Monday, 27 April 2009

等.一個人晚飯。

兩老遠行首爾星期整,獨留本人一個獨守閨房,見有難得的自由,星期六流流就密謀友達來作一作犯。

所謂的作犯,不過就是叫友達來吃餐便飯而已,而最慘的是,密謀左,到臨門一腳仍然被放飛機收場,心裏頭就自然更不爽了,不過回頭一想,自己在朋輩間素有「飛機袁」之名,自己放人飛機放得多,若然被放番一次半次就發哂脾氣的話,就好像有點唔太玩得了,所以略作調整之後,又繼續倒頭大睡。

一醒,望望大鐘竟然黃昏近六時,就起身覓食去。

原先兩個人的作犯晚餐,變了一個人的孤獨晚餐,真箇吃得有點落寞。


早一晚放工到中環的奧利華超市閒逛見燻魚特了接近一半的價,礙於自己一向對一些外表好像不能即食,但實際又能即席享用的海鮮沒啥抵抗力,加上跟前這條煙燻魚還要連著好像很生不能食用的魚皮,就更加得我心了,二話不說,買了回家備用。


拆了真空包裝將皮的部份作底,魚肉部份呈著淡淡河流油污狀的化學顏色,其他人目擊可能會有點怕,但個人而言就很喜歡了。

魚肉軟熟有陣陣煙燻味,加上魚油依然保留在魚身之中,吃落除了燻味之餘還多了魚油香味,很對口胃;遇著中間一條大骨及煙韌魚皮,將之細嚼咬碎,其汁液散發濃烈咸香味,愛煙燻人仕一定會喜歡;缺點就是皮跟肉緊緊相連黐在一起,要分解來吃的話,唔手筷並用的話很難成事。

咸咸香香的一整條才$30.8,實在很好伴酒,就又斟了少許酒來輕酌一番。


我不否認本人生活習慣跟興趣都很叔父輩,但看了上述相片,請不要誤會我是那種會帶著一小枝孖蒸到打冷鋪開條大眼雞、啃菜甫花生自斟自飲的孤獨老人,自己對於火水式的烈酒,仍然是不能接受的。

其實上圖乃老媽釀製了近三年的梅酒,一條友不想喝啤酒,用維他菊花茶來伴燻魚吃又好像有點戇居,就將之開封試試。


自家釀製的倒出來比較杰身,味道甜而帶酸,加了好幾粒冰塊同喝的話,就跟市場上Choya 的沒多大分別,不過注意盛酒樽身是三蒸酒,而內類酒精亦真的用了三蒸酒來釀製,所以酸酸甜甜的自酌著,不經不覺間都喝得有點頭重重了。

除了數樽梅酒之外,老媽還釀製了山桔酒,清了這一批後,一定要叫老媽試試釀製巨峰柚子之類的果味酒,搞得掂的話,年終慳唔少了,可以放上網賣了,終於可以脫貧了。

齋食冷盤喝凍酒人都顯得特別空虛特別寂寞特別凍,見家中有農心薯仔排骨拉麵,無慮即煮。


袁宅過往一向都是出前一丁的擁護者,但近年丁麵加價加得太劇,就轉而投靠港牌公仔麵懷抱,到上月老媽買了農心牌的一眾韓國麵回來,一家人又就愛上了,所以近日滿屋都放滿了農心牌韓麵。

半夜三更煮出前一丁已經夠引死人的了,但若然煮農心牌的話,就更加令人欲罷不能。喝了點酒特別想念熱食,齋吃麵又好像有點單調,見雪櫃有卡夫芝士,記起網上曾經流傳過即食麵加芝士的另類食法,見心情有點納悶,臨上碗時就加了一片在麵頂任其溶化。

卡夫芝士加農心麵,真可謂天下間的大絕配!

農心麵麵質生性煙韌不易軟掉,而湯底味濃帶點辣,夾一啖麵入口,香辣味混著半溶芝士的芝羶味,味道有點像日版合味道的芝士牛奶味杯麵,但前者芝士味來得更強更勁,感覺更像吃著卡邦尼意粉,滿足感十足!我對食方面一向很貪新鮮,唯獨對即食麵之類缺乏嘗鮮決心,現在這款古怪口味能夠令我接受兼絕讚,可想而知真的很好吃了。

滿滿芝士味的湯更好喝,最後當然乾掉了,如果閣下喜歡芝類製品的話,芝士加農心麵一定很對口味。


一邊看動畫日劇的一邊吃喝,轉眼間又夜深,為啥放假的日子總好像過得特別快?看著喝著想著喝得很累,伏在廳中電腦桌上睡著了。

4 comments:

Iris W. said...

比起薯仔排骨, 我個人覺得辛辣麵同卡夫芝士更襯!
經溶化芝士中一中和d辛辣之後, 係真係可以飲晒成碗湯架~ 之不過飲完之後會口渴到咩咁所以唔可以當宵夜食, 唔係第二朝實水腫~

Anonymous said...

樓上位小姐食完味精麵,最好飲反杯可樂或趙香口膠或食反粒糖就好些的了.
韓麵覺牛牛骨湯麵最好味!

candy

潤滑KY said...

Iris:
同意到暈,辛辣系一定更夾芝士~

我係味精湯王,莫講話溝了芝士的韓麵,就連合味道的海鮮杯、出前一丁的豬骨杯、公仔麵的冬菜味,都係會乾盡的。

Candy:
食完味精麵重飲可樂?
罪惡感很重的一個套餐啊!

其實韓式鍋燒味都很不錯吃。

仕仔 said...

撘嘴 :

可樂係用黎解味精的毒呢. 聽說很有效的. 我有個屋企人每次食到味精就會腫到變豬頭咁, 佢話若然飲番杯可樂就冇事. 你話幾咁神奇呢.