Sunday 22 February 2009

對牛彈琴。

雖然請著我呢類人並非大公司所為,但無可否認,我效力的確實係一間國際大公司。過往公司週年晚會總會請番一個半個歌星嘉賓來撐一撐場,前年我有出席的一次就請了林憶蓮,據聞其後我去旅行避席一年又請過許志安,往昔的又曾經出現過古巨基、李克勤之類,陣容其實都頗為浩大,到今年,礙於經濟關係公司縮皮,請了一個算不上巨星但又頗受歡迎的時尚歌手,方大同。

晚會開始無耐,預備的工作幹得八八九九,就跟同部門的同事坐埋一邊剥花生等睇好戲,老實說,圍內一班同事麻甩佬居多,若然討論趙碩之、E Cup-Baby 之類的班友當然可以輕易將其三圍身世娓娓道來,但講到方大同呢類咁有品味的歌手,佢地呢班老土怪魔,就真的十問九唔曉了。

「方大同其實係咩人?台灣、日本定香港?」同事D 一邊喝著紅酒一邊問。

「咁都唔知?香港人囉,好紅喎呢排。」在場紅酒任飲,我呢類唔駛錢就賣命的,自然一杯接一杯喝過不停。「不過係夏威夷出世。」

「咁勁?咁你都知?」同事D 有點驚訝的說。

「常識唧,佢好紅架佢。」我不停強調著方大同很紅來突顯同事D 的無知。

「咁佢有咩歌?」坐另一邊的同事E 問。

「《love Song》...囉...」篇野未頂到一半就要招供了,其實我跟那班麻甩佬一樣不學無術只愛趙碩之石詠莉,甚麼方大同,他唱來唱去的那幾個旋律,我聽親都訓得好甜好舒服,而先前我能夠出賣僅有的「方氏知識」全因前一晚我為充大頭鬼上了維基看了一遍方的資料,諗住打個底可以跟其他方字女Fans 有個話題傾傾計,誰不知坐埋一堆的又係呢批男人,唉,最憎男人,所以家下問到一些維基沒的東西,就語塞了。

「《Love Song》?唱中文定英文架?」老細忽然又對這個話題有興趣。「哼兩句黎聽下。」

「唔...高潮位咪 ♬Love~Song...lalalala...Love~Song~~♬ 咁囉...」全首歌我剩識呢幾個音、幾隻字。

「...咁其實係中文定英文呀大佬?」同事們聽到哈哈大笑。

避席避席。



去到晚會中段,方大同架著黑眼鏡、一身細身打扮的跟在場人仕用英文打招呼,沒兩句,就坐在綱琴前又彈又唱,感覺真夠時尚。整個表演過程大概花了四十五分鐘,要方搞氣氛當然沒可能,就連歌與歌之間講兩句都少之又少,或者應該咁講,首首差不多,何時為歌與歌之間我都分得不太清楚。據觀察某部份人仕係為之瘋狂的,但另外一批人如我們呢一席,就真的聽到釣哂魚、呵欠連連了。

「呢類R&B 之類的,聽落真係唔係鬧著玩,隻隻都差不多。」散席,我按捺不住將潛藏問題提了出來。「話時話,佢究竟唱左幾首歌?」

現場鴉雀無聲,同部門不愧同部門,質素就只有那麼的多。

番歸無耐,就收到友達電話。

「你地嘉賓年年都好勁架喎,今年邊個?」

「今年方大同。」

「咁正!?有冇同薛凱琪一齊合唱?」

「你估佢地連體嬰咩,請左一個咋。」很多人都會問這個問題,仿佛兩個人切肉不離皮一樣。

「咁佢唱左幾耐?」友達興致勃勃繼續問

「九個字啦。」

「唱左幾多首歌呀?」

「一首。」

「下?四十五分鐘唱得一首?Talk Show 黎架?」

「唔係。係四十五分鐘都係唱埋同一首歌。」



其實已經係個多月前的事,原本都沒興打出來,但今日收到有關方面慨贈工作人員的禮物,又覺得應該借提發揮一下,才冒著被方氏Fans 柴台之險打呢篇野出來,不便之處,敬請見諒。


唱片架多了方大同的簽名CD ,唔聽都感覺得到時尚多了,真感謝有關方面的慷慨。

3 comments:

Anonymous said...

45分鐘唱住同一首歌 ? 咁都未止, 佢係用一隻歌出左幾張唱片tim -_-"

話說回頭, 佢第一隻唱片我都有買, 驚為天人, 超前同期出道的新人(包括側田)好幾個馬鼻, 但自從佢第二隻碟又係咁, 到第n隻碟都係咁, 我已熱情不再了. 但原來我覺得係一成不變既野, 先叫襟興, 你睇下同期既仲有幾多個剩底 ? 連當時好紅既側田都唔知去左邊lu, 但反而方大同仲越來越紅.

袁健健 said...

哈哈哈~~佢首歌長丫嘛,最佳損友都有兩集啦,魔戎都有三集啦,精裝追女仔都四集啦,強姦都有四集啦,陰陽路都...好多集啦~

紅唔紅真係,見仁見智,我諗既係,奬每年都要頒咁囉~人又來來去去得咁多,難得有個有實力的,咪得囉~

側田,我覺得係金牌有d問題,所以成間野d歌手近年都好似跌得好緊要咁。

ps:佢隻碟我都未拆,襯佢紅,賣鬼左佢,嘿嘿。

Anonymous said...

點止金牌有問題, 直頭成個唱片業都變成一潭死水咁啦(以前偶然都會有d漣漪, 依家簡直波平如鏡)...囍貼街已經叫好聽, 唔係呀嘛 ?

ps. 祝你賣到好價錢啦, 話哂有方大同簽名吖嘛.