辦公室恐怖故事。

睡眠充足精神飽滿，沿路上班從容不迫眺望萬里晴空，唔，天朗氣清實在令人心曠神怡。甫回公司應付著輕量工作，對著電腦邊幹邊上網，悠然自得。

每日過著穩定而沒負擔生活或許欠缺火花，但請容我在辦公室高呼一句：C'est la Vie！

不過，

你有冇諗過幸福並唔係必然呀？

序章：襲來。

「今日唔係好多野做咋喎。好，等我快手搞埋佢，好讓我輕鬆渡過小週末先。」我對著電腦說。

整定一樣，電腦一開，電話就響起。

「老細早晨。」大人物朝早來電，非奸即盜。

「袁健，同事M 一陣會上黎幫手。」老細以強硬口吻宣佈這項突如其來的決定。

「下？幫手？」沒東西好幫但仍有人來幫手是其次，最重要係。「同事M！？」

若然大家不知道同事M 是甚麼，請參閱前文《其實這樣算不算應酬? 》。

「係呀，佢上緊黎。」老細如是說。

「但，無電腦佢用喎呢樹。」我嘗試作出垂死掙扎。

「得啦，你安排野比佢做啦。」就掛了線。

說時遲那時快，我驚魂未定、冷汗未來得及抹，房門在毫無預警下就被緩緩打開，一陣陰風亦隨之扯入房內。

「早晨呀，袁健。」看著同事M 從門外慢步步入並只露出半邊臉的詭異笑容，雞皮不禁自故地狂豎起來。

工作間，從此將不得安寧。



第一章：叮飯。

工作間就只有我和男同事L，而我們倆皆常備住家飯盒作午膳之用，忽爾來幫手的同事M 則沒攜飯習慣。

「咦？你地兩個都有帶飯呀？」同事M 看著我們從抽屜拿出飯盒就問。

「係。」請不要怪我連尾音也懶得發，當同樣無聊透頂的應酬說話每日都要被問上兩三次的時候，你就會跟我一樣連寒暄戲都懶得去交。

「哦？袁健你個飯真係好細盒，夠食架喇？」同事M 探頭望了兩望然後問。

「夠啦，差不多啦。」這次有尾音，但其實上面那句應酬說話每日都會聽到一次或以上。

「你呢種盒係咪入得微波爐架？」食飯時間真的不太想講無謂野。

「梗係入得啦，唔入得的話家下個廚房著緊火啦。」每次跟她作出對話，總能隱約感受到大腦深處未崩壞部份有某種東西慢慢流失，依我估計，係智慧。

「會著火咁厲害架？」

「係呀係呀，難道你覺得佢會噴水？」

「哈哈，咁個盒最熱可以有幾受熱？」

「鬼知咩大佬，我都係用黎叮個肉餅飯食唧，駛鬼理佢係咪可以深潛二萬呎咩。」

「深潛二萬呎？邊有人帶個飯盒潛咁深架？哈哈～」

「你都識講，咁你話邊有人會理佢最大受熱架，斷估都唔會叮飯叮足幾個鐘啦。」

「哦，即係叮幾個鐘個盒就會溶呀？」

「......」

神呀，救救我吧！



第二章：波仔。

家中兩老過大海日子，我會選擇到樓下波仔入手數枚飯盒作打後數日午飯之用，是日我就準備了咖喱雞飯。

「咦？袁健尋晚屋企無煮飯呀？」每日都是差不多的對話。

「係呀係呀。」

「果盒咁得意既？咩黎架？」

有點莫氣，我提起波仔包裝盒作投降狀。

「下？波仔黎架？哈哈哈哈～」同事M 甫見紙盒，就爆笑起來。

「笑咩呢究竟？」見到同事M 對著我將會放入口的飯餸嚎笑，不解之餘，還不期然火滾起來。

「波仔唔係細路仔先食架咩？」同事M 笑聲開始放緩。

「我食波仔喎，唔係食糊仔喎大佬！」

「糊仔？糊仔都好有營養架。」

「......」

如果有神，相對時為何未阻止不幸？



最終章：天氣。

「個天真係怪，頭先朝早返工重天陰陰，家下又好好天氣喎。」短短一個上晝，同事M 已經第三回提及關於是日天氣的問題。

「係咩。」自從同事M 搬來後，「係呀係呀。」和「係咩。」等頹爆回話從我口中出場次數急增七成以上。

「係呀，返黎時好似想落雨咁，坐左陣望出去，咦？竟然陽光普照喎。」她不停地說。

「係咩。」我感到怒火燒得又紅又旺。

「咩你無留意架？」

「你估我孔明呀？孔明都係夜觀星象唧，我日光日白成日望住個天把鬼呀？」容忍有個限度，數日以來長時間的疲勞轟炸令我按捺不住火起上來。

「孔明係咪即係諸葛亮呀？」

「係呀！！」

「咁關夜觀星象咩事呀？」

「......」

我沒說甚麼，只倒抽了一口涼氣，去到盡處，呷一啖咖啡，緩緩望向窗外景致。


天氣清朗，但我卻感到密雲。