Thursday, 29 April 2010

母親節前夕的迷思。

老媽年歲半百有多,鑑於年輕時以製衣為生,閒時仍喜歡遊走大街小巷買衫購物,每當搜尋到心水戰利品,總會向我炫耀宣示,以收虛榮之效。老媽愛購物,不代表對品牌名店有認識,莫說年輕新晉品牌,就連陳年老牌亦多只聞樓梯聲響沒見過真身,更遑論會對新出款式有所認識了。

在某年某日,曾經發生過一件小事令我久久未能釋懷。

週六,心情不佳,選擇窩在家裏發白日夢,其時老媽滿臉笑意提著一袋二袋從外歸來,甫進門放低隨身物,興高采烈表示剛在長沙灣購入心愛物品,並嚷著要拿給我看,我微微點頭不置可否,繼續對著電視發夢。

老實說,當下子我真的沒甚麼心情研究老媽入手之物,始終她屬於黑底人士,不論衣衫鞋襪皆黑字行先,週一新衫與週三和週日的同樣黑漆漆,局外人實在很難看出個所以來,無計可施下,大部份時間都會回一兩句「幾好睇」「唔錯丫」來胡亂敷衍過去,老媽聽到了,自然不會再說下去。

老媽將購入的手袋掛於手臂興奮向我展示,瞥瞥,今次入手有別於過往暗黑作風,白底配色搭襯不規則圖案甚為醒目,但總覺得熟口面,仔細點去看,才發現箇中圖案蘊含兩枚重疊洋字:LV。

在長沙灣街頭購入的LV 若然不是老翻貨的話,我願意一命賠一命,以警效儆。

冷語告訴老媽這是LV,而且還要是老翻LV,她先是征了一征,後提起手袋邊小聲「係咩」邊細察圖案款式,表情慢慢由雀躍變為落寞,並「哎呀,我買時重以為係普通手袋」「而家都唔知重用唔用好」地浮現出尷尬苦笑,我冷眼望了望,「比我就唔會拎假野出街囉」就沒有再說甚麼,只依稀記得老媽最後滿臉依依不捨對著手袋左拼右看。

翌日,我在垃圾箱發現老翻LV 手袋影蹤。

我對著跟前被置於垃圾堆中的老翻手袋,呆然不懂反應。

最初不是好端端一件高高興興覓得心頭好,繼而開心雀躍分享成果的美事嗎?怎麼最後竟會落得如斯收場?老媽在短時間內由興奮莫名演變成無奈愁緒又到底是甚麼一回事?道理上我沒有做錯,但這就代表做得妥當嗎?為甚麼就不可以體諒一下美言幾句?心情不佳是很難忍受,但有需要叫身邊至親同樣難受嗎?這種結局,難道又會有甚麼得著嗎?

無數問題在腦海內來來回回反反覆覆沒間斷的不停纏擾著我,去到盡處,還差點就滴出淚來。

到現在,我依舊不喜購買或使用老翻的人,惟獨只有老媽,她用甚麼穿甚麼我永遠讚好,或許是盲目了,甚至是愚孝了,但其實只要不是不孝就好了。

9 comments:

Anonymous said...

You are a good boy ... buy your mom a genuine LV this year on Mother's Day ...

Anonymous said...

陳年舊事,你也不必太介懷。表面上,你無啦啦向老媽潑了一盆冷水,實在十惡不赦。但想深一點,伯母是一個老實,樸素,快樂的大好人,她應該不會介意的,大概她很快就忘了。你不如想想下星期如何跟你母親慶祝母親節吧!
sonrisa

Anonymous said...

其實我阿媽都好鍾意買衫亦都會成日係我面前試衫問我好唔好睇, 但佢成日都係我睇電視既時候行來行去問我, 我都會好似你咁敷衍了事, 睇完你篇BLOG都我要鍚返我阿媽多D先得...

李小龍私生女

Anonymous said...

buy her a real one :o)

素顏天使™ said...

買個真嘅送比佢啦。

牡丹 said...

母親照顧仔女都係細心,不過亦都係"big-heart",相信佢都唔記得呢件事..
母親節再逗佢開心多啲啦!

潤滑KY said...

無名氏x2 & 素顏:
佢鐘意個款唔係鐘意名牌,
佢收到唔會特別開心。

sonrisa:
呵,尋晚搶先食左喇~

小龍女:
我媽又係好鐘意0係我睇緊日劇或打緊字既時候同我講野,所以我好明你感受。
唯有不時警戒下自己唔好太衰聲氣。

牡丹:
咁我媽一定唔會記住,
其實不過係一件小事唧,
係我將件事諗得太深入。

xe said...

都可以諗番所謂名牌的意義
對知者就係名牌
對不知者只是圖案
價值同意義
有時可以好簡單

三隻耳朵 said...

非常明白伯母祇喜歡那圖案,至於如果你買她名貴包包,可能會肉痛你花錢,不如讚助旅遊較實惠!
我阿母通常係我上網睇電視雜誌時來電..而娥,通常會開speaker讓她暢所欲言,偶爾回答兩句嗯,係咩,知到,得啦!就搞定,多例牌膚衍...可見做仔女的都係...唉!
你好乖啊!咁快興祝?