Monday, 12 April 2010

外賣反擊戰。

近日家中兩老外遊,在公司過著集體叫外賣生活。由於本部門向以麻甩佬居多,外賣清單自然以飯類作主導,但正所謂外賣午飯食得太多,越會想食返餐麵先感安妥,於是上週某日,我們一團六人決定叫餐麵清清腸胃。

叫麵的話,我們只會選擇三多,三多一門有三傑,分別為鵝腸、水餃雲吞及牛脯,前者雞腸居多虛有其名,試過一次就沒再叫,後兩者卻實至名歸。水餃雲吞個人一向視為同宗,故算為一類,兩者同樣蝦爽肉鮮材料多,一隻包起約莫拳頭大小,蝦肉多得基乎破瓜而出,啖落相當具滿足感,雖然有報導顯示現代人忽然間紛紛投向堪稱古法的細粒雲吞懷抱,但老老實實優雅午茶吃細蓉還總算可以嗒出韻味,但為充飢為快感的話,還是大粒到掟死人的巨蓉合個人脾胃。牛脯煲得入味軟淋夠火候,若然好手氣抽到瘦肥七三分位置,一啖肉一啖麵再混點辣椒油渣,實為仙人食物,所以水餃牛脯麵分湯上是我的心水例牌。

不過,連童話故事都需要奸角作配襯,試問現實生活的美好事情又怎可以一梳梳到尾那麼盡如人意?

「今次我唔叫呀,個外賣阿姐成日屈我叫油菜。」女同事A 對著外賣紙說,其實這個問題過去她已經向我反映了無數咁多次。「又唔係叫唔夠數,真係煩。」

「你唔叫最多搵第個叫,問題係有冇咩辦法可以懲戒下個阿姐?」同事B 問。

「最多都係唔屈服唧,又可以點樣懲戒佢?」女同事A 一臉無奈的說。「唔通鬧佢咩?」

「你估我唔想?驚佢加料先忍口咋。」同事B 生性比較粗野,出自其口說服力比較大。

「呢,查實我有個好低能的企劃諗左好耐。」自從知道這件事後,我就著手擬定了一個很無聊的報復方案,可惜一直都找不著機會公諸於世,現見刻下民怨四起,看來蜜桃終告都有成熟起來的時候。「如果有人肯付出油菜同三拼麵食費用,我有方法可以挫挫佢銳氣,應該咁講,起碼會食得開心點。」

同事B 聽了講解後決定擔當善長,計劃亦告即日出台。


十一點屬叫麵時段,六條人圍坐於電話前準備欣賞好戲。

「你地唔好聚咁埋啦,搞到我淆底。」由於構思者傳統上會比外人更抓得到事情癢處,是次計劃就由我親自上陣。「同埋你地一陣唔好笑,我驚自己會笑埋一份。」

「唔笑喇,打你就打啦。」同事B 口口聲聲唔笑,但圍內五條人悉數不期然的暗笑著。

我按下掦聲器,鍵入電話號碼叫外賣,那邊廂響著「嘟嘟」電話聲,看著跟前五條人一副不知有甚麼好期待的期待模樣,連我自己都差點笑了出來。

「三多。」同事A 跟B 聽到聲音後,表示目標人物出現。

「唔該,叫外賣。」我移開電話筒呼了啖大氣後說。

「講啦。」傳來一些揭紙聲音。

「一碗鵝腸麵,一碗水餃牛脯麵湯另上,一碗雲吞麵,兩碗水餃鯪魚球麵。」我對著外賣紙唸著,不知怎的覺得事情越來越好笑。

「要油菜啦,要兩個油菜啦。」阿姐真的又再施展屈功。

「呀,漏左一碗。」我說,周遭五條人開始「咔咔」的摀住嘴笑。「一碗餃脯菜麵。」

「下?咩話?」

「餃脯菜麵!」四周頓時哈聲四起。

「三拼呀?」

「係呀係呀。」第一波笑點捱過了,接下來我又可以順利過度嗎?

「要油菜啦,要油菜夾下啦。」阿姐總喜歡叫人要油菜。

「油菜?」聽著我扮驚訝的聲音,五人強忍著笑意。「有冇芥蘭菜呀!?」

「呀?」阿姐頓了頓。

「我問叫油菜有冇芥蘭菜呀?」身邊五人又再「哈哈」爆笑起來,慶幸我及時掩著電話,才不致復仇計劃曝光。

「哦...有呀。」

「咁唯有要啦。」

「要兩兜啦,你六碗野六個人食,要兩兜好架喇。」越仁慈越比人踩到上顏面,現實世界就是這樣麻木不仁。

「但係我有碗加左菜架喎。」其時圍內五條人攤伏在桌上漲紅著臉,準備迎接著最後一擊。

「邊夠食架,叫多兜菜食身體好呀。」

「有冇九兩菜呀?」五條人好像水庫放洪一樣剎那間悉數「哈哈哈哈」的爆笑了出來,我明白這實在低級趣味到極點,但不知怎的,我就是很喜歡這類老土諧音笑點。

「你講咩話?」

「我問加菜果度有冇九兩菜呀!」

「鬼知咩,廚房執咁上下咪灼囉。」

「咁要啦唔該。」留下地址,及時掛線,六條人就好像傻子一樣,暴笑得五體投地無話可說,其他部門同事看到,都不知我們在笑些甚麼。

大半小時後,我們對著跟前六麵兩菜,又再爆笑得欲哭無淚。


很無聊,真的非常無聊,而我也不想這麼無聊,但這就是我生活構成其中一個部份,想否認也否認不了。

13 comments:

素顏天使™ said...

頂你,後面我真係笑左。

雪梨天使 said...

老實講,我睇第一次都唔明笑咩。睇第二次先明,好低能。哈哈。

小瓶子 said...

睇唔明哦, 可否解释一下?

潤滑KY said...

嘩,個POST有兩隻天使留言...

雪梨天使:
哈哈,我都覺好低能,
所以先公諸同好,
遲下有個重低能,得閒再打~

小瓶子:
竟然唔明?
我只有諗過唔好笑,無諗過會唔明喎。

這裏一向不設導讀,無計了。

詩白爾 said...

你班人真係好無聊,但又幾好笑~ =]

said...

除o左讚好,我冇o野好講…﹗

Jester said...

朋友, 小心比人尋仇.
下次叫外賣因住加料 =='

素顏天使™ said...

兩隻天使 <---天使唔係斷隻計架喎!

潤滑KY said...

詩白爾:
其實係得我無聊,
佢地陪我癲而已~

齊:
哈,我鐘意讚好文化。

Jester:
我好少叫飯,話之佢~

素顏:
天使個量詞梗係隻啦,
一係就條~

Anonymous said...

咁都俾你諗到,餃腩菜,九兩菜,哈!我成日以為你凈係諗野稀奇古怪,其實你係真才子。有點口賤,但係好好笑,除了話你勁,沒話可說!

sonrisa

潤滑KY said...

sonrisa:
嗚哇!才咩鬼子~~千析唔好咁講呀~
求求其其吹吹水作樂而已,
比人見到笑到面懵呀~

Anonymous said...

你係既!你係既!唔駛面紅喎!
sonrisa

潤滑KY said...

哎,唔係面紅,
係面懵樣衰噁心作悶想嘔吐~

此post已完~
呢d咁痴線既野真係唔好再講了~