Thursday, 8 October 2009

犯了腦筋上的錯誤。

本人屬於會専心坐定定睇新聞那類舊派人士,但就算閣下再將心分開幾份同時間使用也好,只要嘗試破格一下整晚將電視扭去亞記任由其播放的話,相信都很難會對是日新聞一無所知,事關在所謂大革新之下,亞記除了慣常六點和十點半播晚間新聞,還再在八點半加了一個名為焦點新聞節目,這個焦點新聞可說是一般新聞報導的豪華升級版,將抽選出來的事件用上更多時間鉅細靡遺地再訴說一遍,務求令觀眾們能夠不停又不停重覆翻看新聞事件,達致悶絕嘔吐最終目的。

情況就好像前陣子《香港亂嗡》忽然被睇起推上前線後的狀況一樣,家下又唔係恐怖大王遲左十年先醒起到訪地球,天下貌似太平的話又點會夠料可供亞記每日用上大量時間去作新聞細報?於是近月開始,周不時有專題報導穿插於新聞節目內充撐場面,而前晚,就有一段關於Facebook 小遊戲開心農場的専題播放。

皆凡主流媒體講述網絡世界事宜,唔駛問阿貴,簡單如雅虎知識這種有益項目也好,都必定能夠將之跟沉迷、不受控又或孤獨扯上關係,今次被擺上大枱貴為箇中頭號通緝犯網絡遊戲,看著看著,差點沒以為恐怖大王真的化身開心農場來到人間界作奸犯科。

內容大概就是記者找了一對玩過開心農場的母女作訪問,母親表示為了消除跟囡囡隔世代溝,不惜以身犯險投入開心農場懷抱跟囡囡玩個過癮,誰不知不止街外人,就連做母親的都差點失去定力只顧調理農務而荒廢家務。節目顯然就想藉此個案揭示出開心農場容易令人沉迷,繼而再爆出有社工及家長擔憂此遊戲又偷人家農作物又盛會令細路仔價值觀產生倒置,繼而跟現實生活產生混亂,幹出偷盜之事等。

一句到尾:他們心目中時下年青人都是無腦的。

現在這個世道就是這麼的麻煩和令人討厭,行得街多就會被「探討」青年人物質主義問題;在球場聚得人多就會被「探討」區內街童暴增問題;拍得拖多又會被「探討」青年人性觀念開放問題;怕你怕米貴足不出戶,又會被「探討」家裏蹲現象在港青界迅速蔓延問題,總之,務求令社會大眾不停將事情反覆地一而再、再而三來回探討,最後,大家齊齊返璞歸真,閒時落樓下康樂中心圍埋跳下橡根繩,累了就猜下皇帝玩下何媽實史就最為標準健康。

雖然現在有很多人不會用,但我們都應該先假設人類是有腦生物,灌輸正確價值觀被視為家教一部份自然值得正視,不過既然肥又施好除蟲工作又搞妥,請放膽讓農作物暴露於空氣之中吧!狂風暴雨之下作適當修正當然理所當然,但家下明明就係陽光普照頂多雨細密雲,幹嘛還要用雙層黑色膠袋將農作物重重包圍為免外敵入侵?太多餘的保護,恐怕就連簡單的光合作用都做不了,小草最終枯死收場。

正當我為自己對社會的控訴好像很有智慧而暗暗叫好之際,晚間新聞結束了専題報導,播出下一則新聞提要:


「青年懷疑在商場索K 昏迷送院,被發現時鼻孔周圍留有白色粉末。」


對不起,我錯了,我實在唔應該一竹槓去打一船人。

腦,原來真係唔係每個人類都擁有的。

9 comments:

Iris W. said...

我來還息喇~~ XD

不過話時話,而家D青少年真係太備受保護了,好好奇年輕一代將來會成為點樣既父母囉。囧

潤滑KY said...

iris:
真係黎還~

...我都係年青人黎喎,你話我~

vvip:
「喂,寫野使唔使又長又臭呀 好的文章 小小字就寫晒出來啦」

-要又長又臭架,
因為我鐘意寫差既文章,
好既文章要留比你寫嘛.

仕仔 said...

件健 :

本來見到vvip君的留言我又想多事喇, 但你又好似唔多介意, 所以我唔再做"炸兩"喇, 睇下你同網友的互動反而係一種樂趣呢. :D

潤滑KY said...

仕仔:

作為本部資深成員,
閣下絕對有權做炸兩~哈哈~

其實都唔明,
Blog名一早講左本部落格文字取向,
竟然重用呢個point黎找喳,好奇怪。

順帶一提,佢只想引人去佢個blog,
我先唔會比佢得逞,一見即del佢個意見。

Iris W. said...

你仲係年青人就唔會咁高EQ啦~ XD

仕仔 said...

被你升呢為貴部的資深成員, 真令人高興呢.

你就聰明呢, 我又真係上當去左佢個網誌度睇野.

潤滑KY said...

Iris:

...唔高呀,
查實家下我嬲到爆哂粗lur哂地~

仕仔:

你直頭核心成員添啦~
你個核心成員開始諗篇交叉感染未唧?

佢係第二次留言,第一次我都去左,
跟住忽然有所覺悟發左誓以後唔會再去~

Anonymous said...

KY,

看來嚟遲一步添!咁熱鬧但我原全搭不上咀.
vvip 係乜水搞到袁生發生興趣走去人網誌....?

講反現在的細路,個人覺得好大部份是大人調教出來的,即是寵壞了....囉!

windy

潤滑KY said...

windy:

過左去lu~

其實我想講既係,
又要公眾場所索,又要比人發覺,重要索到成鼻都係,感覺很蠢.

至於細路/年青人素質/行為問題,無咩好講啦,因為我總覺得,當一個人開始不滿現世代年青人所作所為的時候,就是心境開始變老的時候了~所以我抗拒~