Monday, 15 June 2009

《Boss》。

自己一向不甚喜歡集與集之間沒太多連貫性的日劇,所以到今時今日仍然不太明白《神探伽俐略》有何吸引人之處,不過不容否認,劇係大熱了,造就今季多了很多題材又或賣點類近的日劇了。

當中《Mr.Brain》擺明居馬就是跟風之作,男主角因意外開啟大腦未開發部份,搭擋著靚女助手綾瀨遙共同查案,而每集又有不少具份量演員客串演出,壓根兒就是翻炒了《神》的成功原素放在新劇再來一次,但老實說,案件佈局唔多巧妙不太引人入勝,解迷部份又十分自圓其說,加上劇中想引人笑的對白又唔多幽默,最要命無啦啦還會出現Q 版人物出來豆知識一番,看得人反感怒放,可謂攻守俱敗,若非此劇由木村拓哉擔演男主角,我早就跟它絕交了。

我想,木村還是拍回《戀愛世紀》之類的愛情故事吧,重有,勞煩下次剪完頭髮先好開鏡。

另外一套跟《神》有點相像,但又沒《Mr.Brain》跟得那麼過火的,就是由天海祐希跟竹野內豐主演的《Boss》


轉貼一張跟故事劇情毫不相干的相片,我看此劇時懷著的那個鬼胎是甚麼,相信都呼之欲出,無錯,就係戶田惠梨香,演性格乖僻女警的戶田架著黑框眼鏡、一身有點宅的造型出場,其他人看在眼裏可能不以為然,但本人一向酷愛戶田,而且暗地裏還流著點點眼鏡屬性的血,這次她一身打扮完全迎合了本人喜好,試問有啥辦法唔熱捧一下?

除去戶田,《Boss》真的不錯看,大橋雖然都是離不開查案破案的公式,但就沒《Mr.Brain》的懶高深兼過份迂迴轉折,劇情人物簡簡單單的一氣呵成,眾角色性格又討好有趣,雖然間唔時會出現硬滑稽狀況,但整體來說著實不錯,不過不知何故此劇十分喜歡用古怪的剪接手法去說故事,看在眼裏,畫面就好像一格格一樣跳來跳去不太連貫,若然這是特色的話,我想還是正正經經的拍法比較好;《Boss》同樣請來一堆知名演員來客串一番,較熟悉的有《金八老師》的武田鐵矢,《電車男》、《死亡預告》的山田孝之,《十四歲媽媽》、《正義的夥伴》的志田未來,還有《燦爛研修醫》的小西真奈美等等,陣容雖然及不上《Mr.Brain》華麗,但總算有名氣加主角級人馬,夠睇頭的了,但話時話,山田孝之不論身型面型皆越來越漲,驟眼一看還以為是朱孝天初登東洋客串,難怪山田近年都以配角或客串居多。

其實今季除了《Mr.Brian》和《Boss》,還有追看橫山裕和松浦亞彌的《益智遊戲》、中居正廣和上戶彩的《婚活》和處於半放棄狀態、松田翔太的《名偵探守則》,慶幸今季動畫只對《Cross Game》和《Pandora Hearts》感興,否則的話有排忙了。

11 comments:

浪子mingmanfred: said...

佢戴黑框索到hihi

潤滑KY said...

絕對索到喊~

好期待佢黎緊既Liar Game SP,呢套野専SELL 佢兩碌長腿~超正。

Iris W. said...

橫山裕和松浦亞彌的《益智遊戲》
↑好感動喎,一般都會寫櫻井翔的說~~

《BOSS》直頭正啦!特別係嗜甜的玉山~ 萌!XDDD

潤滑KY said...

老實,我覺得櫻井翔順眼d~
橫山略嫌造作。

另:《益》越睇越失亂來,同埋同第一輯鋪排一樣,好彩就完唧。

《BOSS》係好睇,戶田真係掂,據聞遲下有反町客串,又反町又竹野內,上世代最強組合呢~

Iris W. said...

其實我都覺,可能努力得滯就適得其反左~

咦係就好呀,反町X竹野內,男前代表耶~~
(明顯地在無視戶田中 XDD)

題外話:結局篇寫好未?

潤滑KY said...

反町x竹野內=霉氣二人組。

偽.題外話:
...
你寫好喇?

Iris W. said...

係...寫好一句咁大把而已...

潤滑KY said...

嚇得我...
你明知我無可能咁快搞掂都重問,搞到我以為你有心過黎潤我~

定個期限啦,唔係會無動力的~
就...唔...
30/6 禮拜二!
好冇?

另:
不如下次作喜劇啦~

再另:
send 多次個地址過我email

Iris W. said...

話時話,喜劇都好喎,成日諗埋d咁黑暗既野好傷下~

之但係咪要影過一輯懶陽光的喜感宣傳照?
好高難度耶~~

潤滑KY said...

喜劇/悲劇/純純的愛都好~
我寫親唔係咸就鬼再唔係見血,
好難搞。

懶陽光的喜感宣傳照

唔知點解會諗起自己烈日下露出東東笑容個樣,好想嘔,但又好似幾好笑~

Iris W. said...

頂...人家本來好喜歡東東的說!! XDDD

如果只係烈日當空露出東東笑容黎影相既都還可以接受, 但若果係一條友用三腳架黎影既話我諗我會笑到腸胃炎囉~~~