Tuesday 30 March 2010

《志明與春嬌》。


粗口對一套港產電影來說原來真的有著起死回生作用,就以《志明與春嬌》為例,若然所有粗口對白皆以和諧手法從新包裝的話,《志》將會迎來災難性閹割,不能在觀眾跟前展現雄風抬起頭來。

我當然不是那種一聽到電影內出現粗口就有理無理極度亢奮之輩,但無可否認,今次《志》片確實將粗口運用得得心應手,甚至到達可以令電影中度加分地步。尤記得彭導上回《出埃及記》已經用過同一手法製造話題,但《出》那段爆粗對白極度堆砌之餘張家輝操起上來還嚴重不流暢,聽落突兀之至,效果殊不理想,今次彭導吸取經驗後在《志》捲土重來,並以無需顧及形象的綠葉主力操刀粗口部份,終於收成正果。

以粗口論演技,楊千嬅表現可謂極度疲弱,全句對白無啦啦就係得個「撚」字被加重音調,刻意到無話可說。除去粗口,楊在其他方面亦不見得有啥佳處,大頭時眼神依舊遊離,唸對白不合周邊氛圍,當中尤以電影首段楊跟眾角色圍爐煲煙一段最為明顯,綠草們興高采烈對答如流對照著楊甫出聲換來寒冷勢頭,總之她的一舉一動就令我感到強烈格格不入違和感。

余文樂頭數幕打爐情節其實都演得很拘束,托賴來到後段重拾佳態才開始自然起來,總算不落赤字分數。肥佬綠葉實屬整套電影一大驚喜及亮點,對白精警抵死之餘還演得相當自然令觀眾尤如親歷其境一樣,相當討好。向來得我歡心的徐天佑有份客串便利店職員一角,可能戲少關係,他在《AV》內令人抹一把汗的駭人演技不復見之餘,彭導還慷慨了一個爆笑位在他身上,總算有點安慰。

要說《志》是一部長片,我更覺它是《破事兒》的變奏版,表面乍看傾力經營由吸煙而起的緣份故事,但拆掉包裝打開盒蓋,內裏其實主力販賣彭導自身無聊趣怪生活點子及囤積腦海的精警對白,那些鬼話連篇、陰毛夾手扼及街邊賣貼紙之類詳盡但對主線沒影響的描述,壓根兒就只為展示編導獨特見解而設,對整個故事並沒甚麼幫助,或許有人會覺得取巧,但我卻認為這是彭氏風格,無傷大雅。

作為彭擁護者,見《志》能夠洗去其近年越來越參展的拍片風格走回港產小品賣橋路線,實在可喜可賀。而緊接《志》片,彭氏另一大作《維多利亞壹號》亦將會在四月尾粉墨登場,此片由最討我厭的何超儀擔演女主角,有見及此,還是不要抱太大期望比較好。

12 comments:

仕仔 said...

但我都幾期待《維多利亞壹號》, 雖然我都唔鍾意何超儀.

講開《志》片的粗口, 楊千嬅講粗口當然"UN"耳, 但我覺得講得黎唔自然兼令人討厭既果個係張達明, 我覺得導演真係應該搵D流利D既演員黎演會好D.

又, 我其實唔明點解因為粗口多而令呢套片變成三級片, 依家D細路講粗口仲流利過片中主角啦其實.

袁健健 said...

我點止唔鐘意,直頭憎添~
如果唔係彭導同Juxo...我掂都唔會掂~

楊爆粗真係勁un耳,我始終覺得佢唔適合做戲。至於達ming,諗下先,係有突兀位,但可能佢出得少,我感覺又冇咁強烈喎。

粗口係一個原因,煲煙多可能都係一個原因,上次《出埃及記》爆粗無三級被當宣傳又可能係一個原因。

至於「依家D細路講粗口仲流利過片中主角啦」,呢科野真係好難搞,流利同應唔應該將佢合理化又好似係兩回事~

仕仔 said...

哈哈, 你真係講得有道理既.
你鍾意天佑, 我反而鍾意又南, 因為佢個樣好特別, 但論做戲好睇, 就天佑好D, 我覺得天佑都幾有前途, 聽聞佢好似仲會做導演, 唔知有冇記錯...
講開又講, 聽聞打擂台好好睇, 且六月會上, 好野 !

袁健健 said...

查實我鐘意shine,所以兩個都鐘意~
但我反而覺得又南好戲d喎,天佑一有近鏡眼神又係好遊離架,可能佢《av》演出太令我刻骨銳心~令我記左幾年都重記緊~哈哈~
佢做導演我都好似聽聞過,
比我既感覺係:恐怖。

打擂台係極度期待,我相信我會搶閘去睇,因為呢套早上早落既機會極大。

又講開又講,呢排好多戲睇,睇唔切呀~~

仕仔 said...

冇既, 當林家棟都做監製既時候, 天佑做導演可能ok呢...哈哈.

一時之間睇好幾套戲其實都幾辛苦, 有d消化不良既感覺. 呢排套套戲都好似要趕o係復活上, 我又鍾意第一時間睇, 所以都冇咩辦法要迫埋一齊, 對我黎講, 最好就係一個星期睇一到兩套, 咁就最舒服喇.

袁健健 said...

林做監製都係劉華叫先試唧,
我諗佢未必真係想既~

我通常一星期一套,遇岩多戲就兩套,
多過兩套會覺得用得太多時間,好似成日都不見天日咁~
我反而又冇咩睇頭檔的欲望,如果我想睇果套係好多人睇要撲飛的話,我係可以等到熱潮冷卻哂先入場的~

瑪嘉烈 said...

你好,我是香港國際電影節網上連線筆記的瑪嘉烈。你的文章已連結到︰http://www.hkifflink.net/2010/03/30/4498/
如果不想被連結,請到上述網頁留言。多謝你的支持。

浪子m: said...

咁撚搞笑既,hkiff hyperlink~~

袁健健 said...

瑪嘉烈:
噢,歡迎之至,感謝。

m:
套片hkiff 今年有播嘛,
通常有寫佢播的都會link~(我估)

浪子m: said...

我都有寫, 但無link我

這個機會不是屬於我.jpg

素顏天使 said...

肥佬綠葉 = 司徒慧焯 = 舞台劇導演o黎o架佢係~

袁健健 said...

素顏:
原來如此,
佢真係超搶戲~~