Tuesday, 15 September 2009

《希魔撞正殺人狂》之掛羊頭賣狗肉。


老老實實,由於自己對於西片觀察力一向都很弱關係,寫起上來很容易發生文不附體事件之餘,還可能出現內容錯誤引述,與其暴短,倒不如將旗收一收比較好,所以《希魔撞正殺人犯》雖然上星期看了,但查實我係唔多想寫的。不過凡事有目共睹,本部落格幾近江郎才盡,若然還要揀擇的話,恐怕要關門大吉,情況有點像千里迢迢走入東涌東薈城的Outlet,時間花了車費用了,一場來到貨物唔太貴的話,再唔等洗都盡可能執番一兩件返歸填數,唔買的話,要空手而回了,所以明知本篇內容會流到極點也好,都要寫寫撐撐場。

齋寫《希》的話恐怕會不夠內容,倒不如先講講近日在網上重溫的港產舊片《五虎將之決裂》吧。

請不要誤會我是在誤打誤撞情況下重溫《五》片,事實上整件重溫事件是有組織有目的、刻意走上討論區搜刮回來的。《五》顧名思義就是由昔日無記五虎合演,而「決裂」兩字雖云跟劇情有點相干,但個人認為在現實層面上更加別具意義,事關當時正值五虎離開無記向外闖後第一套合作電影,在片名砌上「決裂」主題彷彿跟娘家作出控訴,可謂別有一番風味,唔,又當然,這或許是我太多心了。

《五》片講述五名幹探各有性格,在一宗毒品交易案中貪污侵吞了交易款項,繼而引來一連串麻煩事。記得孩提年代看錄影帶第一件事就為角色選角大吃一驚。電影叫得五虎將又搵得無記五虎,幹探主角大概都是那五位小生主演吧?結果五位幹探卻出乎意料地只由劉德華、梁朝偉、苗喬偉和黃日華這四虎配以梁家仁擔演,而被遺留下來的最後一虎湯鎮業則擔演奸角,這對於細路時期腦根唔曉轉彎的我來說,真可說是一大驚喜位,家下牛龜咁大再重溫當然明白,湯那個邪樣有咩理由唔做反派?起碼十數年後的《兄弟》依然無得洗底。

《五》片時至今日重溫仍然睇得我血脈沸騰就是電影好看的鐵証,無需分析太多無謂野的,而要說電影最經典最令人印象深刻一幕,莫過於末段劉華單拖走到眾軍裝警察面前,忽爾取出左輪在眾目睽睽之下以仿米高積遜手法把玩手槍Solo 近十來秒後一聲「再見」對準天靈蓋自殺一段,係很無厘頭很無謂很作狀,但整套動作集熱血瀟灑有型於一身,要做男子漢,就是要這麼刻意造作才是正經事,怎麼現在的港產片都好像忘記了?

回正題,其實我真的認為《希魔撞正殺人犯》很好看,片長但不沉悶,對白精警又充滿惡搞味道,尤其喜歡畢彼特破格演繹,生鬼抵死得令人失笑,相比起前作《玩命.飛車.殺人狂》更具追看性,比入場前預想好看得多。不過今次要入場無需襯早,事關據報《希》將會推出三級無刪剪版,未看的就無謂浪費彈藥去看殘廢版。

未來入場之選有《意外》和《死神4來了》,至於東洋方面好像很久沒有令我感興的代表參賽,難道要等《新世紀福音戰士:破》上映才有日片好看?

2 comments:

仕仔 said...

-《五虎將之決裂》的最後那一幕我也有看, 只可以講實在太過"陳刀仔"喇 (知唔知陳刀仔係邊個呢 ? )

-- 千里迢迢走入東涌東薈城的Outlet --> 我越黎越覺得outlet呢個字係冇意思既, 因為果d店名就叫outlet, 但價錢就同外邊d鋪相差無幾.

--- 我睇左死神4 了, 唉, 真係"旺角隔離果個站"呀 !

---- 希魔我反而冇睇, 如果比《玩命.飛車.殺人狂》好睇, 我都考慮入一入場先, 因為我覺得玩命都幾ok架. 呢排好似上緊希魔既完整冇cut既版本喎, 你係咪睇呢個版本呢 ?

----- 意外係我非常期待既電影呢. 東洋果邊, 唔知毒氣風暴MW唔知好唔好睇呢 ?

潤滑KY said...

-梗知陳刀仔啦,賭神賭俠我睇左不下百次呀,這幕一直很想重溫,事關細個時我係會拎枝玩具槍模仿的。

--香港既outlet 真係冇意思,東薈城除了CK底橫真係抵之外,都係掛羊頭賣狗的。

---死神系列我集集捧場架喎~~我剩諗緊睇普通定3D版好。

----我睇西片品味好差,要注意。
我睇果個係殘廢版來的,我考慮緊睇埋足本版,不過相信要單拖入場了。

-----意外必睇,見風評都唔錯~毒氣風暴我驚係日本仔好興果庭想學荷里活大片的細片,所以令我有D 卻步呀~