Tuesday, 2 March 2010

《全城熱戀熱辣辣》。


點講呢,唔...

若然「全城熱戀熱辣辣」屬於中學會考中文作文科內其中一條自選題目的話,《全城熱戀熱辣辣》相信會因離題或文不貼題而得到不合格分數。

全球持續暴熱下所引發的愛情故事意念來說相當有趣,奈何電影內並不是每則故事都能夠借題延伸出一個令人熱辣辣的愛情故事,張學友跟劉若英屬箇中最為有趣部份,井柏然跟楊穎亦成功以暴熱天氣開展出浪漫清新愛情橋段,謝霆鋒與徐熙媛一段故事性則只屬一般,餘下兩段除了角色們一律渾身是汗外,基本上與天氣完全談不上有任何直接關係,本人深感遺憾,若然在故事大橋上加插更多因暑熱才能催生出的緣份,相信會看得人更稱心滿意。

除了背景與故事不貼題,以愛情電影來說,《全》亦稱不上成功。雖云全數故事皆以愛情作主調,但奇怪地全片就只有井跟楊那段故事予我浪漫愛情感覺,其餘故事記事多過記情,感受不到內裏蘊含著任何甜蜜味道。故事以斬件久唔久講下形式進行令觀眾投入感降低捉不到那份愛戀情緒是原兇之一,但最大問題首腦必屬大部份故事皆有欠原整性,當中尤以由段奕宏擔演攝影師那段最為求其無謂,一夜變盲,忽然尋人,無端愛上,搵戲黎做得無說話好講,試問這種沒鋪排急就章的愛,教我如何被感動?

電影乍看慘被我蹂躪得溶溶爛爛,但事實上,我又吹脹地頗為喜歡《全》喎。

故事不太對題,但台前幕後傾力演出加上輕快配樂產生出的化學作用卻令整套電影變得清新有看頭。據報《十月圍城》被譽為謝霆鋒從影以來最佳演出,看畢《全》內謝極搞鬼巿井小動作又不失型格演出後,《十》請移玉步,我認為《全》才是他打破框框之作。張學友跟劉若英演出一貫稱職無剔可挑,就連不寄厚望的楊穎和素未謀面的井柏然亦出奇地可愛討好,令人喜出望外。

前文提及斬件述事手法令人無法輕易投入故事,但正因為這種手法,才令箇中平淡故事可跟有趣故事梅花間竹相互制衡著進行,衝淡了要一氣過硬吞二十分鐘無味故事的悶人感覺,一來一回有得有失,正反雙方算係打成平手。

總括而言電影浪漫感覺一般,背景設定有趣但未能脫角,但整體氣氛年輕有活力,看得人舒舒服服賞心悅目之餘,散場後一身清爽,恰巧跟近日全城潮濕濕立立天氣有若干相剋作用,可恨此片安排在極寒農曆尾檔上映,熱戀再戀得熱辣辣也好,票房都慘被低溫吹得凍冰冰了,假若此片能夠排在夏天檔期上映的話,消暑效果將會來得更強更勁。

最後要向蘋果作出重大投訴,此報在毫無預警底下肆意爆出《全》部份友情客串名單,弄得原先充滿驚喜的威力都被大幅減半,所以話若然套片大家係老早預計會入場的話,宣傳影評預告片還是可免則免,否則未入場就知道《全城熱戀熱辣辣》有張曼玉客串演出,沒驚喜了。

3 comments:

小瓶子 said...

哈哈..你都爆埋一份.

said...

我仲諗住去睇, 因為預告片給我時尚唔老套的感覺呢.

當日睇到蘋果日報踼爆果下野我都同你一樣好嬲, 心諗都唔知係咪大整古....套片.

說到謝霆鋒, 其實我有時唔係好明點解成日俾人針對, 雖然說有時演技浮誇了一點, 但佢果隻努力同搏命真係唔係人人有, 我本身幾鍾意睇佢的, 同埋佢d歌到依家我都覺得好聽架喎, 唔唱歌真係有o徒 (也許相戀這條路....)

潤滑KY said...

仕:
要睇好快,就落喇應該~
雖然套野滿有缺點,但整體氣氛感覺搭救,
個人計都幾鐘意~起碼好過阿凡達囉(我覺得)。

咪係,眼見隔離左右見到張曼玉充滿驚喜「咦?」左幾聲,自己就老早知道一點期盼都沒有,覺得係蘋果欠左我一個驚喜囉。

霆鋒我鐘意呀,又型又認真搏命~佢d戲我通常會捧場~
佢家下其實都有唱歌,但面向內地,唔岩香港人聽啦~佢以前面向香港果d歌真係幾得,不過家下佢都放棄左香港巿場,始終,錢又唔係搵得多,又無人尊重,點解重要服侍我地?