Friday 5 June 2009

七上八落的一堆日常事。


近年無記每遇劇集稍為收得又或有點話題性,到大結局當日總會搞點花臣做大個勢,而宣稱全城熱爆的《巾幗梟雄》自然唔例外,大結局當晚播兩句鐘劇集之餘,還搞了個接近一句鐘的甚麼英雄宴,原先打算轉去J2 台避一避風頭,但家中老媽一邊扮不在乎一邊有意無意阻止轉台,就未能免俗將之照單全收。

整個英雄宴基本上就是一場大龍鳯,,席間不停叫劇中人懶感觸的講一大堆無謂野,看在眼裏,真的令人作嘔,劇我係有睇,還覺得真的不錯看,但得罪講句,再好睇都不過一套肥皂劇而已,講甚麼見鬼男主角代表香港人奮鬥精神?雖然看得噁心,但個人認為當晚最覺得噁氣衝頂兼面懵的,相信非主角黎耀祥莫屬,開首一條友率領眾演員上台講綱領鼓動人心,大意為:「我地無線就好似慶豐年咁樣,陳志雲總經理係超級叻人,其他同事就係精英!」之類刷鞋刷出血的說話,可謂肉麻到無以復加地步,而最令人面紅的是,講完台下係無人拍掌的。

要讀出這篇倒了袓宗十八代胃口的稿,有勞了柴九。

到星期一晚《東張西望》還播了眾主角們邊睇結局邊喊到滴淚的場面。

果然係戲子佬,嘿。


前文提及由於是月生活主題為「健康」關係,迷上了「果蔬生活」及Soyjoy 大豆果滋棒,現在「健康」宗旨依舊,但「果蔬生活」慘被飲厭,取而代之是推出市面已經有一段長時間的「花芭Mini」,細細一樽輕鬆易入口,味道甜甜的但又低卡沒負擔,而最主要係Circle K 做緊五元一樽的低價,做完Gym 不能喝甜只能喝水的日子,心情可謂極度抑鬱,要調整,就抖一段時間後啪番樽入口,心情就像那些清新雨後陽光一樣,驟然開朗。


近月每遇工作極度無聊叫人納悶的時候,喜歡含著一碌珍寶珠繼續上路,無他,總覺得一邊工作一邊含著珍寶珠予人一種很有型很有態度的感覺,我當然明白這種孩子氣的舉動跟我年齡不相符,但我最近就是喜歡了,不過有一件事需要澄清,雖然我的工作每日都很無聊很沉悶,但不代表我會日日含一碌,因為珍寶珠都是很肥的。

順帶一提,一向很喜歡舊式士多裏插滿一大樽珍寶珠那庭零售套裝,總覺得放番一樽半樽在公司位處人會變得格外時尚有品味,仗著近月染上珍寶珠癮,或者都係時候買樽番公司酷一酷了。


忽然對內在美多了要求,咪先,我所謂的內在美並非琴棋書畫之類,而係底衫底褲一類內在著用物,過往一直選用佐丹奴又或Uniqlo 底衫的,近日開始轉向質素較高的雞仔嘜,著上身,覺得自己很支持本地品牌之餘,感覺又真係通爽左流少左汗喎。

唔,其實上述三者都係差不多Level 而已。


對內在美有追求,底褲自然不獲豁免,眼見CK 宣傳海報那些壯男模特兒底褲著到上身跨下都好像變得特別強勁特別堅挺,唔,我很想變壯男,更想望落強勁堅挺,就到CK 巡巡,一巡才知米貴,就打退堂鼓了。

翌日,老媽竟然買了三條CK 底褲給我,就問問老媽子何以如此的大破慳囊。

「你想要嘛,咪買比你囉。」老媽摺著衫說。「廿蚊三條唧。」

「哦...」

其實是出於老媽下意識的一點心意唧,無所謂,照著,但為免穿崩,肯定不會懶型露底邊於人前。

假野而已,強勁堅挺感正常狀態下當然係零,而且還很焗很拘束,加上質料沒有索水效果,感覺就像沒著底褲齋著用短褲一樣,沒啥安全感可言,而最要命係,假若著用此底褲當日忽然行狗屎運有突如其來的艷遇,上陣一刻,你教我如何面對跟前戰友?為搏對家歡心裝假狗還算用心良苦,但好人好者無啦啦著假底去獵艷,除褲露底一刻大概跟陣前走火一樣會得到藐同嘖吧?

條野洗完之後重要縮水,縮左水重要著得落,欺人太甚。

5 comments:

素顏天使 said...

縮左水重要著得落 <--我笑鳥

Betty said...

你讲野真系好好笑!

Anonymous said...

珍寶珠...多吃註牙...watch out!

ck under how much/one?

我靜係覺得呀媽李碧涵個廣告好凸乍!

windy

袁健健 said...

素顏:
嘿,妳笑親通常都係賤野~

小瓶子:
我講野好悶,
寫比較好笑。

Windy:
珍寶珠係我少數食完會覺得「漏」既糖。

男裝CK底大概百餘二百左右一條,並唔過態,不過自己著開雜嘜,就唔捨得~
咁女孩子內裝不嬲都貴,自然就唔會當一回事了。

哈哈哈哈~~~
我諗左好耐邊條友叫李碧涵外號呀媽囉~~
好彩GET 到唧~~

我始終喜歡N年前龍格堡張CK 海報,好MAN好澎湃~

puiyee said...

龍格堡CK海報實在正!