其中甚至乎置身茶記吃撻嘆茶吹吹水,不單沒有絲毫熟悉感覺,就連理應可以品嚐得到的港產風味亦古怪地幾近淡而無味,究竟是演員在演繹環節出了岔子,抑或是導演在拍攝方面未如人意?若論地區特色風土人情,還是N 年前同樣在灣仔取景的《神經俠侶》顯得親切動人惹人投入得多。

《月》故事相當日常,除了覺得男主角性格不合張學友形象、湯唯樣子清秀可愛非常吸引眼球、鮑起靜犯了得獎後演戲過份外露又或出力太猛的通病以及李修賢沒外間講得那麼出色神化之外,實在不知道還可以有甚麼值得去寫去講,一套清淡沒亮點的電影,相信過多一頭半個月就會從腦海慢慢淡出,不留下半點雲彩。

一連兩星期先後看了《歲月神偷》、《志明與春嬌》和《月滿軒尼詩》三套港產片,個人認為甚有六七十年代粵語殘片、九十年代尾《百分百感覺》類青春片和新派無為電影三分天下之氛圍,整體質素不俗,若然加埋沒入場的警匪片《火龍》、港式科幻《未來警察》和已告絕種的陰陽路式鬼片,堪稱港產最撚手類型片強勢列陣,令人不禁對港產片重燃半點希望。

緊接還有《葉問2》、《維多利亞壹號》和《飛砂風中轉》,還望港產盛世可以再持續多個來兩個月吧。

8 comments:

雪梨天使 said...

唔係喎,火龍係出人意表地好睇,黎明今次幾ok。好睇過月好多。

潤滑KY said...

其實我唔介意入場,但睇完三套後《火龍》都差不多落畫,加上無人肯陪我睇,所以被迫放棄。

怪就只怪同期對手太強喇~

VANESSA said...

HELLO,睇過你之前d blog,見你話補購過{milk x},想請問邊到可以補購返?thanks!

潤滑KY said...

VANESSA:
考起添,我連自己寫過都唔係好記得。

VANESSA said...

上年4月20個篇,我係yahoo search {milk x補購}search 下search到你個blog。「...就到HMV 買了數本時裝雜誌及補購了三本《Milk X》來惡補一番...」你記得既麻煩話一話我知呀!唔該晒你!

仕仔 said...

終於睇到一篇話《月滿軒尼詩》麻麻地的影評了. 真有他鄉遇故知既感覺呀.

瑪嘉烈 said...

文章已連結到
http://www.hkifflink.net/2010/04/23/5509/
多謝。

潤滑KY said...

VANESSA:
記得,我搵個frd 幫手買的。

仕仔:
下?呢套好多人讚架?
唔係話佢差,但有咩讚得落口?

瑪嘉烈:
再三感謝,
但電影節不是完了嗎?