Monday 30 March 2009

牢騷一則。

近日對Xbox360 呈熱情冷卻狀,見家中有數隻三分鐘熱度的遊戲在市場仍然有價,就重開擱置將近兩年的雅虎戶口,將之放上拍賣網,試圖為近日頗為拮据的生活迎來一點點甘露。

對金錢概念一向模稜兩可,我很惜錢,但又會無啦啦的豪在一些奇怪的事情上,過往就曾經錄得明明上網賣了一隻邪留丸公仔六十元,到交收時刻見對方女孩子,又自動自覺的降了二十元出售的紀錄,而最蝕桌的是,對方係唔掂的、係唔可以的、係不能食用的,但自己就是無情情割價了,古語有云:年輕之時多輕狂,我所謂的輕狂事,原來就只有這麼的一個無關痛癢輕份量。

事情可能會令各位感到難以置信,但我很認真的宣佈,本人在網上拍賣世界絕對算得上是可靠老實人。比劃格價之事當然精打細算,但一經扑鎚,縱然其後發現更佳更便宜的擺在眼前也好,亦不會棄標潛逃玩失踪,但無奈個人操守再佳,明月照溝渠狀況卻仍然三番四次的持續發生著,上年就曾經發生交收《涼宮春日的憂鬱》輕小說慘被放飛機事件,其實賣野皆因為清位而已,幾十蚊貨仔又唔係等開飯,唔買唔交收唔緊要,開心見誠的話我亦唔會食左佢隻車的,但電郵一再確認,電話又再三約實,甚至到臨出發一刻再撥輪仍然宣稱無問題,結果到交收時刻依然能夠音訊全無要人一等再等浪費時間,這種人渣般的賤精行徑,再小心眼都難以防範。

今時今日,拍賣被放飛機的影響又何止浪費上架費和時間那麼簡單。

在這個信用咭及上網購物過數極之普及的年代,莫說網上銀行理財交咭數,就連買戲票護膚品之類的亦可以輕易於網上用信用咭過數搞掂,但可惡的雅虎,都不知幹甚麼忽然間取消了Master Card 繳付費用的服務,超過了繳費上限貨品就沒法重新上架,當然,到七仔一炮過買$60 雅虎網用錢就可以解決問題,但,我又唔係専業賣家,閒來無事屁股癢才放兩三件無謂野上網,六十大元的拍賣配額,一元半塊的遂次消磨,究竟何年何日才用得完?我唔理,總之未用服務先付款,不爽就不爽,堅拒不從。

到底因乜解究雅虎無啦啦會不接受Master Card 付款服務呢?唔知,亦話之佢,只知上架費要付,但《涼宮春日的憂鬱》輕小說和Xbox360遊戲依舊原封不動的塵封在家中,真無奈。

15 comments:

Irisssy said...

搵次機會做你買家先,嘿嘿。

袁健健 said...

多倫多溫哥華之類交收?
你包機票的話份野free 比你。

Irisssy said...

咁就要睇下你賣既係咩啦~
如果係《絶対彼氏》入面既機械人男友就梗OK啦!

袁健健 said...

咁你寄個相武紗季比我,恨左好鬼耐。

不過幫我查少少遮瑕0係佢對眼袋度先好入箱,佢對袋勁過海味呀。

Irisssy said...

哩層我要問下長瀨智也先得喎, 你等我。

佢個眼袋係大, 但係印象中佢素顏個樣好似都好靚下~

袁健健 said...

唔好提長瀨條友,
佢搶左我個相武,憎左佢好耐~

老實,見到你上msn,但依然要0係樹傾無謂野,
有種又遙遠又接近的矛盾感。

袁健健 said...

又,
相武個眼袋就快跌到落嘴了。

但剛完套《triangle》拍得佢唔掂~扣左分,我都係鐘意《華麗一族》既佢。

Irisssy said...

咁岩既, 長瀨同我個步姐散左之後我都好憎佢喎! 一於Hatebook佢啦嘿。

有無跌到落嘴咁勁呀~~? 畢加索版本的相武麼?! XDDD

《triangle》無睇喎, 不過《華麗一族》既佢又真係好鬼靚~ 佢個樣同果個年代好襯, 尤其是著起和服果陣, 好有氣質。

袁健健 said...

唔好停~繼續0係度傾,
咁樣會搞到篇野好似好多回嚮咁,
感覺好勁好受歡迎。

我都無睇《triangle》啦車~
係前幾日電視播先開始睇番...

廣末真的很掂,
睇《禮儀師》時見佢出鏡爭d拍手掌~
佢同本木盝纏綿果part 更加唔駛講...

Irisssy said...

點解會無端端跳左去廣末果樹既呢請問???
不過佢真係好得, 我睇到佢同本木纏綿既時候係直頭嚇親彈到去三尺遠~ 把聲太好聽啦佢~
...我覺得如果某些動畫製作係搵佢去配音既, 你係會連特典都買三份番黎囉, 唔好話我話。

啊, 唔通你係想0係樹寫兩句《禮儀師》就當寫左影評?

D人滿懷希望咁click到入黎先發現原來得我地兩條茂利, 我怕你會俾人嘘喎袁生~~

袁健健 said...

咁《triangle》有廣末丫嘛,咁廣末真係得嘛,咪講一講囉。

下?點解會嚇親彈開呀?好得喎果幕纏綿,結左離左生左個都重勁fit勁滑溜,下一幕佢地忽然間變左訓覺我直頭係忍唔住細聲「下?咁就無喇!?」出黎...

唔好話配音,我怕如果佢出figure,我會買幾個番黎「奶」添~咳咳...

哈哈,我直頭唔記得左有得寫《禮儀師》,不過無所謂,我d 影評好長好悶,我自己打完都無興睇番,唔會諗住有人睇的。

Irisssy said...

咦,真係唔知原來《triangle》有廣末添。友情客串?

咁我無諗過會咁激架嘛, 本木失驚無神餓狼上身咁撲埋去, 廣末仲露咁多喎! 我把口係衰衰唧, 但係我終究都係一名剛成年來的~ 嚇親都好應該耶。

形象啊袁生, 形象啊!! 哩樹係全世界都睇到既地方來的, 想對figure做啥做啥的事情, 都係留待msn先講啦~~ XDD

我仲諗住你會寫添, 話晒都係廣末丫~

Irisssy said...

原來唔係友情客串, 失敬晒。

袁健健 said...

廣末第一女主角黎架,客你個頭!
我反而覺得相武似客串多d,
個角色好無啦謂謂,感覺無咩用途。

剛成年?剛成年左兩三年啦好似都~
不過果幕我都比佢嚇嚇,突然間無啦啦就擒上去,有少少驚喜...
不過個人認為廣末可以露得再多d囉。

形象...一樓都無乜架啦,唔爭在~
不過講開figure,其實應該稱為扭蛋,
屋企有好多好靚的但無位放出黎,
確實係一個遺憾~

寫影評很痛苦,要扮専業,悶到抽筋~

相武同長瀨結緍,唔知keep得幾耐呢~

Irisssy said...

咳咳, 唔好玩踢爆啦好嗎? 之但係響日本我都真係剛成年咋喎~

查實你覺得《triangle》抵唔抵追先? 我諗緊我考完試好唔好追, 但係如果睇完都係不如唔睇既就免啦~

我夠係啦, 雖然唔係扭蛋, 而係橫山D剪報囉。我都想日日對住, 奈何黐晒上牆就會令到間房更為侷促, 我會發惡夢的。

我諗長瀨唔會同相武結婚掛? 要結都同步姐結啦, 行埋咁耐~

究竟我地幾時先可以移師msn呢。