Friday, 5 March 2010

簽個名支持下之煩膠。

袁健,雄性,一頭電腦白痴,前陣子家中某電腦用品瓜柴,呆然木立苦無頭緒,遂相約有點電腦底子之B 小姐到黃金幫幫眼順便飯聚。

相約六時半,六時已到達深水埗地鐵站,此處以人多空氣混濁馳名,袁健不想四處遊蕩,決定移師高登前空地靜心等候。正當凝望著天空等得近乎出神之際,一名年約三十多女子忽爾來到跟前,究竟所為何事?

「先生,簽個名支持下。」又黎喇,繼環保和滅貧後,這已經是袁健今個月內第三次遇到的「簽個名支持下」活動,他活了廿多年人,真的從沒有想過自己的簽名會對香港甚至乎整個地球那麼重要。

簽個名就環保了,簽個名就滅貧了,以後都沒有人會努力工作了。袁健心裏想,所以他從沒試過努力工作。

「唔喇唔該。」袁健望望該中女,瞥見其手上提著印有某政黨標誌的「支持爭取普選」簽名表格後,就耍手搖頭微笑回絕。

「點解呀?」中女彷彿早有被拒絕的準備。「簽個名支持下啦。」

「真係唔駛喇唔好意思。」袁健再一次鄚重拒絕後,重新望著那個灰灰的天空作沉思模樣,中女眼見跟前男子那麼作狀,沒再說甚麼,就揚長而去。

袁健頓頓足發著呆,臨近入定,中女竟然再出現在眼前。

「先生,反正有時間,點解唔簽個名支持下呢?」中女一臉疑惑對著袁健說。

「我冇時間喇唔好意思。」袁健有點抵受不住。

「簽個名支持下啦,好快咋嘛,簽個名支持香港實現普選啦。」

「『簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下。簽個名支持下』」...

「啪!」不停的「簽個名支持下」,令袁健大腦內部深處某尚未崩壞的部份其中一條主神經線被強行爆破掉,其向來波平如鏡的心理狀態隱隱翻起了一小道暗浪。

「唔簽呀,真係唔簽呀。」時值潮濕暑熱,再好脾氣的都要拋錨,何況袁健呢種人?「查實我反對添得唔得呀?反對有冇另外一張紙簽呀?」

「唔駛咁燥,你都應該係八十後,但點解唔支持下?」中女上下打量著我說,其言論卻令我更加火滾。

「即係八十後就等如支持?即係貓一定只可以食魚,如果食肉的就一定係豹?」袁健微笑著說,但事實上已經水滾得近乎乾水,不過他仍努力維持著穩定,因為他知道,發嬲就輸了。

「我唔係話你,但點都會有個原因架嘛。」

「我覺得香港人唔夠政治常識囉,我覺得全香港最低限度要有多過80% 人分得清區議員同立法會議員有咩分別先有機選到賢能囉。」袁健不知何年何日看了一份調查,就隨著微燥情緒胡亂噴了出來。

「好多人都分得到架喎。」中女說。

「你個圈子有學識嘛,咁我個圈子弱雞,咪十個有八個分唔到囉,好衰唔衰佢地個個都係香港人,咁咪唔OK囉。」袁健望望錶,都已經三十五分了,為甚麼救星還沒來到呢?

「肯去學肯去了解就會明架啦。」袁健心裏頭叫的那幾聲救命,差點就由喉嚨深處傳了出來。

就在這個節骨眼時候,B 小姐終於粉墨登場,從地鐵站緩緩踱步到面前。

「等你好耐呀大佬~」袁健尤如遇見再生父母一樣,並對著中女說。「唔好意思你說服唔到我,拜拜。」

就在袁健打算別過頭去,跟B 小姐昂首步入黃金之際,中女一臉沒好氣搖著頭說:

「年青人關心多D 社會問題國際大事啦。」

就走了。

倆口子對望著,一臉茫然。

袁健就在這種情況底下,無情情被陌生人教訓了。

6 comments:

said...

原來我跟你的"政見"(如有的話)是相同的.

呢種"簽名支持下"的活動真係越來越密集。我又發現一個現象, 就係呢d工作人員越來越有質素, 唔似以前被人一野拒絕就唔知點好。話說有一次我離遠見到一個"簽名支持下"向我步近, 咁我未等佢開口我已經灑哂手等佢識趣啦,點知阿"簽名支持下"不但冇打退堂鼓, 仲笑哂口咁話, 多謝我揮手迎接佢過黎.. -_-"

素顏天使™ said...

呢篇係近期之佳作,笑鳥。

Anonymous said...

不過袁健個理由好唔合理。民主選舉並不是要選賢能,而是選意識形態。除了虛無主義者之外,意識形態係所有人或有或少都有,而且有些人有很強的意識形態而完全不知道。

潤滑KY said...

仕:
哈哈~你遇到果個真係高招~
不過街頭果d確實係進化左,有時好難應付~
反而街邊保險黨就容易左,因為佢地無進化仍然只靠「阻你三十秒啦」同美色行事。

無名氏:
你有你道理,
但袁都唔係無道理,各有各睇法啦,
佢既意識形態係,實際d啦。

ICe said...

我都係唔支持普選既人。
咁下次我遇到有人同我講: 年青人關心多D 社會問題國際大事啦!
就等我幫袁健報無情情之仇啦!

潤滑KY said...

ICe:
嘩,麻煩哂~見到幫我盅佢兩搥。

但先旨聲明,本部落格不會為閣下之行徑所產生出任何刑事或賠償問題承擔責任。