Friday, 13 November 2009

揀位的法則。

人生在世廿幾個寒暑,只要平日多加留神、注意多點生活細節,事情再微細也好,總會自自然然培養出一套哲學出來,就以搭車揀位這種日常事為例,每人都應該有一套獨特法則。

全架巴士空無一人座位任揀的話,若非短程路線,下層座位率先會被全數淘汰,皆因自己擁有一副很易頭暈頭痛的鄉下仔出城體質,坐在下層重心就好像被壓低了一樣,容易造成身體不平衡狀況,增加暈浪風險,不宜選用。

跳上巴士上層,車頭三行共十二個座位享有正前方開揚景致,風水玄數角度稱為大旺大富之局,理應納入射程範圍之內,無奈只要加入行車安全考量,這三行先天性就會被蓋上不予錄用水印,需知道假若一個不幸遇上幾車迎面相撞,首先串演巴士飛人彈飛出車被炒得全身骨折身亡的很有可能就是車頭乘客,加上前座向來都是豆釘酷愛位置,豆釘坐巴士普遍都很嘈很煩很討厭,為免因跟細路大打出手而見報,避之則吉。

身體有右傾習慣,惟恐行車其間會不自覺貼近鄰人,面向車尾右手邊全數座位只會作第二選擇。

左手邊從樓梯開始頭三行盡可能不會選坐,一來Roadshow 熱播太吵耳,二來大大個電視合哂視野很難不望它兩望,但望多幾望,行車期間過度用神又會加深頭暈風險,又剔除。車尾一列比一般前座稍高,視野不能呈水平線,感覺不佳,其次座位近引擎溫度偏高,加上椅凳較一般硬身,越坐越辛苦就不如企下好過。

若論我的最愛,必屬左邊第四行無疑,此座位位處全巴士正中央重心地段,行車時搖晃感被減至最低之餘,最重要此列位置能夠坐享整隻大側窗的超凡廣闊視野,一邊依著窗一邊諗野,很爽很寫意。請不要天真得以為每個座位皆能盡享側窗,糖衣表層向來蘊藏著很多騙人陷阱,有些座位車窗中間設有牆板乘客只能分得半隻窗,感覺焗束;有的雖然同樣可以食正全餐,奈何牆板位置卻恰好設在座位側旁,若然客倌需要依窗眠一眠的話,牆板其硬無比實不宜酣睡,這還不特止,牆板好衰唔衰剛好阻礙著窗邊擺手位置,將右手擱在窗旁作托鰓狀這個沉思動作將會因而慘被完全封印。

基於上述所有前世今生,上層面向車尾左邊第四行座位就成為我的最佳位置了。

其實除了搭巴士之外,搭小巴亦有其一套獨有揀位法則,不過為免文章太長,在此不贅。

3 comments:

小瓶子 said...

洗耳恭听!

仕仔 said...

估唔到撘巴士都有咁大學問, 而依家出又幾應境.
咁出完關於巴士既, 仲會唔會出關於幾撘小巴既, 然後就係撘地鐵同過海小輪既學問呢 ? 我都好想聽下呢. :)

潤滑KY said...

仕仔:
可想而知平時搭巴士我係諗邊類型既無謂野~

小巴地鐵都有心法,但小輪真係冇,太少搭~~