Monday 1 June 2009

《反轉豬脯是王子》。


《反轉豬脯是王子》由香港譯名以至宣傳海報,內外都充斥著很濃烈的大韓胡鬧笑片味道,個人計,一向討厭韓類電影,前陣子韓流襲港時甚至幹出絕跡戲院之類戇居罷睇行為,今次若非M 小姐繼《變種特工:狼人外傳》之役後再一次先斬後奏,我想我真的不會入場,更甚至不知道《反》原來是一套地道的東洋電影。

只計《反》單薄不堪的主角陣容,能夠享有不少宣傳攻勢下在香港上到正場,確實是箇中異數,咁當然,請到軟硬配音絕對是當中原因之一,但有些時候我就是不太明白,請軟硬配音真的很難的嗎?情況就好像歌手們常常說在紅館開演唱會是夢寐以求一樣,這件事真的有那麼夢幻嗎?就連林峰都能夠在紅館 Let's Get Wet 的世代,我真的看不到這個行徑有甚麼特別韾香。

動用一舊錢去請明星為外語片配音,當中成本效益有幾大,我不是業內人仕唔多清楚,但周遭的友伴,十居九十都是因為市面上《反》的原音版太過稀少而放棄入場,而所謂的稀少,大概就是二十間戲院有兩間偏僻影院播原版的比例,這樣以配音者作賣點的發行手法,我個人就覺得很是戇居了。

除去主角問題,《反》其實都不錯看的,就故事劇情而言,驚喜度不算太大,樣衰主角機緣巧合下得到古怪寶物成為受歡迎人物,其後發現內涵比外表更可靠,最後捨棄寶物做回自己。這類老掉牙的劇情、老鬼土的大道理,莫說古今中外的大小電影,就連長壽的《叮噹》每隔十話八話亦總會翻啅一次,雖云如此,但經過東洋誇張化色彩包裝,加上靚人靚景之下,過時說教感就被迅速淡化,就以身旁的M 小姐為例,她就十分喜歡片中人物的衣著打扮及鏡頭運用,而我,很愛電影撞色系場景及服裝設計,加上很索的女主角北川景子,自然又覺電影賞心悅目。

擔演靚仔的主角谷原章介在不少日劇皆是男主角又或戲重的第一配角,其受歡迎程度,甚至是本部落某聯名企劃的聯營夥伴愛好之一,所以開首所說的陣容單薄,其實都不過是個人偏見而已,但勿論如何,單憑谷原長相在片中竟然能夠成為人見人愛的所謂超級靚仔,唔,請恕在下不敢苟同;眾所周知,我是一個見異思遷的人,我的確很愛廣末涼子,又愛戶田惠梨香,但看畢《反》,觀念又要稍為修正一下,我想,北川景子或許才是最迷人的一位;在戲中被譽為地上最樣衰的塚地武雄及大島美幸,看在眼裏,其實都不過是尋常肥人而已,離醜離樣衰恐怕還有很遠的距離。

動筆前到雅虎走了一轉看看其他人的影評,發現很多人都對本片「內涵比外表重要」推崇備至,有些宣稱感動落淚,有些看畢全片甚至猶如遇上再生父母一樣,因此改變了人生觀,上述是否鱔稿無需深究亦無從稽考,但若然真有此事的話,我想,香港地泛感動人仕實在繁殖得太急太劇了。

提外話:往時電影點唔受歡迎也好,總有小貓兩三隻捧場,但是晚在九龍塘AMC 看《反》九點半場次,兩條友是切切實實的包了場,全院只有我和她的情況下坐在電影院正中位置看電影,感覺又真的格外輕鬆無拘無束,假若看的是鬼怪驚慄片的話,恐怖氣氛應該會更強更勁。

7 comments:

Irisssy said...

...........咩叫「單憑谷原長相」先?(握拳)


特別附錄:近來覺得好靚的一張北川景子自拍照~
http://star-studio.jp/kitagawa-keiko/index.php?ID=120

話說我有創下過成晚唔訓煲佢個blog的佳績,所以某種意義上我好懷疑其實我係鐘意北川多過谷原的。唉~

袁健健 said...

Iris,我已經特登唔開名留番丁點兒私隱過你,因乜解究你要自認!?點解要咁傻!?

成晚唔訓煲佢個blog

其實我極之明白你既感受,因為同類傻事我都做過亦重做緊,不過我唔識日文咁煲,感覺更戇囉。
我係睇睇下套劇,想知兩條友叫咩名,跟住查查下睇下佢地個blog,搞到天光,跟住套劇要第日睇埋果半。

我煲果兩個係:
柳生みゆ
http://ameblo.jp/miyu-yagyu/
朝倉あき
http://ameblo.jp/asakura-aki/

我到依家都唔明呢兩條濕柴有咩吸引~

Irisssy said...

因為你果丁點兒私隱實在真係俾得太丁點兒太吝嗇了!!! 所以我就只好出來自認, 也許反而會令人覺得我大方呢~~(嘔)

到依家都唔明呢兩條濕柴有咩吸引 ←好在你後尾加左哩句, 唔係我實對你重新評估... 果兩個妹妹咁細個都岩的話也未免太... 咳咳~

其實我煲都係煲北川某熱血fans的翻譯版本唧~ 北川用詞太深, 我係睇得好痛苦的~

友情提示:第三回出左喇喂(終於)!

puiyee said...

北川景子真係好得呀,成套戲最正係有佢。

袁健健 said...

我下次作個隱藏暱稱過你呀下~

咁...我又唔係話岩,即係,合眼緣唧,咁前排追套《學校沒教的事》覺得幾好睇,幾條主角又生面口喎,咪求其執兩個比較好樣的出黎起起底囉...
咁,佢地兩個都成哂年,二字頭都黎緊啦~你話我鐘意d U-15 既就話唧~~~(都唔知做乜要解釋)

唔係掛?連blog都有翻譯?家下d 字幕組唔係偉大到咁呀??

頂...重以為你會趕唔切添...
都好,近排我創作力好似好爆棚,等我去你樹望望先~

Irisssy said...

唔google都唔知,原來套《學校沒教的事》有谷原喎!!睇黎你潛意識其實係好buy佢,只不過係你唔為意唧~~ XDDD
其實我都唔知點解一知道佢地係90年代既人就會覺得佢地好細個,好似永遠都係得14,5歲咁~好奇怪~

北川個fansclub係好勁架,仲要係從3年前就開始翻譯佢個blog,有陣時如果佢果日係同藝人朋友出街仲會翻譯埋果個藝人朋友篇日記添!

我初時都以為趕唔切,但係由於實在太想追漫畫《家庭教師Reborn》所以就拿拿林起貨狂煲囉~~

袁健健 said...

我都唔知點解,近年睇親既日劇都有谷原~

90年代既人就會覺得佢地好細個←車~你自己都好似係差不多咋喎,唔好0係樹扮老囉~

個fans club 咁勁架??等我得閒搵出黎望下先~

《家庭教師Reborn》係咪有隻怪野係殺手但係做左教師果套??喂,我覺得呢套野麻麻咋喎...好似好胡鬧,睇左幾頁放棄左..

重有,喂個第四回好難搞喎,好難可以拖到第五回先大結局喎~~