Monday, 5 October 2009

《D-9 異形禁區》。


國慶夜,友達再三表示想到尖沙咀睇煙花,我承認自己跟大部份港人一樣有著隱性羊群心理很喜歡湊熱鬧,但諗起要等要迫散場有排搞就覺得反胃了,雙方經過一輪磋商仍然未能達成共識,惟有用上小學生方法三盤兩勝去分出勝負,結果,友達無奈的跟我來到旺角百老匯看異形去。

單睇戲名,《D-9 異形禁區》先天性就予人一種大路荷里活式官能片感覺,甚至乎我係因為院中無大片才夾硬入場,誰不知電影出到來除了爆頭爆腦斷四肢場面之外,還蘊藏著大量黑色幽默,看得人大呼過癮,所以話,睇戲還是不抱期望入場才是正經事。

特別喜歡片中背景設定和異形們的性格特質,雖然異形,又或外星人不是為侵略地球而來這個概念算不上新穎,片中甚至還不能免俗處處明示人類險惡這種十歲細路哥聽到都會呻悶的古老道理,但他們滯留地球原因及被發現時的身體狀態又確實推翻了自己一向對外星人的傳統印象,總之,開首數分鐘所詮釋的故事背景就令我覺得《D-9》很有趣了。

《D-9》為求令電影情節跟現實接軌,全片皆用了仿電視紀錄片手法去拍攝,又或仿閉路電視鏡頭去述事,甚至乎還播出大量訪問主角親人及有關部門人員片段,十分認真地去處理擺明虛構的事情,惡搞味濃厚,單這點來說就很合自己脾胃了。或許是N 年前的《死亡習怍》傷得我太深,又或許我本身就是一個很容易頭暈的人,所以搖來搖去搖到頭都甩的仿真實類型片一向受盡本人所唾棄,《D-9》又唔係低成本製作,鏡頭自然不會搖得那麼勁,但老實說,看畢三份一套後頭仍然係有點重的,當中尤以主角走入外星人家中搜索一段最為惡頂,鏡頭隨著視點不停的左飛右轉上閃下掉,我差點就沒在戲院裏噴射式嘔吐出來,托賴過了頭段紀錄片手法轉趨舒緩,人才過得好一點。

我是一個搭巴士入赤柱都要啪暈浪丸的人,所以以上關於鏡頭的評論大家大可水過鴨背、當聽我吹了一潭無聊的水算數。

總括來說,《D-9 異形禁區》富有娛樂性之餘,在故事創意和拍攝手法上皆給了我很大驚喜,有興趣的,請放膽科水買票捧場,相信此片不會令大家失望。

下周最令我期待電影首選泰國系列作品《五條大路通陰間》,我怕鬼,但卻酷愛鬼片,斬段《陰陽路》式鬼片更一向深得我歡心,加上舊年的《四條大路通陰間》予我莫大好感,今次再下一城,試問有咩可能唔入場會一會佢?

5 comments:

尖尾 said...

你知唔知你係blogspot出文,facebook可以自動import過去變成一篇note?方便喎

潤滑KY said...

唔啦,
facebook 有朋友,
咪搞~

尖尾 said...

係喎,唔記得你個blog有敏感內容 XD

Anonymous said...

五條大路....我都好想看啊!
嚇餐死出身汗好像很刺激的樣子.

潤滑KY said...

尖尾:

哈,又未到敏感咁誇,
但都要盡量避免,

漏左講,恭喜哂,嘿嘿.

無名:

上集《四條》不錯看,
所以對《五條》有點期望.