無謂事一則。

友達Lunch 時間忽爾來電，無他，講無謂野，重要係十分之無謂。

「喂，做緊咩？」跟友達的關係，已經無需再講究甚麼勞什子禮貌了。

「無，食緊飯。」自己一向不愛傾電話，平日接到的話還會出現十餘分鐘蜜月期，但假若Lunch 時間接到絕對連交戲都嫌費事，由聲氣以至語氣皆衰到一覽無遺，對待屋企人還好一點，其餘的，一律無情講。關於我這個特性，友達其實是知道的，但就是有很多人喜歡明知故犯、知法犯法，有因有果定律下，塵世間才會有刑罪這回事。「做咩？」

「而家係咪打下比你都唔得先？」語音帶著咀嚼聲，究竟有咩緊要事值得食住飯夾著電話跟一個不喜傾電話的人商討？「今朝番工睇日曆先知，原來今日星期四喎，等我重以為係星期三。」

「係啦，今個星期我都覺得過得特別快。」只要捱過我起步那幾下衰聲賤氣，繼續堅持發出話題的話，前路其實還能夠稱得上是一條康莊大道，情況就好像不停宣告無電而自動熄機的快譯通電子辭典一樣，只要你堅持熄完再開再查、查完又熄又再開再查的話，潛力就會被引爆出來，運作多十餘二十個字的工作量。

「你都覺呀？係咯，我隔離個同事都係咁覺得。」友達深明電子辭典、手機最後一格電的潛在力道理，繼續說著說著。「點解呢？照計放長假後呢個禮拜會特別難過先係架。」

「唔，今個月係二月嘛，」想了想，竟然比我諗得出點解喎。

「有咩關係？」友達問。

「二月潤左一日，岩岩就係潤左今個禮拜其中一日，所以今個禮拜唔係過得特別快，而係真係少左一日。」

「斟杯水先，等陣。」

其實我覺得真係有道理、Work 架喎。



「其實你打黎做咩？」斟完水，傾了三數分鐘，飯都食完，正題仍然得一個桔。

「你今日有冇睇《蘋果》？」友達問。

「除左風月留番今晚返屋企睇，其餘都睇左。」大庭廣眾下翻揭風月版乃性機能失調之麻甩佬愛幹的事，我道德觀念良好且殘存年青的心，麻甩佬事可免則免。「有咩好睇？」

「謝寧露兩點呀！」友達邊說邊笑。

「下？又謝寧？」賣曲奇賣到要露兩點，等同做後備做到要賣屁股一樣，唔係話唔得，而係，究竟關咩事？「做咩呢排成日聽到謝寧個名？」

「頂，我話謝賢呀！」若然此段對話題出於我的話，絕對屬於論笑一部份，但現在由友達作主導，憑其過往的表現，又好像不太會搞這種低級趣味，我想，係真心講錯/聽錯。

「謝賢？我無睇喎。」

「我要做野，你得閒開黎睇啦，拜。」話音未完，就掛掉了。

事後上《蘋果》一而再、再而三的重看該篇所謂的娛樂新聞，仍然摸不著頭腦。



究竟四哥露兩點關我咩事？做咩要特別鄭重打電話黎話過我知？

摸極都摸唔清。