Monday, 23 November 2009

無言的結局。

好忙,自從踏入十一月之後都好很忙,就連日常部落格更新進程亦一而再被延誤甚至拖垮,當然,又唔係日理萬機,要抽取時間出來打番兩三篇字敷衍一下都唔係話無可能,不過人生在世,懶惰就是王道,反正文章打到出來都係行味滿載,倒不如慳番啖氣來對抗近日冷天氣好過。

重回正題,近月所謂的好忙,就係為一月再度遠征東京旅程做好準備,每日花上大量時間上討論區及各大旅遊部落格遊逛,一邊看著無數資訊一邊隨著人家遊記遊走日本每一角落,人都彷彿提前數月在東洋落地生根,並在各個旅遊點不停流離浪蕩,咁搞法,恐怕未到一月,出發旅行的興奮已經會被過份事前準備沖刷得乾乾淨淨,餘下的,就只有將要走入飛機衝上雲霄的恐怖感覺。

無錯,我係患有嚴重懼機症,不過現在離出發日子尚遠,寫文定驚之事就留待咁上下才出鞘吧。

據經驗,皆凡外遊總會被過份事前準備拖跨了出遊臨近的興奮,當中尤以出訪東洋為甚,事關本人年幼時發了毒誓不會再貪一時之便而浪費體力財力跟旅行團到外地旅遊,所以每逢出巡,那些機票酒店以至行程路線都由自己一手搞掂,而訪東洋,只要閣下用慣了樂天一休じゃらん,就會發現東洋酒店尤如繁星一樣,遍佈在眾鐵路站周邊位置。

我是一個擅於精打細算、酷愛不厭其煩在各個格價大戰中尋樂子的人,酒店越多,我就越喜歡逐間鍵入去審視一下各類型特價方案,而平價之餘,又要動用網上地圖查察酒店附近有否夜店消遣又或食肆便利店,久而久之,莫講話一些旅遊熱區,就連一些不甚了了的民區地理環境都開始了解起來,情況就好像初來香港的荷蘭遊客,訪港才不過四日三夜,幹嘛連竹園南村商場街坊食店都要略知一二?

這就好像日劇裏經常出現的話語,どぞどぞ,多左了。

......

7 comments:

KennyT said...

患有嚴重懼機症 > me too!!

啪兩粒安眠藥先上機啦﹐哈

仕仔 said...

"品川(Shinagawa)太子"都係一個不錯的選擇, 雖然房間唔算大, 但勝在附近食肆多, 又近地鐵, 好方便, 亦唔算貴, 我每次去都住果度, 如果你唔一定要住新宿站果頭, 呢度都ok (我覺得)...:)

潤滑KY said...

KennyT:
試過啪一粒都訓唔到,
兩粒的話可以考慮下,
但有冇牌子推介呢?

仕仔:
唔得呀唔得呀~
JPY11xxx 一泊超出預算,
我要將一泊維持JPY9000左近(雙人房).

卡臣 said...

情況就好像初來香港的荷蘭遊客,訪港才不過四日三夜,幹嘛連竹園南村商場街坊食店都要略知一二?
<---這個例子好傳神呀, 立即明哂

小瓶子 said...

可以试下用KY, 另类刺激.

仕仔 said...

原來已經加到11XXX丹一泊嗱, 話時話, 原來我上次去都已經係三年前, 你呢個POST令我突然間好想去tim....不過呢排d日丹咁貴....

潤滑KY said...

小瓶子:
下?
訂房都用KY 咁灰?

仕仔:
係呀,0係樂天睇要萬一一泊呀~
我睇左間JPY9000一泊但又有洗衣機微波爐的商務旅館,好似幾好~~

D yen 真係好貴,但想去就去,咪諗~