Thursday 2 April 2009

絕望喇!我對自己竟然忽略網絡世界裏的禮儀絕望喇!

上星期某日沒帶媽媽的菜返公司,迫於無奈下走出街覓食,當食飽飽坐Lift 期間,聽到以下一段對話。

「頭先食飯佢都幾好意思架喎。」斜右邊的西裝友向身邊另一條西裝友訴說著,而對話中提及的「佢」,據個人理解大概就是另一個不在場的同事了。「埋單時完全無反應。」

「咪係,話就話我地請食飯唧,都唔係話坐定定等人比錢掛。」西裝友附和著。

「係喎,餸黎夾就夾先,到埋單就想走先。」斜右邊的西裝友說得性起。「講真,作下狀爭下埋單都要啦,請都要有禮貌架嘛,不知所謂。」

門一開,兩條西裝友就走了,對話有頭無尾,留下孤獨的我在繼續爬昇的昇降機中感嘆著。

所謂的感嘆,並非要變身衛道之士對兩條西裝友小器無風度的對話大呼小叫,相反,兩條契弟的說話,不單正中下懷,更加講出了自己潛藏於內心深處的心聲。其實自己又何嘗不是曾經心懷過類似的抱怨?早早宣佈請客的飯局,錢就老早預計要付的了,但到俾錢科水一刻,都總渴望著一兩位識趣弟兄會撲出來爭一爭、搶一搶的,雖則明知此乃扮野行為,但經過爭搶洗禮後的請客,感覺就是順氣值回票價一點,這種扭曲掉的古怪心態,我不知普羅大眾有沒感同身受,但我就是擁有了。

爭埋單、搶賬單的實質意義其實不大,但象徵意義卻關乎於社交禮儀問題,這種潛藏著的禮儀對家一旦沒幹上的話,就很容易會被我這種諗無謂野的人視為沒禮貌了。

唔,感覺很《請客》。

其實不同圈子本身就存在著很多類似的不成文潛藏禮儀,就連網上世界亦不例外,單單我那個年代的網上交友工具,就充斥著很多約定俗成的古怪禮儀。

年紀漸長熟透的可能早早遺忘,但我仍然依戀著學生時代緊緊遵守的虛擬餵飯環節:對著心上人,當ICQ/MSN 傾到一半的時候,對家聲稱要食飯的話,還記得要幹些甚麼來刺探軍情嗎?學生時代的大概會「有咩食呀?我又要一啖」吧?如果得到的是一句「小心熱呀,啊~」,表示雙方大有發展機會,足夠麻甩仔樂得一陣子了;假若對方沒有遵從這種網上禮儀的話,結果如何其實心知肚明,換著往昔天真面皮薄的我,足以來一記網上抑鬱通知廣大市民我真的受傷了。

最經典的相信就是沖涼事件,我甚至懷疑全港跟我差不多年紀的麻甩仔女都曾經經歷過類似情節:傾到一半,女方要沖涼但話題又未能斷尾的話,來一句「快D 去沖啦,你再唔沖我偷睇架喇」來彰顯紳士風度吧,若然女方知情識趣有禮貌的話,淑女答案「我去沖喇,唔准偷睇架下~」作回禮,感覺多麼的美好又溫馨啊!為甚麼現在大家都不再遵守這種網上禮儀了?

一大堆廢話,其實最終目的是補償。

近日忽然發憤看了很多中澳台的部落格,才發現部落格玩Tag 文亦有其禮儀潛藏著,隨即再翻看一下自己的《陳年Tag:寫文者24問》,不得了,原來自己一直沒遵守玩Tag 文禮儀,所謂不知者不罪,現在藉機會補回,請看倌們自行貼上《陳》的文首。

「我都唔鐘意玩Tag 既~但係又不停有人Tag 我喎,比人Tag 左十幾廿次,都諗住廢事理,但近排見連文盲陳先生都玩埋呢個Tag 之餘,又再一次Tag 我喎,其實我有咩好比人知喎,咪又係普通人一個,唉,既然咁多人想我玩Tag,咁無計啦,唯有今次真係玩左佢啦頂,麻煩唔好再Tag 我喇下,我唔再玩架喇下~」

難怪總覺得過往寫的Tag 文有若干說不出的不聚財感,現在事後補完一下,當堂順眼哂。

11 comments:

SZE said...

早早宣佈請客的飯局,錢就老早預計要付的了,但到俾錢科水一刻,都總渴望著一兩位識趣弟兄會撲出來爭一爭、搶一搶的,雖則明知此乃扮野行為

無呀!從來都無,講左請客就會比錢,人地話請我會由得人比錢.
我覺得好人好姐咁大個人到左比錢果個moment爭來爭去好難睇.....

呵~同人傾傾下去沖涼通常都係一句"我去沖涼"就走左去..

點解我同你既做法差咁遠架呢?唔通我地有交溝?

袁健健 said...

「點解我同你既做法差咁遠架呢?唔通我地有交溝?」

交溝....
雖然我知係手誤,但我笑左。

袁健健 said...

因為我仍然依戀緊往昔流行網戀的美好日子囉~

網戀唔咁答的話,會被視為唔專業的。
PS:只限十六歲以下。

SZE said...

其實係連我都笑左出黎XDDD

你其實可以搵個妹妹仔玩下網戀呢!(雖然我唔知而家d年青人岩唔岩玩呢味野)

Betty said...

如果系我就不会争住比钱啦, 已经讲好左边个请边个吖嘛...

以前读过"请客"一文, 觉得如此作装很呕心.

袁健健 said...

SZE:
妹妹仔?
咪喇,我同佢地都有交溝呀~XDDDD

小瓶子:
我好鐘意睇人搶,
好睇過打交。

Cat said...

如果我話左請客,係絕對唔會期望人地會喺埋單時爭啊!
因為一早講好左請客架ma..又點解需要再去爭呢?如果唔想請就唔好答應/提出話請.
相反,人地話左請客,我都唔會假惺惺爭埋單,只會最後由衷講一句多謝~~

浪子m: said...

前文巧可愛喲~

留名

paradarz said...

睇到你後面嗰段, 笑左

唔知點解會聯想起d人放自拍照上網然後話
"影得我巧唔靚呀>.<"

袁健健 said...

paradarz:

極正確之聯想!!

Irisssy said...

睇完之後我...居然有少許罪疚感添!!
小女子(?!)為平日無視網絡禮儀在此謝罪~~