平靚正餐廳坊間唔係無，但要在繁華尖咀地段發掘出此等瑰寶，經驗再豐富考古學家恐怕都有兩三分鐘被問到口啞啞，出外搵食日子有功，總會累積到一定經驗值，心水餐廳清單有一份，但死的死改的改，要麼賺埋唔夠交租執笠收場，要麼用先平後貴來吸引食客，一朝得志即起勢加價將貨就價，問心講句，試過用平價交易，又有邊個可以走回頭路？尤其遇著我此等算計食客，更加係誓不回頭。
厚福街急速退步型餐廳 798 對面就隱藏了一間蚊型食店 Olive集齊上述要求，我懶勁的將之當恐龍骸骨發掘出來，但其實人家在OR 早早累積了十多二十食評了。店蚊型但座位坐得舒服，西人老闆尚算和藹可親，另外兩位尤如阿海一樣木獨的唐人員工相信係由 The Sims 聘請過來的，踢一踢郁一郁無指令就一舊木頭的棟埋一邊擔天望地，活脫脫就係 The Sims 真人版。
晚餐豐儉尤人選擇多，貪平幫襯，自然要點選最廉宜的才算得上貫徹始終，跟夥伴倆各自點了晚餐，剩吃晚餐又嫌太悶不能分享，姣婆守唔到寡，又口痕的散叫一客凱撒沙拉分吃。
先奉上店家主打貌似 Pizza的自家製香草包，麵包奇形怪狀香軟有點點香草味，加上熱辣入口當然無失手可能性，跟夥伴一向有慣性Refill 餐包習俗，但見是晚花費實在太少，雙方都不太好意思靱住靱住講唔出口，成為近年少見有得 Fill 而唔 Fill 個案。
餐湯途中沙拉先殺上檯，凱撤沙拉一貫模式，大量芝士鋪面及散落一堆脆麵包粒，簡單，但有齊上述兩大基本賣座卡士的話，遭遇滑鐵盧機率又大幅下調，沙拉份量頗大合二人分吃，菜蔬吃落爽脆感覺新鮮，定價三十元基本上已經超額完成。
事後發現晚餐加八元可以追加一客田園沙拉，假若嫌凱撤沙拉太滯膩的話，田園沙拉都諗得過。
純肉晚餐先上檯，小小一塊呈長方形羊肉餅伴上鮮紅色蕃茄汁白飯，碟頭飯格局但食物放得靚靚仔仔四四正正，賣相不俗，有收先聲奪人之效。
所謂羊肉餅，即免治羊肉撻成一塊再剪香而成，跟想像中羊扒物有一分距離，入口質感實淨略帶羊羶味，遇著舊豆腐煮得老少少就話咬到無力之輩當然怨聲載道，我等自恃牙力十足人仕則食得不亦樂乎；店方蕃茄汁帶有大量蕃茄及茄蓉伴吃，新鮮非一般茶記死紅假茄汁可比，港式食法將之混入白飯再切細羊肉餅同吃，幾香口幾惹味。
羊飯初上檯 Portion 好像唔多夠，但食到尾，其實都足八九成飽。
茄子雞肉飯跟羊肉餅飯蕃茄汁同出一徹，唔介意，但若然兩味野在餐牌上用埋同一款名會更好，即係我唔介意兩個人一齊食鮮茄牛肉飯，但若然一個叫巴黎汁一個叫柬浦寨汁，但成品出到來一模一樣的話，又好像有點引君入洞。
一大塊茄子中間釀入雞肉，製作認真但奈何味道太淡完全被蕃茄汁濃烈茄味所支配，加上口感較軟腍不及羊餅啖啖肉實在，偏食草主義者可能歡喜若狂，但對於我等肉食動物來說味道就太寡太單一，見夥伴食得唔聚財，各交換了一半分吃，有羊有雞有菜有茄子，晚餐變得更為全面多元化。
餐廳出品較少油清怡，吃得飽飽都不覺滯膩，飯後來一杯熱咖啡閒談一下旅行事宜，店方不設加一合一百多元，坐得舒舒服服食物製作認真，要平平地食一餐又唔想過份求其的話，這裏會是一個好選擇。
名稱：Olive Garden Mediterranean Restaurant
地址：尖沙咀厚福街5-6號地下5號舖
No comments:
Post a Comment