Monday 9 February 2009

宿命。

星期六流流賦閒在家無事幹,無無聊聊的看著《係咪小兒科》古巨基Jo 鮑前Jo 鮑後唔知醜地呼喚夏雨,感覺尤如月黑風高夜見到黑旋風用劍抓刮玻璃一樣,雞皮四起,刺耳得無與倫比。其實人死矣已,劇終亦應該全盤收皮了,不停的重提舊史的風光外號,講者戇居,聽者又唔知應唔應好,實屬不智。看著夏雨好像一臉尷尬的全程不置可否,情何難堪?

我在想,能夠將角色名永恆地應用在真實演員身上,除了好姨這個異數外,絕對十年再難一遇。

食物有賞味期限,愛情有賞味期限,其實外號都應該有賞味期限吧?就好像兩年沒見、愛騎單車的朋友A 當年因脾氣暴燥而被朋友們效法當時得令的「巴士阿叔」,將朋友A 取名為「單車阿叔」,今時今日再見,假若仍然沿用相同渾名稱呼的話,輕則好像開了一個沒人知的 In-Joke 一樣,集聽失憶全場冷清,重則遭受連番白眼,其後冷笑聲彼落,兩者同樣面矇收場,無他,「巴士阿叔」事件賞味期限完了,連帶相關外號絕句都過期了,猶記得年前港產電影《天行者》其中一幕用了「未解決」來開玩笑,即時將影院溫度推至結霜地步,效果顯著。

其實很多外號的賞味期限都短得難以置信,很多時因聚會中發生一些不太有趣小事而浮現的外號,賞味期限就最為短暫,假若再聚時有人食髓知味舊名重提,即時換來全場沉寂主人家敷衍打完場,此乃輕盈版的不識時務。

賞味期限要注意,但使用場合亦是需要關注的一個環節,尤其當朋友外號不能擺上大枱出不得廳堂的話,就更需要節制謝絕口不擇言。

朋友因姓歐陽而被命名為歐陽具,個人而言很喜歡,但其實真的有礙觀瞻,當街當巷大聲呼喊換來通街白眼過去發生過無數次,最深刻反倒是學生時期一次經歷,中學時期時不時出現做Project 活動,跟另一位同學用了Three Line 撥輪到歐陽具家中相約Project 事宜,歐陽爸爸接電,腦根一時Jam 線收掣不及,竟然彈出一句「唔該你歐陽具丫」出來,登時靜了一靜,隨後換來被臭罵收場。

歐陽具係難聽,但正常人聽到後大概都會先反問一句「咩話?你搵邊位話?」吧?我會想,或者姓歐陽的在成長過程中都有被戲稱為歐陽具的經驗,歐陽爸爸亦不例外集得了類似的慘痛經歷,所以才會對我們大動肝火。

就好像姓袁的一定有被朋輩在姓氏前加上「高」字的經歷一樣,宿命難違。

4 comments:

Irisssy said...

高袁都總好過溫燉/發溫丫......。


P.S.,多謝你link返我呀! 我有少少受寵若驚添... :p

袁健健 said...

iris:
我係十分鍾情於呢種舊式玩笑,我有朋友姓廖,我每次都會加個柯字0係頭,已經無人識笑,但我真心會笑出黎。

PS:
嘩,你講d咁既衰野。
你受寵若驚先令我受寵若驚呀...

Irisssy said...

唔係架, 我睇左你個blog成年幾架啦, 所以你link返我我係真係開心架!

袁健健 said...

iris,
......我都年幾無UPDATE,即係暗串...

多些來往~
交流動漫心得,
謝。