Thursday, 12 November 2009

高級日本料理師傅進駐連鎖快餐店。

話說某朝打算到MX 以最低金額享用早餐,見餐牌所示芝腿、腿蛋等治類物不連餐飲合$13,以對下餐蛋治連熱飲則$19,就決定只要一客餐蛋治算數。

「早晨,請問想要咩野?」店員打著機械式招呼。

「唔該,一個餐蛋治拎走。」一邊落單,一邊從散紙包掏出$13 碎紙。

「餐蛋治,請問餐飲要咩?」店員啪著收銀機說。

「唔駛喇,剩要餐蛋治唔該。」我答。

「多謝你十六蚊丫。」

「咦?十六蚊?」我收回準備科水的手,一臉疑惑問道。

「餐肉要加三蚊。」店員木著臉說。

「哦...」

Canteen 點燒臘飯選燒鵝或燒肉需另加五蚊,MX 三文治含餐肉則另加三蚊,美氏集團都很喜歡這類奇形怪狀的收費。

口以出,都無謂再改,就試試$16 一客的餐蛋治有何曉飛之處。

鐵路MX 所生產食物素來都好像從垃圾堆填區搜刮出來一樣,油淋淋餐肉和十五成熟煎蛋被預先製成數百塊堆在鐵盆上,店方甫接Order,即在云云餐肉堆和蛋堆中執碼,看著跟前為數過百被堆積如山的肉蛋,我在想,這些物體真的可以放入口嗎?

餐蛋治沒有獲得豁免,店員收到餐票,就從右側一大堆三文治中取了一個遞到我跟前,我接過後,捧著微暖餐蛋治就急步往公司方向走。

到底MX 餐肉有甚麼底蘊需要客人另加三蚊才能夠享用?這個謎團由我步往公司,登上昇降機,以至回到公司斟著咖啡依舊揮之不去,我實在再耐不住強烈的好奇心,甫回到座位,就急不及待打開膠袋一探餐蛋治虛實。

一看之下,乖乖不得了!原來MX 從高級日本料理店挖角,請來了専業師傅進駐中環鐵路MX 店作當店大廚!

本人向來很討厭美氏集團兩大出品Canteen 和MX,但當親身見證到MX 竟然如此有誠意専程請來日本料理系刀手加盟,而且還要保持低調沒有大鑼大鼓向外宣揚的時候,我今天終於知道錯。

孤高情操最易令人感動,按捺不住,即時提起我那部只有一百三十萬像素的手機,將跟前料理長一番之逸品拍下來,以茲記念。



這個角度或許未能令世人見識得到師傅出類拔萃的惱人刀功,我懷著有怪莫怪心情大膽拆開完美製成品,試試換另一個拍攝角度去彰顯出師傅高超技藝。



我以人頭擔保,上圖真係唔係咸牛肉蛋治,更加無可能有台灣豬肉紙蛋治在坊間發售,此物確確實實係一份充滿Detail 位的餐肉蛋三文治。據我多年來飲食經驗所得,能夠以利刄將午餐肉片至薄如蟬衣、包肉合一境界,荒天下恐怕就只有在日本取得河豚烹飪證書、並精通薄切透光河豚刺身的老師傅才能充份掌握得到,鐵路MX 這位顯然做到了,MX 今次沒請錯人了。

高薪從料理店挖角回來的大廚,當然不會只有非凡刀功那麼門面技藝,只要一覽跟前這份餐蛋治全豹,就可以輕易想像到師傅還曾經深造過Teppanyaki 好一陣子,以至在簡簡單單一份三文治裏,亦嘗試提供Teppanyaki 這種另類食法。



唔駛講,很明顯就是鐵板鵝肝 x 餐蛋治的Fusion 食法,否則的話,又怎會用上方包作索油之用?當然,索油後的麵包係不予食用的,否則麵包空白部份就不會這麼大片。

名廚不愧為名廚,一邊吃一邊佩服得噴淚流涕。

總括來說,$16 一客餐蛋治還不含餐飲表面上確實有夠高價,但付出一點就能夠嚐到名廚手藝,我個人就覺得相當超值了。

11 comments:

Jen said...

um.. MX簡直係「平民版米芝蓮」,用心良苦將法國菜 X 日本菜 X 港式早餐,辛苦晒囉!

Anonymous said...

有名堂o架,呢啲叫"燈影餐肉"。市面上常見嘅係燈影蛋紙,餐肉係第一次見。

有一次見到叉燒飯嘅叉燒上面竟然有一浸"電油嘅彩虹色"(唔知你明唔明我講乜 XD),成為駱駝背上最後一根稻草,自此杯葛美心MX。

maruko

潤滑KY said...

jen:
MX 打著「窮人都有權享用特色美食」來製造食物,情操高尚令人感動,
有咩辦法唔向其脫褲噴尿致敬?

maruko:
燈影唔夠矜貴喎,都係走番河豚條line有叫座力d~

呢d咪叫畫出彩虹囉,你應該鄧個師傅開心,
佢終於可以出人頭地喇~

卡臣 said...

咁有誠意!
願美氏集團
生意繼續興隆

詩白爾 said...

你做咩勾起我果杯雪櫃味紅豆冰o既回憶?

其實去珊瑚、平衡木、CanteenMX等等高檔劣食.....不如去茶記。(不過唔知你邊度人士,好似金鐘果D鬼地方係連茶記都冇!)

Chung Ming Yan said...

haha閣下的entry本來已經很funny, 但一看到最後一張圖我立刻笑左出來! 一向做CD-rom都忍不住留個言!

潤滑KY said...

卡臣:
只要懶人未絕種,美氏一定長做長有。

詩白爾:
唉,有得揀的話,
我又點會晨咁早做呢d傻事情~?

Yan:
我揭開一刻成個人嚇呆左~

唔好CD-ROM喇,閒時多D留言啦~

Anonymous said...

canteen芝腿治+飲料=$18(冷熱飲料同價)乃大x樂出品,相比閣下之mx日廚刀工實在很有良心之作,或學藝未成?

ps,其實七仔出品也很不錯,祇能以冰冷的芝腿治為例,熱辣辣餡料滿滿的餐蛋治還是老式茶餐廳為王道。

w

小瓶子 said...

笑到停唔到!

Anonymous said...

我兩年多前去MX 叫o左個接近四十蚊o既鐵板豬扒餐, 去counter 攞餐時, 當場呆o左. 所謂豬扒餐, 得一塊半豬扒不特止, 而且比一個廿幾蚊o既普通豬扒飯o既豬扒更細更薄.

而跟來既薯菜, 得6-7條短短既薯條...我難以接受下即時發難,叫佢換過, 佢都係係咁意加多少少.

自此之後MX已入blacklist..

Anonymous said...

thanks for share........