Tuesday, 10 February 2009

《儘管如此,我沒做過》。


上年入戲院次數唔多,睇過有印象的更加少之又少,講梗的有印象,當然並非《低清老翻王》又或《東京部落》之類特別有印象悶同嘔血的電影,而係好得特別深刻,又或比預期好看的電影,其中有之前提及過的《死亡預告》,還有另一套日片《儘管如此,我沒做過》。

單看片名,有點《那年的夜,夏天的海》又或《這邊的冬天天氣很暖》之類單看片名就知文藝味很重的影片,老實說,有點趕客,皆因日本人做事向來極端,假若打正旗號玩文藝的話,那些一個長鏡頭影著火車軌十分鐘的,你和我都未必承受得了,不過買飛前見《儘》片導演為周防正行,又變得有點期待了。提起周防正行,其代表作當然就是想當年笑到觀眾們七個一皮的《五個相樸的少年》和《談談情,跳跳舞》,消失了幾年忽爾來一套看似文藝的,會是甚麼的一回事?

稱之為文藝,其實是有點以偏概全,正確點來說,應該是一套談討日本社會問題及法律問題的文戲。

主角加瀨亮擔演被指控非禮女學生乘客的嫌疑犯,一臉呆呆直直、唔知頭唔知路的表情,可謂完全演活了小市民面對法律時的傍徨無助,看著他一臉無辜、滿口說不出寃枉的壓抑,令人輕易代入角色,看得投入。自己過往甚少留意加瀨亮的電影,只記得他曾演過《戀愛地圖》,到後來《儘》後又在《東京部落》看到加瀨擔演第一個單元《室內擺設》(由《無痛失戀》、《戀愛夢遊中》和《低清老翻王》的米高哥治執導,全戲唯一好看的故事)的主角,才深深感受到加瀨演平凡小市民真的十分稱職,新一季有其演主角的《平凡奇績》,有空的話不日DL 望望;女主角大概就是演新人律師的瀨戶朝香,出場時間多,但表現機會不多,平凡角色,很難搞出甚麼大龍鳳來的。

配角有演主角老死的山本耕也,我呢類老餅一見山本,很自然就會彈出「文也」兩字,無他,日劇《同一屋簷下》效應,影響無遠弗屆;演被非禮女學生的柳生みゆ出瑒機會不多又寂寂無名,但上演時適逢剛剛看完她演配角的日劇《學校沒教的事》,萬變不離個慣字,看著看著,又竟然迷上了,所以當看到《儘》片中段有柳生時,係暗喜左兩三野的。

導演拍喜劇出色,想不到拍這類沉重嚴肅的電影亦同樣引人入勝。全片以文戲作主導且氣氛沉實,故事推進速度一般但流暢沒拖泥帶水,尤其喜歡幾場搏法官好印象需知及法庭戲,莊嚴但不沉悶,看完對日本法律多了半分了解,當然,若然要求飛車爆破場面的會直豎中指,但假若閣下全程代入的話,全片兩句多鐘一閃即逝,看完推開電影門一天光哂,很爽。

據說此片概念源自一宗真實案件,後經導演深入了解及資料搜集拍成,對於片內誰是誰非,作為隔了四句鐘機程的香港人,實在沒啥好評論了。

11 comments:

仕仔 said...

件健學日文學成點? 呢套片唔睇字幕識聽哂未 ?

潤滑KY said...

............
學完...啦囉都。



我諗日本人睇呢套野都要字幕輔助,
超級多對白呀。

潤滑KY said...

咪先,
點解你知我學日文架?
我好似無0係樹寫過喎~~

仕仔 said...

冇0係呢度講過, 可以0係第二度講過架0者..真係吖 !

Anonymous said...

剛剛在友人家借了此片觀看.
感到男主角好無辜,雖然真係吾知佢有冇做過
但從表面証據最後連目擊証人都出現
但仍是被判有罪,而且明眼人都睇到
個法官和檢控官都巳預切個人立場認定被告是有罪
乜吾係疑點歸於被告?好像為著罪成99.9%而判刑,好心寒...
被屈喎,一吾係會以死控訴
又或者變成社會上的黑暗破壞份子
放毒氣,鬧市掉襁水之流.
那被告友人好熟口面看了你這篇原來是同一屋簷下的小弟.
至於周防我是從跳跳舞認識他的
ps.有時想想日本人誠實守規矩係未怕野麻煩呢?
希望你別介意這遲來的評論.其實是看你寫了這篇才借回來的.好怕看錯電影.

windy

潤滑KY said...

Windy:
加瀨亮個樣咁笨,就算睇住佢殺人都覺得佢係有苦衷架啦~
套野開頭講,日本好似同香港相反,要由疑犯證明自己無罪的~
同埋最主要係呢類案既受害一方係慣性得到同情嘛~

PS:我個人認為日本人既誠實守規矩係出於由細到大既教育同埋民族特性,而日本人既民族特性就係奴性,所以咪會很守規矩囉,而香港人,又或中國人既特性係,古惑/精/曉變通同唔受約束,所以咪會亂,係特質囉~

梗唔介意,知有人睇完我d文會搵番套野黎睇,很高興添~
有興趣不妨睇埋《死亡預告》,呢套又係好強好好睇的。

Anonymous said...

好啊!會找來看看,最喜歡別人推介好看的電影...!

windy

windy said...

死亡預告,有種深奧的訊息,覺得戲中社會好冷酷,而最喜歡的故事係倆個音樂死黨和兄妹情,當係直播唱出最後自己想唱的那歌好令我意外,
而兄妹果段就覺得好殘酷,可以與哥哥重新生活但竟然收到逝紙雖然可重見光明但又偏偏係哥哥捐出眼角膜,好天意弄人,最尾妹妹新居中看到盛放的櫻花相信沒有人不能忍得住眼淚,我想是叫人珍惜當下吧!好有意思的電影,我從歌手係台上唱歌巳經開始傷風鼻塞兼敏感...淚不停!!!呢套戲好難吾喊果喎!
*好鐘意派逝紙的松田翔太,做乜山田孝之d身形上落咁大?係戲中真係有d肥腫,但前兩日係電視見到佢...你估下佢似邊個?係小田切讓呀...好瘦胡穌滿面札條辮...99%似!!!

潤滑KY said...

呢套野係漫畫改篇的,我有睇,所以無意外,但無損可觀性,所以我說這是好電影。

個人認為直播時段臨死唱番果首歌一part同全醫院人夾計呃完妹妹後,阿哥個唔捨得表情係極難頂得住唔流眼淚,特別係前者,一邊聽住佢唱一邊睇住佢唱到死,最後重要影埋佢個拍檔,簡直係直擊要害~

我記得睇呢套野時我0係戲院係由頭d眼淚積0係眼窩未停過,去到要害位,重要爆流出黎,對我而言真係幾罕見,當然,全場嘶嘶雪雪同開紙巾聲都係此起彼落,可見十分厲害~

呢套戲絕對係上年既蒼海遺珠啦,入戲院感染力係會更大的。

#松田翔太係日本新代男星中我最鐘意的~至於山田,唔止戲中,就連先前睇日劇《boss》都一樣的腫,相信都好難keep得番喇~
竟然似小田切讓??我一向覺得佢似長瀨智也(同樣患上肥胖症),搵日真係要搵搵望望~

舊《死亡預告》post:
http://noisykinkin.blogspot.com/2009/01/blog-post_05.html

忠實粉絲windy said...

講明係忠實讀者都會自搵泥睇...不過都吾該晒,咁有心比埋連結.
講反山田,真係好似小田君,就前日係k寶娛樂台出現過之馬.

潤滑KY said...

Windy:
未訓添~

k寶越黎越無野睇~近年除左波之外都好少睇。