Tuesday, 10 March 2009

不健康生活。

人越來越老,無可避免就會越來越注重健康,講緊的老,當然並非本人兩張幾野就在這裏扮飽歷滄桑不停撒野,而係講緊三張頭的老哥。老哥一向飯局飲局不絕,就岩岩過去的過大海清袋之旅就本色依然起勢大魚大肉,但近數月又忽然吹起健康之風,就好像舒適堡的極抵半年健身會藉,都係多得佢訓身推介我才的起心肝會它一會。

要減肥但又無恆心的話,真的可以有很多千奇百怪的無聊藉口,我就很喜歡用穿衣系列的來試圖欺騙他人,不斷向外宣稱怕條腰瘦左著開的貴牛仔褲會寛得滯唔岩身,聽落有點道理,但老實講句,唔Keep 肥左的話,褲一樣係會唔岩身的;前排幾經辛苦養成每星期三數次落樓下跑步的習慣,一見天氣涼,阿媽問起為啥跑跑下無跑,又訛稱怕冷親等熱少少再跑,等等下,又變長抖;太耐無跑忽然很急勁的重拾舊歡,睇得新聞多,又會懼怕隱性心臟病發作,但講緊的發作,係未曾驗身底下建構出來的。

運動失敗原因,以上的恆心不足、藉口多多當然是主要致病源,但運動得有機心,據醫生臨床經驗所得,差不多幾近九成會落得失敗告終,所講的機心當然並非為減肥Keep Fit 此等善良的機心,而係潛藏內心深處邪惡的淫亂機心,而我,過去跑步就是心傳著此等淫心。廿幾歲人,縱觀身邊同年友人都漸見成熟務實事業穩定滿身男人味,但唯獨自己,戇居踱日之餘,還沉迷著一堆沒可能發生的無謂事,就好像跑步一樣,健康活動都被我混入不健康的因子在其中。

每次跑步出征前總刻意髮泥塗頭襯衫整理一番,渴望著在公園滿身熱汗衝刺的有型英姿會引來同途跑步少女注意,其後大家每晚每刻都在同一地點相遇上,所謂緣份實在莫過於此,最後搭上譜出一段平凡的公園情緣。這種公園跑步跑上公寓的情節,除了二流電影淫小說經常出現外,現實生活出現機率幾近萬中無一。

夜媽媽食完飯會在公園遇到的,要麼公公婆婆飯後散步,要麼鋼條男女子漢作馬拉松式兢跑,渴望中回首嫣然一笑的少女,都被運動時的地心吸力嚇跑掉了,又可能,都被我這類淫穢人仕所嚇跑掉了,當然,揀選假日黃昏時段可能更有機會覓得目標觀眾,但本人一雙光管得令人髮止的雞腿又不太想在日光日白時出來獻技,玩下手一個唔覺意被一縷日光照中雙腿閃親駕車人仕而釀成車禍的話,再黑心都好,心亦會戚戚然。

其實想深一層,就算遇上心目中那位少女,滿頭髮泥的跑步英姿真的能得到高收視率嗎?就好像穿了一身華禮踢死兔去打保齡一樣,再英明有型也好,都錯配了。滿身熱汗、溶掉了的髮泥起勢從髮絲流出,一點男兒氣都沒有之餘,還有陣陣《92黑玫瑰對黑玫瑰》梁家輝一頭英泥感覺,滑稽亂來得很。

時間過量的姿整準備,加上歷了數次都得不到期待中的報酬,人慢慢就會倦怠起來,跑步活動自然會銜生出不同藉口,最後拉倒了。所以話,立心不良的不純正運動就好像患上先天性發展障礙症一樣,由出世一刻已經嗅得出死神來了。

廢話太多,要講的未有耐講到,再續。

3 comments:

小瓶子 said...

我走左去做yoga, 嗰嗰星期日早上9:45做hot yoga, 感觉好正!

仕仔 said...

你想像既情景唔會話冇得發生既, 不過就要揀地方囉.
聽聞什麼寶雲道呀, 薄夫林道呀之類既地頭會見到有邊溜狗邊跑步既妙齡女子, 佢地又小馬尾又緊身運動衫又身材均勻咁, 點睇呀? ^o^

潤滑KY said...

小瓶子:
嘩......咁早?
我諗如果我去要call 定白車,
天光先訓重要做d咁野一定死。

仕仔:
嘿嘿,小馬尾+緊身運動衫+身材均勻係賣飛佛黎喎~~~
咩你咁好介紹呀~

不過我怕佢地同我一樣有機心,
去釣金龜咋。