跟L 小姐一直維持著一年一會又或兩季一會的好朋友式關係，除見面前的數日時間外，其餘大部份時間緊守互不侵犯條約，雙方完全互不抵觸互不踩腳入對方生活圈子範圍之內，所以每次見面，總會噓寒問暖一番，聊著聊著又一晚，真好。是晚最大意義在於生日禮物的遞交儀式，L 小姐生於十一月某日，原先打算用最原始郵寄方法送出以收驚喜之效的，無奈自己做事一向唔似男人太拖拖拉拉一直都找不著寄出機會，最後呢份禮物塵封了三個多月終於能夠開關出山，實在可喜可賀。
老老實實，若然遲遲仍未能送得出的話，我就會拆開自己用的了。
全港最大霧的一日相約於銅記時代廣場，煙霧瀰漫底下與L 小姐相遇上，感覺就好像《倩女幽魂》的場景一樣，恍如隔世。
「你黎左好耐喇？」清一清喉嚨，以顏聯武的重鼻音說道。
「唔～唔係呀，黎左一陣咋嘛。」L 小姐瞄一瞄，又害羞的微微低著頭答到。
其實成件事駛唔駛吹到咁浪漫呢？答案係絕對需要。
事關當晚正正就是情人節後一日，仗住餘韻，任何事都要想成浪漫才算應節有氣氛，加上自己經常羨人家的慕，現在有機會當然要等其他人羨番我兩三野才算正經事。
礙於食評無相無得評關係，在新寧晚膳的細節就省卻不提了，唯一要講的是，新寧招牌菜燒牛肉真的好很好賣，七點半坐定叫餐仍然換來朱翁狀的部長彈出「賣哂」兩字，谷鬼氣。飯後意猶未盡想吃甜品，久仰囍宴大名，但其實一直嫌貴未試過，是晚L 小姐回禮請吃甜的，就決定來試試了。
囍宴現場環境靜靜的有空間感，全院滿座時當然另當別論，但總的來說確係一個飯後甜聚聊天好地方。
PS：嗚謝L 小姐提供高質素相片。
荒天下之間為啥有人能夠面對一堆新穎甜品仍能完全不需摸索、尤如一種知覺的選出想吃的一款出來的呢？L 小姐不消一分鐘，就選定了沖繩黑糖白玉子，而我則在壓力底下考慮了五分多鐘，焗點了炸印尼香蕉伴香蕉雪糕。
沖繩黑糖白玉子到底是甚麼？在我的認知概念上大概就是麻布茶坊類一堆刨冰面上淋上黑糖白玉子禮成之類沒太多工夫甜品，但店方出來的成品，與我想的又有點點風馬牛感覺。一大兜紅豆伴著若干白玉子和黑糖啫喱粒再另上一砵忌廉，一堆野和在一起，賣相普通，加上自己一向對紅豆製品有偏見，我直覺上就覺得呢味野叻唔出樣了。
人不可以賣相，豆不可以靠樣，呢兜野，原來真係幾叻幾好味的，自己一向屬於見酒席甜品係紅豆沙的話會噓的一群人，但跟前呢堆日產紅豆體格飽滿肥美漲卜卜，就好像充血了的小核豆一樣，放入口咬下，豆香濃郁香甜泌出紅豆汁來，軟硬有至保持著平衡口感，有些人可能會嫌紅豆煮得未夠未透未軟腍，但對於我呢類牙齒壯健愛咬頭的來說，就覺得很具個性、很合脾胃了；黑糖啫喱少甜的伴著紅豆同吃，味道就顯得較為糢糊，若然啫喱能夠做得爽口一點的話，整個甜品將會變得更強更勁；而所謂的白玉子，不過是糯米粉圓而已，談不上是甚麼高科技，純為增強口感撐撐場。
最搶鏡的紅豆沒響朵，反而不甚突出的啫喱粉圓則成為命名物，感覺錯配。
自己不太鍾愛香蕉類甜品，但見L 小姐好像有興趣自己又遲遲拿唔定主意，就點了試試，結果同樣喜出望外。
輕輕呻一啖香蕉雪糕，先「咦」了一聲，其後就「嘩」了出來，第一啖真的沒想到蕉味雪糕是可以那麼地蕉的，到嗒落，香蕉味越趨濃烈漫延至口腔內各味蕾，原來熟蕉雪糕是可以熟得那麼香濃卻又感覺清新的，對於不嗜吔蕉的我來說，呢舊雪糕帶給我全新感受，對極胃口，一匙一匙的不自制就吃不停口；雪糕旁伴著炸香蕉兩條，鬆脆外裹著熟透印尼蕉，香甜得無話可說，但雙蕉輝映下，個人還是會票選香蕉雪糕略勝半個鼻位。
其實還有很多想吃而其實自己又吃得落的，不過礙於價錢關係，又不敢太過張狂了。
埋單連加一$88，好像有點赤，但其實現在食甜品若然要講究一點、有點花款的都要三四十餘一位，在此特別謝過L 小姐請客。
餐後送L 小姐搭車，一年一會的活動就此曲終人散，不知L 小姐喜歡微小的生日禮物否？
下次再見之日，遙遙無期。
名稱:囍宴 品.味
地址:銅鑼灣霎東街禮頓中心2樓
4 comments:
"就好像充血了的小核豆一樣"
真係服左你, 點樣都能夠拉上關係. -_-"
其實呢類關係幾好丫, 一年先見一兩次, 見時會滔滔不絕咁講下大家冇見時既經歷, 次次見面都有新鮮感, 總好過成日見既朋友, 講黎講去都係果d, 再好既朋友都會悶呢.
哈哈~
齋講食悶丫嘛,咪諧趣下囉~
我重以為暗暗加一句無人會留意到添~
都係妳眼利。
又唔可以咁講既,如果唔成日見,
再好既朋友都會變得生疏~
所以我成日認為,有得見應該見多d,
就會親密d~
親密左就唔會嫌講來講去果兩味野了。
呢味野又點逃得過我呢d邪派人既法眼呢 ^o^
"親密左就唔會嫌講來講去果兩味野了"
到時就會嫌做黎做去都係果兩味野了 XDDD
咁我諗又唔會嫌既,
有得做總好過無得做~
咳咳,又引我講呢味野,
我一講就停唔到口的了。
Post a Comment